אונגארן - די וועגן און שטעגן וואס פירט קיין קערעסטיר איז די לעצטע פאר טעג איבערגעפילט מיט טויזנטער אידן וואס זענען געקומען צו פארן אויפן יארצייט פון הרה"ק רבי ישעי׳לע מקערעסטיר זצ"ל מאנטאג ג’ אייר. היי יאר וואס שבת איז אויסגעקומען אין די דריי טעג פונעם יארצייט האבן שוין הונדערטער געוויילט אויף שבת אינעם שטאט, דערפאר האבן די עסקנים פון ׳רבי ישעי׳לעס הויז׳ איינגערישט דער שטאט צו מקבל פנים זיין די הונדערטער געסט אויף שבת כראוי וכיאות, צוגרייטנדיג סעודות כיד המלך פאר אלע געסט.

היי יאר איז צום ערשטן מאל אריין אין באנוץ דער הייליגע ארט, מקום שהתפלל בו אותו צדיק, די הייליגע שוהל פון הרה"ק רבי ישעי׳לע זצ"ל, וואו די תפילות שבת זענען פארגעקומען אויף א דערהויבענע פארנעם. 

די ביהמ"ד געביידע איז געבויט געווארן אין יאר תרע"ט נאך וואס די פריערדיגע געביידע האט זיך פארברענט, אין די יארן נאכן קריג איז עס ליידער געווען אין פרעמדע הענט און גענוצט געווארן צווישן אנדערע אלס א ווערהאוז. אין יאר תש"פ האבן נכדי הרה"ק ר’ ישעי'לע זצ"ל למשפחת רובין אפגעקויפט דער געביידע ווען דורכאויס די לעצטערע חדשים קומט פאר העפטיגע בוי ארבעט דאס צו איבערבויען לשם ולתפארת, אויף דעם שבת יארצייט איז די בוי ארבעט געווארן אפגעשטעלט און די ביהמ"ד איז געווארן איינגערישט צו קענען אקאמאדירן די פילצאליגע מתפללים.