בד"ה: פטירה פון זקן המקובלים הגאון הקדוש בוצינא קדישא האי חסידא ופרישא הרב רבי רחמים עטיה זצוקללה"ה

ירושלים - א וואלקן פון טרויער האט זיך אראפגעלאזט אינעם עולם הקבלה והנסתר מיט די אנקום פון די בשורה איבער די פטירה פון זקן המקובלים הגה"צ רבי רחמים עטיה זצ"ל מראשי ישיבת המקובלים נהר שלום, אין טיפן עלטער פון 95 יאר נאכן נישט זיין געזונט א שטיק צייט.

אין די לעצטערע וואכן האט די צושטאנד ביים זקן המקובלים זיך פארערגערט און עס איז געווארן אפגעהאלטן עטליכע עצרות תפילה לרפואתו, אבער היינט מיטאג האט די מצב זיך פלוצלינג שטארק פארערגערט און ער איז נפטר געווארן זייענדיג ארומגענומען מיט די קינדער און תלמידים.

רבי רחמים זצ"ל איז געבוירן אין תרצ"א צו זיין פאטער הרב יצחק עטיה זצ"ל פון די באקאנטע רבני׳שע פאמיליעס אין ארם צובא. ער איז געווען פון די נאנטע תלמידים פון המקובל הרה"ק רבי מרדכי שרעבי זצ"ל זייענדיג די בעל קורא ביי אים אין ישיבה. פאר צענדליגער יארן איז ער געשטאנען אין שפיץ פון די באקאנטע ישיבת המקובלים נהר שלום אין ירושלים.

ער לאזט איבער א דור פון 13 קינדער און הונדערטער אייניקלעך וועלכע זענען ממשיך זיינע הייליגע דרכים, צווישן זיי זיין זוהן הגאון רבי אברהם עטיה שליט"א מחבר ספר פניני בית הלוי און זיין איידעם הגאון רבי יצחק יוסף שליט"א.

וכל בית ישראל יבכו את השריפה אשר שרף ה'.