היינט לכבוד וואס מען הייבט אן די נייע שיינע מסכת "מנחות", וואס וועט געלערנט ווערן בעז"ה אין די קומענדיגע פיר חדשים, איז ארויסגעקומען א גאר שיינע סורפרייז, א פרישע הערליכע שיעור פון ראש ישיבה. לא נראה כבושם הזה.

דער נייער שיעור וואס ווערט פארגעלערנט דורכ'ן ראש ישיבה שליט"א האט באקומען דעם נאמען "א דף גמרא אין צוואנציג מינוט", און ווערט אויסגעארבעט דורך מו"ה משה נחום בערגער ני"ו פון לעיקוואוד, וואס האט אונז דערציילט אביסל וואס ליגט אונטער דעם שווערן אונטערנעמונג.

ער דערציילט אז ער האט שוין פון אלס יונגער בחור אלץ מיטגעהאלטן און אויסגעהערט אויפן טעלעפאן אלע שיעורים פון ראש ישיבה שליט"א אין בבלי, ירושלמי און אזוי ווייטער.

שפעטער איז ער געקומען לערנען אין ישיבה, וואו ער האט זיך כסדר מחי' געווען קומענדיג צו יעדן שיעור וואס דער ראש ישיבה האט פארגעלערנט. עס איז אים אלץ געווען צום באוואונדערן דעם זיסן כח הסברה מיט וואס דער ראש ישיבה שליט"א איז באשאנקען געווארן פון אויבערשטן. דער ראש ישיבה שליט"א קען פארלערנען אפילו די שווערסטע סוגיות און עס אראפלייגן אזוי פשוט אז די צוהערער כאפן אפילו נישט אז פילע מענטשן פלאגן זיך צו פארשטיין דעם דף. אזוי אויך לאזט זיך דער ראש ישיבה נישט פארקריכן צו זייטיגע זאכן, אזוי אז די גמרא אויפן פלאץ ווערט קלאר כמונח בקופסא. עקסטער גיסט דער ראש ישיבה אריין אזא פאזיטיווע ענערגיע ביים שיעור, אז אלע וואס האלטן מיט מוזן ווערן אנגעשטעקט. דער ראש ישיבה זעט פון יעדע זאך התחזקות ווי דער אויבערשטער דארף אונז, און מיר קענען יא זיין ערליכע אידן, און מען קען תשובה טון.

וויבאלד ר' משה נחום איז נישט געווען קיין אמעריקאנער בירגער, פלעגט ער דארפן ארויספארן כסדר, און ער פלעגט עס וועלן מיטהאלטן אויפן טעלעפאן, אבער אסאך מאל איז דער שיעור פונעם טאג נאכנישט געווען גרייט, בפרט שבתים און ימים טובים, ווען דער ראש ישיבה פלעגט צומאל משלים זיין די דפים מוצאי שבת און זונטאג, און ער האט געטראכט אז ער וויל מסדר זיין א שיעור פון ראש ישיבה וואס זאל זיין גרייט יעדן טאג זיין דף. אזוי אויך האט ער געטראכט אז עס וואלט געווען זייער שיין ווען מען זאל האבן די ווערטער פון די גמרא צוזאמען מיטן שיעור, מען זאל עס קענען זען און מיטזאגן.

צוערשט האט ער באקומען ערפארונג אין מאכן ווידיאס און עדיטן דורכן ארויסהעלפן דעם מנהל הר"ר אברהם משה שטראסער שליט"א מיט די פאפולערע חיזוק יומי, וואס ער שיקט כסדר ארויס און לייגט צו די גאר שיינע ענימעישאנס וואס בארייכערן דעם שיעור זייער שטארק.

יעצט, איידער מען האט אנגעהויבן די נייע מסכת, איז ער אריין צום ראש ישיבה שליט"א, וועלכער איז געווען זייער פרייליך מיטצוארבעטן דערמיט. דער ראש ישיבה האט תיכף פארגעלערנט דעם שיעור זונטאג פאר היינט דינסטאג, כדי מען זאל נאך האבן צייט עס צו עדיטן און גרייט מאכן.

יעצט איז מען ב"ה צופרידן צו מעלדן אז דער ערשטער שיעור איז שוין גרייט און מען קען עס באקומען אויף פילע פלאטפארמעס. (נאך וועלן בעז"ה נאכפאלגן)

💬 וואטסעפ 848-352-2707

✉️ סובסקרייבט אימעיל rabbiroth.org אדער אימעיל סובסקרייבט צי Yossis2979@gmail.com

📺 ברסלב עני טיים / שיעורי תורה

📰 ברסלב סענטער / אלבומס / שיעורים / מסכת מנחות

▶️ יוטוב / breslevdaf

טייל מעלות פונעם נייעם שיעור

⏰ תמידים כסדרן, דער דף אויפן טאג בס"ד

✨ די ווערטער פון דער גמרא היילייטעד

🖼️ מיט דער צייט וועט מען בעז"ה אויך צולייגן בילדער נוגע צו דער גמרא

📩 דארפסט עס נישט זוכן, וועסט עס באקומען טעגליך אין אימעיל/וואטסעפ

⏱️ קורצער שיעור - בלויז צוואנציג מינוט א דף

🔍 קלארע צום פינטל הסברים צו פארשטיין גוט

🌿 געשמאקע אטמאספערע פול מיט דברי חיזוק

מה אהבתי תורתך כל היום היא שיחתי