זעלטן חידוש'ליכע 'חתונה פלאן' פראקלאמירט בק"ק באבוב!

דעם נאכט, ביי א היסטארישע מעמד בהתאסף קהלא קדישא באבוב בביהמ"ד הג', האט מען געשריבן היסטאריע מיט א נייע 'חתונה פלאן' וואס וועט ערמעגליכן יעדעם איינעם, אין יעדע פינאנציעלע מצב, צו קענען חתונה מאכן אן דעם 'געלט דאגה' אויפן קאפ.

ווי די באקאנטע עסקן ר' יחזקאל ראזענבערג האט געעפענט דעם אסיפה, אז מיט זעקס חדשים צוריק, ווען מ'האט זיך געגרייט צו פארענדיגן די נייע חתונה זאלן 'אהלי פרידא' בבנין הת"ת החדש, האט רבינו שליט"א ממנה געווען בנו הגדול הרה"צ רבי חיים שלום שליט"א צוזאמצונעמען א וועד און אהערשטעלן א פולקאמע נייע חתונה פלאן מ'זאל קענען חתונה מאכן גרינגערהייט אן דעם באקאנטע פראגע 'כסף מנלן'.

אצינד האלט מען נאך חדשים פון ארבעט און שווערע כוחות, און די נייע פלאן איז פראקלאמירט געווארן!

דעם נייעם פלאן ענהאלט אין זיך עטליכע דעטאלן וויאזוי צו שניידן די הוצאות און אראפברענגען דעם חתונה פרייז פון בערך 100 טויזענט דאלער צו האלב (אריינגערעכנט מבטל זיין מסיבת תנאים, שבת אויפרויף סעודות, און חתונה מאכן פאר בלויז 16 טויזענט דאלער הכל בכל מכל אינעם אהלי פרידא זאל), און די קהילה האט אויפגעשטעלט א גמ"ח וואס וועט געבן פאר אלע וואס ווערן א טייל דערפון ביז 40 טויזענט דאלער (!!!), און די קרן חתנים/אור חיים (פאר כלות) געבן די איבריגע 10-15 טויזענט ווי ביז היינט.

די גמ"ח איז אוועקגעשטעלט געווארן גאר גרינג, ממש געציילטע הונדערט דאלאר א חודש, און עס קען זיך נישט אנזאמלן מער ווי 2-3 קינדער אויפאמאל. אויב מ'מאכט חתונה מער ווי דעם, באקומט מען דעם ריזן הלואה אבער מ'וועט ערשט אנהייבן צאלן די תשלומין ווען די פריעדיגע ענדיגן זיך.

לויט דעם נייעם פלאן, וועט מען אנשטאטס דארפן יעדער יאר-צוויי הונדערט אלפים חתונה צו מאכן, דארפן בלויז צאלן עטליכע הונדערט דאלאר א חודש פארן הלואה, וזהו!