אויסערגעווענליכע התרגשות ביים צענטראלער סעודת הילולא אין "רבי ר' אלימלך'ס הויף" אין ליזענסק, אנגעפירט דורך די אייניקלעך פונעם הייליגן בעל ההילולא זי"ע בראשות כ"ק אדמו"ר מליזענסק שליט"א

דער מעמד האט אויך געדינט אלס חנוכת הבית פונעם מקוה "מקוה הישועות ישראל דוב" און סיום כתיבת ס"ת “ספר המופת”

ליזענסק, פולין – א גאר רירנדע אטמאספער האט ארומגענומען דעם ציבור דעם פארגאנגענעם כ"א אדר העעל"ט ביים צענטראלן סעודת הילולא וואס איז אפגעראכטן געווארן אין ליזענסק, סמוך ונראה צום ציון הקדוש, דורך "רבי ר' אלימלך'ס הויף" אנגעפירט דורך זיינע חשוב'ע אייניקלעך ובראשם כ"ק אדמו"ר מליזענסק שליט"א.

דער יומא דהילולא האט דאס יאר געהאט א גאר אנדערן באדייט ווי די פריערדיגע יארן צוליב עטליכע סיבות. ערשטנס, צוליב די מלחמה וואס פלאקערט אין מיטל מזרח, וואס האט ליידער אריינגעשטעלט ארצנו הקדושה אין א שרעקליכן געפאר און אפגעהאלטן טויזנטער תושבי ארץ הקודש פון זיך קענען באטייליגן ביי די הילולא. בלויז געציילטע אידן האבן מצליח געווען צו קומען פון ארץ ישראל מיט א געוואלדיגע מסירות נפש שופך שיח צו זיין אויף דעם אדמת קודש, דער מקום המסוגל לישועות, און פועל'ן ישועות פאר זייערע ברידער, אחים לצרה, וועלכע האבן נישט געקענט קומען.

ווי אויך צוליב די געוואלדיגע אפענע אותות ומופתים וואס האבן זיך אפגעשפילט אינעם פארלאפענעם יאר ביי די תומכים פון רבי ר' אלימלך'ס הויף.

די הארצרייסנדע בכיות און הימל-שפאלטנדע תפילות וואס האבן זיך אפגעטון אינעם הייליגן אוהל זענען געווען למעלה מן המשוער, ספעציעל צוליב דעם עת צרה פון אחינו בני ישראל אין ארץ ישראל.

א ספעציעלע איבערראשונג האט אבער אפגעווארט די טויזנטער פוקדי הציון הקדוש, ביים אנטדעקן די הערליכע נייע מקוה טהרה – איינס פון די שענסטע און פראכטפולסטע איבער די גאנצע וועלט – וואס געפינט זיך אינעם הייליגן רבי'ן ר' אלימלך'ס הויז.

די מקוה טראגט דעם נאמען "מקוה הישועות ישראל דוב", נאכן חשוב'ן שר הצדקה הנגיד המפורסם מוה"ר ישראל דוב גאלדבערגער ז"ל, וועלכער האט צוריקגעגעבן געגעבן נשמתו ליוצרו אין די פארגאנגענע חדשים. די מקוה איז נתנדב געווארן מיט גרויס בנדבת לבו פון זיין זון און ממלא מקומו, הרבני הנגיד המפורסם מוה"ר אברהם יהודה גאלדבערגער שליט"א, אן אייניקל פונעם הייליגן נועם אלימלך זצ"ל.

דער נאמען "מקוה הישועות" איז געגעבן געווארן צוליב די געוואלדיגע ישועות וואס די תומכים פונעם פראיעקט האבן ב"ה זוכה געווען צו זען. צווישן זיי איז דער בנש"ק הרב ר' מאיר יחיאל מאסטער שליט"א, וועלכער האט מיט צוויי יאר צוריק, בעצם יומא דהילולא קדישא, מנדב געווען א סכום הגון פארן בנין המקוה, און איז ב"ה געהאלפן געווארן מיט זיין ערשטן קינד פונקט א יאר שפעטער, צום טאג ביומא דהילולא קדישא.

לאור דעם גרויסן מופת, האט הרב ר' מאיר יחיאל שליט"א תיכף ומיד אונטערגענומען צו שרייבן א ספר תורה, דעם "ספר המופת", כדי עס צו קענען מסיים זיין אין ליזענסק ביים קומענדיגן יומא דהילולא.

נאך א געוואלדיגער מופת בזכות פונעם מקוה האט זיך אפגעשפילט בעצם יומא דהילולא: אן עלטערער בחור, וועלכער דינט אלס קאנטראקטאר, האט מיט זעקס חדשים צוריק אנגעבאטן זיך אריינצואווארפן אין די מלאכת הבנייה פון די מקוה, נאכדעם וואס די בוי-ארבעט איז געווען אפגעשטעלט פאר צוויי יאר. בלויז אדאנק זיין אויסטערלישע איבערגעגעבנקייט איז די מקוה פארענדיגט געווארן ברוב פאר והדר, און יעצט ביומא דהילולא איז אריינגעקומען די פריידיגע בשורה אז דער בחור איז ב"ה א חתן געווארן בשעה טובה ומצלחת. עס האט זיך ווידעראמאל ארויסגעשטעלט אז דער הייליגער רבי ר' אלימלך זי"ע בלייבט קיינמאל נישט שולדיג.

די צענטראלע סעודת הילולא איז אפגעראכטן געווארן אינעם גרויסן שאטער פארנט פונעם הייליגן רבי ר' אלימלך'ס הויז און בית המדרש, וואס איז געווען אפן 24 שעה דורכאויס דעם גאנצן הילולא פאר די טויזנטער אידן וועלכע זענען דורך געגאנגען און זיך דערקוויקט מיט די געשמאקע אכילה ושתי' כיד המלך.

כ"ק אדמו"ר מלימינוב שליט"א, וועלכער קומט יעדעס יאר ספעציעל זיך משתתף זיין ביי די סעודת הילולא, האט אויפגעטרעטן מיט פייערדיגע דיבורים לכבוד המאורע.

דערנאך האט אויפגעטרעטן הרה"ח ר' אלי מאיר גאלדבערגער הי"ו, דער זון פונעם נדבן המקוה, וועלכער האט בעיקר ארויסגעברענגט דעם שבח פון זיין פאטער, וואס זיין גאנצע לעבן איז געווידמעט צו שטיצן מוסדות התורה והחסד און העלפן אידן אין נויט.

דער משא המעמד איז געהערט געווארן דורך כ"ק אדמו"ר הגה"צ רבי דניאל רוקח מליזענסק שליט"א, דער מייסד ומחדש פונעם הייליגן הויז און בית המדרש פונעם הייליגן בעל ההילולא, באקאנט אלס "רבי ר' אלימלך'ס הויף". דארט האבן זיינע הייליגע אבות, די צדיקי הדור, געדינט אלס אדמורי"ם ביזן קריג – א קייט פון צדיקים לבית ליזענסק בן אחר בן: הרה"ק רבי אלחנן, בן הרה"ק רבי אלימלך, בן הרה"ק רבי אלעזר, בן הרה"ק רבי נפתלי, בן הרה"ק רבי אלעזר, דער זון פונעם הייליגן נועם אלימלך זי"ע. ביי זיי איז געלעגן דער שליסל פונעם הייליגן ציון דור אחר דור, און דארט זענען זיי געקומען למנוחת עולמים.

דער רבי שליט"א האט אנגעהויבן זיינע דיבורים מיט סיפורי מעשיות פון די געוואלדיגע מופתים וואס מ'דערציילט פונעם הייליגן בעל ההילולא זי"ע. דער רבי האט ארויסגעברענגט אז מ'דארף ניטאמאל זוכן מעשיות פון איבער צוויי הונדערט יאר צוריק ווען דער בעל ההילולא האט נאך געלעבט; נאר אפילו עד היום הזה קומען פאר אויסטערלישע מופתים למעלה מדרך הטבע טאג-טעגליך. דאס אלעס איז בזכותו פונעם צדיק און מופת הדור, פונקט ווי בחיים חיותו.

דער רבי שליט"א האט דערציילט, אז ער אליין הערט אן א שיעור מעשיות פון מענטשן וואס האבן געזען אפענע ישועות וואס לייגן זיך בכלל נישט אויפ'ן שכל, בזכות פונעם בעל ההילולא, און ספעציעל דורך דעם וואס זיי שטיצן און העלפן ארויס די אייניקלעך פונעם בעל ההילולא. דאס שטימט גוט מיט די מסורה וואס מ'ברענגט נאך פונעם הייליגן דברי חיים פון צאנז זי"ע, וועלכער פלעגט זאגן אז דער הייליגער רבי ר' אלימלך האט צוגעזאגט ווייטער צו ברענגען ישועות פונקט אזוי ווי ווען ער איז דא געווען אויף דער וועלט, פאר ווער עס וועט העלפן זיינע קינדער און אייניקלעך.

דער רבי שליט"א האט ווייטער אויסגעפירט און צוגעברענגט די גמרא אין מסכת מנחות וואס דערציילט וויאזוי מ'פלעגט ווייזן די לחם הפנים פאר די עולי רגל, כדי זיי זאלן זען דעם גרויסן נס אז עס איז געבליבן פריש און הייס פון שבת צו שבת, וואס דאס איז געווען א סימן אויף די גרויסע ליבשאפט פונעם בורא כל עולמים צו כלל ישראל. טאקע דערפאר, האט דער רבי אויסגעפירט, איז וויכטיג מפרסם צו זיין די געוואלדיגע מופתים וואס פאסירן טעגליך דורך דעם זכות פונעם קודש הקדשים, דער הייליגער רבי אלימלך זי"ע, כדי צו ווייזן די שטארקע חביבות און ליבשאפט פונעם הייליגן נועם אלימלך צו אידישע קינדער.

צום שלוס האט דער רבי געמאלדן זיין כוונה אויפצושטעלן א ספעציעלן מכון וואס וועט זיך אפגעבן מיט'ן מפרסם זיין די אלע מופתים און מעשיות וואס פאסירן בימינו אלה.

דער רבי שליט"א האט דערנאך ארומגערעדט איבער די גרויסע זכותים פון הרה"ח ר' ישראל דוב גאלדבערגער ע"ה, אויף וועמענס נאמען עס רופט זיך די "מקוה הישועות". דער רבי האט ארויסגעברענגט די חשיבות פונעם הויף וואס האט געגעבן אזא פאסיגן נאמען פארן מקוה, נאכדעם וואס מ'האט געקענט ר' ישראל דוב אלס דער "שר החסד" פונעם דור, וואס האט מנדב געווען פילע מקוואות און אליין געזען גרויסע ישועות דורך זיי. דער רבי האט מסיים געווען מיט דברי ברכה אז "מקוה ישראל דוב" זאל ווייטער ממשיך זיין ישועות משמי מעל פאר אלע תומכים און טובלים.

צום שלוס האט דער רבי שליט"א צוגעטרעטן מיט חרדת הקודש מסיים צו זיין די כתיבת האותיות פונעם ספר תורה "ספר המופת", נאכדעם וואס הונדערטער אידן האבן געהאט די זכיה אריינצושרייבן אן אות דורכאויס דעם גאנצן יום ההילולא.

תיכף נאכן ענדיגן די כתיבת האותיות, האט דער רבי שליט"א געטאנצן מיטן ספר תורה מיט א געוואלדיגע שמחה און דביקות. עס האט זיך געשפירט אין די לופט ווי זיין הייליגער זיידע, דער בעל ההילולא, טאנצט מיט מיט די שמחת התורה.

די אלע וואס ווילן מפרסם זיין א פערזענליכע ישועה וואס זיי האבן געהאט אין ליזענסק, אדער די וואס זוכן א זכות און ווילן פאראייביגן א נאמען אין די "מקוה הישועות", ביטע שיקט אן אימעיל צו: Lizhensk@gmail.com