כל המציל נפש אחת מישראל כאילו קיים עולם מלא!

הערליכע מעמד קביעת מזוזה און מסיבת לחיים דורך כ"ק מרן אדמו"ר מ'סאטמאר שליט"א אינעם שפאגל-נייע גאראדזש פון "חברה הצלה" אין קרית יטב לב

פראכטפולער בנין איז שוין אין פאקטישער באנוץ מיט פלאץ פאר זעקס אמבולאנסן נדבת לבו הטוב פונעם בונה העיר הרה"ח זיידא ישראל חיים בערקאוויטש הי"ו פון די בערקאו גרופ - רבינו שליט"א איז מאציל מברכותיו פאר אלע משתתפים – מיט באטייליגונג פון פראמינענטע הצלה מיטגלידער פון קעטסקילס, ברוקלין און קרית יטב לב.

דעם זונטאג פ' נח העעל"ט איז אפגעראכטן געווארן א גאר שיינעם מעמד קביעת מזוזה אינאיינעם מיט א מסיבת לחיים לכבוד דאס עפענונג פונעם פראכטפולן "הצלה גאראדזש" פון חברה הצלה דקעטסקיללס און קרית יטב לב, מיט די פערזענליכע השתתפות פון כ"ק מרן אדמו"ר מ'סאטמאר שליט"א.

חברה הצלה דקעסקיללס מיט איר אהרגעשטעלטע באזע און קרית יטב לב שטייט צום דינסט פון די גאנצע אומגעגנט מיט אירע הונדערטער משפחות כ"י, און פילע חשובע געטרייע וואלונטירן זענען אנגעשלאסן דערין צו ענטפערן טעגליכע הילפסרופן אויף א שנעלע און איבערגעגעבענעם פארנעם.

מיט די כסדר'דיגע וואוקס פונעם שטאט בליעה"ר האט זיך געפאדערט צו פארמאגן אן אייגענעם בנין, וואס זאל אקאמאדירן די הצלה אמבולאנסן און דיספעטשינג צענטערן. ספעציעל וועט עס צוניץ קומען יעצט דורכאויס די ווינטער חדשים ווען אין פאל פון עמערדזשענסי וועלן די אמבולאנסן זיין ווארעם און גרייט. (באזונדער אין די יעצטיגע וואכן ווען לאור די שווערע מצב אין ארץ ישראל וועלן טויזענטע ישיבה בחורים לערנען אין פארשידענע קעמפס אין אפסטעיט).

דער חשובער תושב העיר הרבני הנכבד ר' זיידא ישראל חיים בערקאוויטש הי"ו אייגנטומער פון די בארימטע "בערקאו גרופ", וועלכער פירט אן די פילצאליגע בוי-פראיעקטן אין קרית יטב לב, איז אקעגן געקומען מיט נדבת לבו הטוב און געשאנקן א נייע הערליכע בנין פאר דעם צוועק.

צום געהויבענעם מאמענט איז כ"ק מרן אדמו"ר שליט"א ספעציעל געקומען צו קובע זיין א מזוזה, ער האט זיך ארומגעקוקט אויפן גאנצן בנין, און דערנאך זיך געזעצט פאר א מסיבת לחיים, וואו ער האט אויפגעטרעטן מיט דברות קודש ארויסברענגענדיג די געוואלדיגע ענין פון העלפן אויסברייטערן די גבולי הקדושה פונעם שטאט, און צוצושטעלן די ריכטיגע הילף על כל צרה שלא תבוא, וואס מיט דעם איז מען מקרב ביאת המשיח בב"א.

צווישן די באטייליגטע ביים מסיבה האבן זיך אנגעזעהן אלע לאקאלע הצלה וואלונטירן, ווי אויך מעמבערס און פארשטייער פון פארשידענע היימישע געגנטער, פון "סענטרעל הצלה", פון "וויליאמסבורג הצלה" און פון "קעטסקילס הצלה". צווישן אנדערע האט זיך באטייליגט ר' משה נתן בראווער, ר' אברהם יושע ווירצבערגער, ר' ברוך גיפס, ר' יודל פייג, ר' שמחה בערנאטה, ר' בנציון לעבאוויטש און נאך.

ר' משה נתן בראווער האט מיט קורצע ווערטער באדאנקט פאר'ן חשוב'ן נדבן הבנין ר' זיידא ישראל חיים הי"ו, דערנאך האט דער רבי שליט"א אנגעוואונטשן גאר ווארעם פאר אלע משתתפים. די מעמד האט געלאזט א שטארקע רושם אויף אלע פארזאמעלטע, מיט תפלה און האפענונג אז מ'זאל נישט וויסן פון קיין צער ח"ו, נאר פון שמחה ונחת.

ויהי העיר הלוך וגדול!