בסייעתא דשמיא

טויזענטער אידן שלומי אמוני ישראל תושבי עיר מאנסי שיכון סקווירא והגלילות, ובראשם פילע אדמור"י ורבני העיר וראשי ישיבות שליט"א האבן דעם פארלאפענעם מוצאי שבת קודש פרשת בא איבערגעפולט די פראכטפולע ווילחאוויץ זאלן אין צענטער פון שטאט מאנסי, און אנטייל גענומען בגוף ובממון ביים גייסטרייכן דינער 'א קשר מיט רבי מאיר' לטובת די אור אלטע מסורה'דיגע צוועק, מלך הצדקות בארה"ק 'צדקת רבי מאיר בעל הנס כולל חיבת ירושלים'.

די דערהויבענע נאכט איז געווארן תוכן'דיג אנגעפירט דורך די אלעמען באקאנטע יושב ראש הרה"ח ר' ישראל שטערן הי"ו וואס האט מיט זיין הערליכע לשון לימודים מהנה געווען בדברים נעימים און אויפגעפלאמט דעם ציבור להחזקת הצדקה הק'.

א רייכע סעודת מלוה מלכה איז סערווירט געווארן לכל הקהל הקודש, באגלייט מיט א מעמד ניגוני קודש ווי מ'האט ארומגעשמועסט איבער פארצייטישע ניגונים פון די צדיקים הקודמים זי"ע, בשעת מ'איז מהנה דער עולם מיט די שירי קודש, דורך דער טאלאנטפולער 'נועם' קאפעליע אנגעפירט דורך הרב בעריש מייזליש הי"ו, און אנגעפירט דורך דער באקאנטער חוקר בעניני נגינה הרב בנימין נויפעלד הי"ו מארה"ק יו"ר המכון הידוע 'עתיקין' וואס איז ספעציעל געקומען צופארן צום דיננער.

טראצדעם וואס די זאל איז געווען אויסגעשטעלט אויף די גרעסטע פארנעם שייך צו קענען אריינעמען דעם פילקעפיגער עולם, און עס האט געהערשט א גאר שטארקע פרעסט אינדרויסן איז די גאנצע זאל געווען איבערגעפולט מלא על כל גדותיו, צוליב די ריזן פלייץ פונעם ציבור המשתתפים במשך הלילה וואס זענען געקומען זיך אנווארימען ביים הייליגן מעמד.

אויך איז ערמעגליכט געווארן פאר אלע תושבי העיר צו קענען נעמען א קאר סערוויס צום זאל כמעט בחינם וואס איז ערמעגליכט געווארן מנדבת לבו הטוב פון בנש"ק ידיד נאמן דכוללינו הרב משולם הורוויץ הי"ו פון 'גאו קעב'.

א הערליכע הויכשטאקיגע בימת הכבוד האט באשיינט די אויבנאן פונעם זאל, ווי עס זענען זענען געזעצן אויסגעשורה'ט מערערע גדולי הדור, אדמור"י ורבני העיר, דיינים ראשי ישיבות ומרביצי תורה שליט"א וואס האבן איבערגעפילט דעם אויבנאן און ארויסגעוויזן זייער הערצה און שטיצע פאר דעם הייליגע'ן צדקה.

ספעציעלע מתנות און ווערדפולע זילבערנע חפצים זענען פארטיילט געווארן פאר די חשובע תומכים, אויך איז פארגעקומען א גורל פאר א רייכע 'זילבער טיש' פאר אלע תורמים, נדבת הרבני הנגיד ר' אברהם שלמה מיללער הי"ו פון די בארימטע 'סיגנעטשור סילווער'.

א שטארקע ערענסקייט און התפעלות האט ארומגענומען דעם זאל ווען מ'האט געהאט די כבוד צו הערן א רייכע דרשה ועדות נאמנה מכלי ראשון איבער די ריזיגע פעולות צדקה וחסד פונעם כולל דורך ידידנו הנאמן בנן של קדושים וגדולים הרבני הנגיד החסיד הרב שמואל ישראל הלוי איש הורוויץ שליט"א וואס האט זוכה געווען בנוסף צו זיינע פולע מעשי צדקה וחסד צו קויפן די זכות און ווערן די עמוד התווך פונעם תמיכת חג הפסח תשפ"ו דורכ'ן כולל לאלפי עניי ארה"ק, און לכבוד דעם אפגעשטאט א הערליכע באזוך אינעם היסטארישן לשכת הכולל אין ירושלים, ווי דער נגיד האט ארויסגעברענגט די אויסטערלישע התרגשות צוזעענדיג די ארכיוון פון בריוון און כתבי קודש מאבותינו ורבותינו הקדושים, און פרעזענליך מעיד געווען איבער די אויסערגעווענליכע וועלט פון חסד וואס גייט ארויס פונעם לשכת הכולל און ווערט פארשפרייט איבער גאנץ ארץ ישראל פאר רבבות אידן וואס זענען אנגעוויזן אין דעם, ווערטער וואס האבן אפגעקלינגען בלב כל השומעים.

דער שפיץ התרגשות איז געווען ווען דער אורח הכבוד פה מפיק מגליות מלהיב לבבות ישראל הגה"צ רבי אפרים וואקסמאן שליט"א ראש ישיבת מאור יצחק האט אויפגעטרעטן און האט מיט זיין אש קודש אויפגעפלאמט אלע הערצער מיט גאר ווארימע און הארציגע דיבורים איבער די געוואלדיגע סגולה פון שטיצן דוקא עניי ארץ הקודש כולל חבת ירושלים לצדקת רבי מאיר בעל הנס און וואו עס איז געווען קודש קדשים ביי אלע פריערדיגע צדיקים כידוע, און צוגעענדיגט בדברי שבח והוקרה אויף זיין נעפיו הנגיד החסיד רבי שמואל שליט"א און איבער די ריזיגע קידוש ה' וואס ער מאכט אן מיט זיין ברייטהארציגע נתינה.

די פרס 'חבת ירושלים - תנו כבוד לתורה' איז געשאנקען געווארן פאר הרה"ג ר' שלום יחזקאל שרגא רובין שליט"א חדב"ן כ"ק הגה"צ גאב"ד סאטמאר מאנסי שליט"א מרבני הכולל וואס איז גאר געטריי איבערגעגעבן פאר'ן כולל הירושה לו מאבותיו ורבותיו הק'.

ספעציעלע פרסים און תעודות זענען געגעבן געווארן פאר די חשובע גבאי קודש און עסקנים חשובים, 'נזר נחלת אבות' פאר בנש"ק הרב חיים מרדכי מייזליש שליט"א נכד הרה"ק , 'עטרת חבת ירושלים' פאר בנש"ק הרב מרדכי שפירא שליט"א וואס האט געפירט די לשכת הכולל אין מאנסי פאר לאנגע יארן, 'נזר גדול המעשה' פאר מוה"ר גרשון יצחק פליישמאן הי"ו און מיט 'נזר גבאות קודש' איז באקרוינט געווארן מוה"ר מנחם מענדל העסקעל הי"ו.

צום שלוס פונעם דיננער איז געווען די דערהויבענע מאמענטן ווען מ'האט פארקויפט די זכות ברכת המזון אויפ'ן הייליגען און היסטארישע בעכער פון קודש הקדשים הרה"ק המגיד ממעזריטש זצוק"ל, וואס איז אריבערגעגאנגען מדור דור און ליגט היינט ביי א חשוב'ע נגיד מגדולי תומכי הכולל וואס האט עס אריבערגעברענגט צום דיננער, די זכות איז פארקויפט געווארן פאר די קלאסאלע סכום פון צעהן טויזענט דאללער און מיטן בענטשען איז מכובד געווארן די בארימטע לאנגיעריגע גזבר הכולל ונעים זמירות ישראל הרה"ח המפורסם ר' אבוש בראדט שליט"א, דער זכות הגבהת הכוס אויפן כוס הישועות האט געקויפט בנש"ק הרבני הנגיד הרב שמואל ישעי' פריעדמאן שליט"א און באלד דערנאך האבן זיך הונדערטער אידן געשטיפט אין די שורות מקבל צו זיין כוס של ברכה מיט א נתינה פון $180 און אן עקסטער זכי' צו קענען טרינקן פונעם הייליגן בעכער דירעקט מיט די השתתפות פון $500 לטובת הכולל.

די גאנצע מעמד הדינער און די הכנות בכל פרטי' ודקדוקי' איז געווארן מייסטערהאפטיג אויסגעפלאנט און געפירט מיט גרויס מומחיות דורך די וועלט בארימטע 'פראדזשעקטאר' גרופע אין שפיץ פון מו"ה ר' אהרן עהרנטאהל הי"ו און מו"ה ר' אייזיק מאשקאוויטש הי"ו.

די ריזן ציבור האט פארלאזט דעם זאל נאך א הערליכע פראגראם, און אהיימגענומען פילע שיינע מתנות, ועל כולם די פילע ברכות, סגולות וישועות עד אין שיעור וערך פון שטיצן דעם הייליגען מסורה'דיגן קופה כולל חבת ירושלים לצדקת רבי מאיר בעל הנס, אלקא דמאיר עננו!