Loading

עלעגאנטע מסיבת מלוה מלכה לטובת מוסדות סאטמאר בני ברק

ח כסלו תשפ"ד

0 4,568
Main image for עלעגאנטע מסיבת מלוה מלכה לטובת מוסדות סאטמאר בני ברק

ק"ק סאטמאר בני ברק: הונדערטער אנ"ש האבן זיך פארלאפענעם מוצ"ש תולדות לסדר ויתן לך אלוקים מטל השמים ומשמני הארץ ארויסגעלאזט פון שיכון סאטמאר אין בני ברק צום שטאט פתח תקוה צום מעמד האדיר "עתידתנו" - דינער און מגבית היסוד לטובת ישיבת מהרי"ט ד'סאטמאר בני ברק וואו עס זיצן און לערנען בהתמדה גדולה די טייערע בחורי חמד שיחיו פרחי קהלתינו הקדושה.

דער מעמד "עתידתנו" האט געצילט צו אנשליסן אנשי שלומינו אלץ שותפים נאמנים אין די הייליגע ישיבה, אנטקעגן צו קומען די מסירות נפש'דיגע הנהלה מיט אנסטראנאמישע סכומים און שטעלן א יסוד אדיר פאר דער עתיד פון די קהילה – די הייליגע ישיבה.

דער רייכער מעמד איז פארגעקומען אין א רייכן זאל אין פתח תקוה, וואו דער ציבור איז ווארעם אנטפאנגען געווארן דורך די געטרייע הנהלה און עסקני הישיבה וואס האבן מכבד געווען איש על מחנהו ואיש על דגלו. דער ציבור האט זיך געוואשן צו א רייכער סעודה לכבוד דוד מלכא משיחא ולכבוד התורה ולומדי' האבנדיג די זכי' צו ווערן שותפים נאמנים מיט די הייליגע ישיבה.

דער הערליכער אויבנאן איז באצירט געווארן דורך רבני קהילתנו, ובראשם מורינו הגה"צ ראש ישיבתינו שליט"א, ווען עס זעט זיך אן די חשוב'ע רמ"י הישיבה, כלי קודש, און ועד החינוך פון די הייליגע ישיבה.

ספעציעלע טישן זענען באצירט געווארן דורך די פני הקהילה - עלטערע אנ"ש וואס האבן זיך ספעציעל מטריח געווען צו קומען צופארן צום מעמד האדיר "עתידתנו" אלץ הכרת הטוב פאר די הייליגע ישיבה דער אכסניא של תורה פונעם אינגן דור.

דורכאויס דער מעמד האבן מהנה געווען מיט רייכע פרקי שיר ושבח די טאלאנטפולע זינגער פון די בארימטע "נשמה" קאפעליע, אינאיינעם מיטן בעל מנגן נפלא הר"ר משה דוד ווייסמאנדל הי"ו, באגלייט דורך דעם טאלאנטפולן ילד הפלא כמר בנציון קלעצקין נ"י.

דער יו"ר המעמד פה מפיק מרגלית הרה"ג רבי יחזקאל טויסיג שליט"א האט מייסטערהאפטיג אנגעפירט דעם מעמד בטוב טעם ודעת און מהנה געווען דעם ציבור מיט בליציגע רעיונות. עס זענען געהערט געווארן רייכע דרשות דורך: הגה"ח רבי מתתי' שטיגל שליט"א מנהל רוחני פון די ישיבה וואס האט געשילדערט וואס עס שפילט זיך אפ טעגליך אין די ישיבה וואו עס ווערן נתחנך די תלמידים הגונים, ער האט ספעציעל ארויסגעברענגט דעם מציאות אז די בחורי חמד זעלבסט איבערראשן די הנהלה רוחנית מיט זייער געהויבענע התנהגות בהתמדת התורה ויראת שמים ועוד. 

הרב זלמן לייב וואלדמאן שליט"א ראש הקהל וואס האט דערציילט איבער די היסטאריע פון די התייסדות הישיבה און איבער די מסירות נפש פון די הנהלת הישיבה. 

הר"ר שמעון דוד דאווידאוויטש הי"ו יו"ר ועד קרן הבנין האט בהתרגשות אויסגערופן דעם מסירות נפש'דיגן עסקן נמרץ הר"ר שלמה יודא קליין הי"ו מראשי עסקני הישיבה. הר"ר שלמה יודא הי"ו האט מיט הרגשים געשילדערט די ארבעט פון די הנהלה וואס אינוועסטירט לילות כימים למען הישיבה, און אביסל געשילדערט די שווערע כוחות מיט געלט און שווייס וואס מען לייגט אריין אז די תלמידי הישיבה זאלן קענען שטייגן ברוחניות און עס זאל זיי גארנישט פעלן בגשמיות - אם אין קמח אין תורה.

צום הויכפונקט האט מען געהערט די משא המעמד דורך מורינו הגה"צ ראש ישיבתינו שליט"א וואס האט בהקדמה פון דברי תורה וחסידות בגודל מעלת לימוד התורה וצדקה ללומדי תורה - מרחיב הדיבור געווען בהתרגשות איבער די ישיבה הק' דער פערטער דור וואס ווערט נתחנך מיט די הייליגע השקפה פון רבותיה"ק. דער ר"י האט ספעציעל ארויסגעברענגט די זכי' אז די בחורים לערנען אין א היימישע ישיבה וואס איז א מגן ומחסה פאר זיי סיי מיטן עצם לערנען בצוותא מיט ערליכע חברים און סיי מיטן ניצל ווערן פון הערן די סארט שפראך וואס מען רעדט אין אנדערע מקומות אנדערש ווי אונז האבן געלערנט - נאכדערצו אין אזא זמן מלחמה צווישן די ציונים און די אראבער. דער ר"י האט הארציג באדאנקט די הנהלה רוחנית און די הנהלה גשמי און ווארעם געווינטשן אלע אנ"ש וואס וועלן נעמען א חלק אין די ישיבה.

צווישן די רייכע דרשות זענען געהערט געווארן הערליכע גראמען מייסטערהאפטיג אראפגעזינגען צו ארויסברענגען פארן ברייטן ציבור די הערליכע פירות פון די הייליגע ישיבה.

ווי אומגלויבליך עס הערט זיך איז ביי דער מעמד האדיר געשאפן געווארן דער אנסטראנאמישער ציפער פון "צוויי אין האלב מיליאן שקל" דורך דעם ברייטן ציבור וואס האט אויסגעדרוקט סאלאדאריטעט מיט די מסירות נפש'דיגע הנהלת הישיבה און די איבערגעגעבענע שטאב פון ישיבה וואס שטעלן אויף דעם קומענדיגן דור מיט אזא מסירות נפש. מיט א זעלטענער אש קודש האט דער ציבור אונטערגעשריבן "שטרות" צו תורם זיין מדי חודש בחודשו ריזיגע סכומים למען הישיבה הק' ווען די קאלאסאלע סומע וואס שטעלט זיך צוזאם איז "צוויי אין האלב מיליאן שקל" אויפן פלאץ, און אין די נאכפלגנדע טעג הייבן זיך די נדבות אויך ביי נאך און נאך אנ"ש וואס שליסן זיך אן אינעם פייער צו שטיצן די ישיבה ביד רחבה.

די אומגלויבליכע הצלחה פונעם מעמד האדיר "עתידתנו" האט בלי ספק געשטעלט א פעלזן פעסטער יסוד פאר די הייליגע ישיבה און בעז"ה פארזיכערט דער 'עתיד' פון קהילתינו הק' אוועקשטעלנדיג די ישיבה אויף די ריכטיגע רעלסן צו קענען אנגיין ווייטער ביתר שאת וביתר עוז.

ברוך שנתן תורה לעמו ישראל.