דורשי יחודך כבבת שמרם: אין די פארגאנגענע וואכן איז פארגעקומען בבית הפאר הדור מורינו הרה"ק רבי יעקב מאיר שעכטער שליט"א, א מעמד לחיים לרגל הוצאה לאור הספר החדש "דורשי יחודך" יסודי היהדות ח"ב, שיעורים און מאמרים וואס זענען געזאגט געווארן דורכן פאר הדור שליט"א אין די פארגאנגענע יארן, אין אלע ענינים וואס זענען נוגע די יסודי היהדות - ריינע לויטערע הייליגע דיבורים השווה לכל נפש, 'לחזות בנועם ה' ולבקר בהיכלו'.

צום באשטומטן צייט זענען זיך צוזאמגעקומען די עורכי ונדיבי וידידי מכון דורשי יחודך פון חו"ל און פון ארה"ק, בביתו נאוה קודש ברוב פאר והדר, די פאר הדור שליט"א איז ארויסגעקומען בצהלת פניו הקדושים, זינגענדיג דערביי ניגוני קודש. די פאר הדור האט זיך אוועקגעזעצט, און זיך דערמאנט א ניגון 'קארלין' וואס די רב שליט"א האט געהערט פאר גענוי 85 יאר צוריק, ווען הרה"ק מסטולין הי"ד איז געקומען אויף א באזוך אין ארה"ק, און די חסידים האבן אים באגלייט אין די גאסן פון ירושלים מיט די ניגון.

דערנאך האט אויפגעטרעטן די מנהל ומייסד המכון הרה"ג רבי אליעזר וואלדמאן שליט"א. און ארויסגעברענגט די גיוואלדיגע גריסן וואס מען הערט צוריק מכל קצווי תבל, ווי אידן דערקוויקן זיך מיט די ריינע הייליגע דיבורים, און דערביי אנגעווינטשן דעם רב שליט"א אויף לאנגע געזונטע יארן בבריות גופא ונהורא מעליא, ובניך כשתילי זיתים סביב לשולחנך, און דערביי באדאנקט דעם חשובן נדיב שליט"א, וואס 'אם אין קמח אין תורה'.

דער רב שליט"א האט מעיין געווען אינעם נייעם ספר א לענגערע וויילע, און אויסגעדריקט גרויס קורת רוח, און דערנאך געשאנקן א לעדערנע ספר פארן נדיב שליט"א, און דערביי מיט גרויס הכרת הטוב אנגעווינטשן ברכות לרוב.

דערנאך האט דער רב שליט"א ארומגערעדט מיט א גרויס התלהבות, אויף די גיוואלדיגע זכיה און התחייבות צו דריקן ספרים פון אמונה און פון אידישקייט, און דער אויבערשטער האט באשאפן א דרוק דייקא אין די לעצטערע יארן, ווייל 'זה לעומת זה עשה אלקים', צו קענען דריקן ספרים אויף א גרינגערע אופן צו קענען ביישטיין אנטקעגן די נסיונות הדור, און מחזק געווען די עוסקים במלאכת הקודש שילכו מחיל אל חיל, און ארויסגעבן נאך אסאך ספרים 'להשקות צמאי חסדך'.

דער רב שליט"א האט אנגעהויבן נאכאמאל די ניגון הנ"ל, און דערנאך האט די מנהל ומייסד המכון געפרעגט געציילטע שאלות ביסודי היהדות, אויף וואס דער רב שליט"א האט געענטפערט בטוב טעם ודעת, מיט א טעם ודעת זקנים שדעתן מתיישבות.

דערנאך האט דער רב שליט"א אנגעהויבן א טאנץ ניגון, אויף וואס די ציבור הנאספים זענען ארויס אין א פייערליכע טאנץ, מיט שבח והודאה על העבר, ובקשה על העתיד אז 'עוד ינובון בשיבה דשנים ורעננים יהיו' לאורך ימים ושנות טובים הרבה.

די רב שליט"א האט פארטיילט פאר אלע משתתפים דעם נייעם ספר בהארת פניו, און יעדעם באגריסט מיט א זעלטענעם ענוות חן: על הצדיקים ועל החסידים ועל פליטת בית סופריהם.