*שישו ושמחו בשמחת התורה* 

מיט א התרוממות דקדושה, פול מיט דאנק צום בורא כל עולמים, איז פארגעקומען היינטיגן ר"ח שבט דער מעמד כבוד התורה וחלוקת פרסים, פאר מצטייני תלמידי הישיבה הק' - ישיבת מהרי"ט סאטמאר ב"ב, בהשתתפות הורי התלמידים, ועל צבאם מרן הגה"צ ראש הישיבה שליט"א.

דער מעמד איז פארגעקומען נאך וואס די בחורי חמד האבן זיך מתייגע געווען בהתמדת התורה אין שעות רצופות אויף גאנץ מסכת פסחים, אין זיך געשטעלט צו א פארהער ביי כ"ק הגאון הגדול רבי יהושע ראזנבערגער שליט"א גאב"ד קרית רמ"א בית שמש וחבר הבד"ץ, כ"ק מרן אדמו"ר מוויזניץ בית שמש שליט"א, הגאון הגדול רבי שמואל בראנדסארפער שליט"א חבר הבד"ץ ודומ"ץ ק"ק תוא"י, ווי די רבנים זענען ארויס מלא התפעלות וואס די בחורים האבן באוויזן זייער בקיאות אין די מסכתא

לכבוד התורה ולומדי' איז צוגעשטעלט געווארן גאר א רייכע מעמד ברוב פאר והדר, 

מה נורא המחזה ווען ביים מעמד איז פארגעקומען א בחינה ברוב עם דורך הגאון רבי נפתלי פריזענט שליט"א ראש ישיבת עיון התורה, טרערן פון שמחה האט מען געזעהן ביי די עלטערן ווי עס ווערט מקויים די תפילה ונהיה אנחנו וצאצאינו כולנו יודעי שמך ולומדי תורתך, יעדער אין ביהמ"ד האט געשטראלט צו זעהן ווי בחורי הישיבה זענען בקי אין יעדן שקלא וטריא פון גאנץ פסחים און געהערט זייער בקיאות אין יעדן תוס', ווי דער בוחן האט מיט התרגשות זיך צישמייכלט און געזאגט זיי קענען באלד מיר פארהערן.

נאך די גרויסע מבחן פומבי איז מען ארויס מיט א פייערדיגע ריקוד לכבוד התורה ולומדיה.

דערנאך איז פארגעקומען א מעמד חלוקת פרסים דורך *"קרן יד יקותיאל"* נתנדב געווארן דורך ראש וראשון לכל דבר שבקדושה *הרבני הנגיד התורני נשיא הנהלת הישיבה רבי זלמן לייב וואלדמאן שליט״א ראה"ק*  וואס האט זיך אונטערגענומען צו מעודד זיין די בחורים זיך פארהערן בעל פה אויף זייערע לימודים ביי יעדע סוף זמן, דורך חלוקת פרסים.

מיט פתיחת המעמד האט אויפגעטרויטן דער *משגיח הרה״ג ר׳ יוסף גראס שליט״א* וואס האט ארויס געברענגט דעם יומא טבא לרבנן נאך א יאר פון הארעוואניע וואס יעדער קען מיטהאלטן ווי במשך דעם מעת לעת הארעווען די חשובע בחורים מיט א יגיעה עצומה על התורה והעבודה פון די פריה פארטאגס שעה'ן ביז שפעט אויפדערנאכט, און בין הסדרים.

דערנאך האט אויפגעטראטן דער *מנהל הישיבה הרה"ג ר' מתתיהו שטיגעל שליט״א* וואס לייגט אריין איבערמידלעכע כוחות אין די בחורים מיט תורה ירא"ש ומידות טובות, און מרחיב געווען מיט דברי חיזוק בהודאה על העבר ובקשה על העתיד, און ארויס געברענגט אז דער יסוד פון ישיבה איז אריין ברענגען אין יעדן איינציגן ליבשאפט אין תורה, און אויסגערופן מיט איבעראשונג אשרינו שזכינו אויף אזעלעכע לעכטיגע תלמידים.

דערנאך האט מען מכבד געווען דעם *ראש הקהל הרבני התורני מוהר"ר זלמן לייב וואלדמאן שליט"א נשיא. הנהלת הישיבה* וואס האט ארויס גיברענגט די התרגשות פונעם וויסנשאפט פון בחורי חמד ווי ער האט נאר געפרעגט א שאלה אין פסחים האבן זיי גלייך געענטפערט מיט א געוואלדיגע בהירות, און ארויס געבערנעט די געטריישאפט פון הנהלת הישיבה וואס לייגן אריין געוואלדיגע כוחות אזוי אויך די חשובע עסקנים און חברי הנהלת הקהילה בארה"ק און חו"ל.

דער סיום המס' איז געזאגט געווארן דורך *הגאון הגדול דומ"ץ דקהלתינו שליט"א,* קדיש נאכן סיום האט געזאגט הרה"ח ר' נח קליין הי"ו חבר הנהלת הקהילה לרגל א יא"צ.

דערנאך האט מען זוכה געווען צו הערן פייערדיגע *דברות קודש פון כ"ק מרן הגה"צ ראש הישיבה שליט"א* וואס עינו וליבו שם כל הימים, דאס ישיבה וואס ער באגלייט יום וליל וכל הדברים הקשים יביאון אליו, וואס האט אויפגעטראטן מיטן משא הערב בתוך הדברים האט דער ר"י ארויס געברענגט אז מ'זעהט די תוצאות היגיעה וואס די בחורים האבן אריינגעלייגט א גאנצן זמן, און כדרכו בקודש מחזק געווען און געבעטן מ'זאל ווייטער ממשיך זיין זיך אויף פירן אזוי ווי עס פאסט פאר *'א מהרי"ט בחור'* הן ביים לערנען הן ביים דאווענען *ש"כל רואיהם יכירון כי הם זרע ברך ה'",* אזוי אויך האט ער באטאנט אז מען זאל נישט פארגעסן פון פסחים נאר יעדן טאג האבן א קשר מיט'ן מס', אזוי אז דעם קומעדיגן יאר זאל מען זיך קענען פארהערן סיי קידושין און סיי פסחים.

דאן האט דער ר"י אנגעוואונטשן פאר די עוסקים במלאכת הקודש די רמ"י הישיבה די בחורים און די עלטערן זאלן האבן אסאך נחת און מ'זאל זוכה זיין צו א שנת גאולה וישועה, אמן.

צווישן אנדערע זענען אנוועזנד געווען ביים מעמד *טעמעשווארער רבי שליט״א* מיט די כלי קודש דישיבתנו הקדושה, *הרה״צ ר׳ מאיר לייפער שליט״א האדמו״ר מנדבורנא אראד* *הרה"ג ר' נפתלי ראטשילד שליט"א* חבר הנהלת הישיבה ומרבני קהילתנו, *הרה"ג רבי פנחס ברוך לעבאוויטש שליט"א* משפיע בבית מדרשנו 'ברך משה' ומרבני קהילתנו. 

צום ענדע האבן זיך די בחורים ארויס געלאזט מיט פלאם פייערדיגע ריקודין לכבוד התורה ולומדיה, שישו ושמחו בשמחת התורה. "אשרי מי שבא לכאן ותלמודו בידו", מיט א חיזוק און א שטופ אויף ווייטער.

 *חזו חזו בני חביבי עסקין בחדוותא דילי*