בסייעתא דשמיא

טויזענטער אידן שלומי אמוני ישראל תושבי עיר מאנסי והגלילות, ובראשם פילע אדמור"י ורבני העיר שליט"א האבן דעם פארלאפענעם מוצאי שבת קודש פרשת בא איבערגעפולט די פראכטפולע ווילחאוויץ זאלן אין צענטער פון שטאט מאנסי, און אנטייל גענומען בגוף ובממון ביים גייסטרייכן דינער "א נאכט מיט רבי מאיר", לטובת די אור אלטע מסורה'דיגע צוועק, צדקת רבי מאיר בעל הנס - כולל חיבת ירושלים.

די מלוה מלכה איז געווען געווידמעט לזכר ולעילוי נשמתו הטהורה פון די זקן אדמור"י וצדיקי עיר מאנסי ממשיך מסורת אבותיו הק' כ"ק אדמו"ר משינאווא זצוק"ל, שטייענדיג נאך אינעם שנת האבילות להסתלקותו, און מיט טרעפליכע הערליכע דברי זכרון ומסורת הדורות האט אויפגעטרויטן בנו ממלא מקומו כ"ק אדמו"ר משינאווא שליט"א ווי ער האט דערביי אויך איבערגעגעבן ווארימע ברכת הקודש פון זיין גרויסע שווער כ"ק אדמו"ר מפשעווארסק שליט"א נשיא הכולל באירופה.

א רייכע סעודה איז סערווירט געווארן לכל הקהל הקודש, באגלייט מיט א מוזיקאלישע פארברענג ווי מ'האט ארומגעשמועסט איבער פארצייטישע פארגעסענע ניגונים פון די צדיקים הקודמים זי"ע, בשעת מ'איז מהנה דער עולם מיט די שירי קודש, דורך דער טאלאנטפולער בעל מנגן לבית באבוב הרב החסיד ר' מרדכי וואלף לאנדא, אינאיינעם מיט די געשמאקע וויזניצע קאפעליע פון היימישע אינגעלייט, און אנגעפירט דורך דער באקאנטער חוקר בעניני נגינה הרב דוד מאיר רוס יושב ראש מכון שירי דוד.

טראצדעם וואס די זאל איז געווען אויסגעשטעלט אויף די גרעסטע פארנעם שייך צו קענען אריינעמען דעם פילקעפיגער עולם, איז די גאנצע זאל געווען איבערגעפולט מלא על כל גדותיו, צוליב די ריזן פלייץ פונעם ציבור המשתתפים במשך הלילה, און א באזונדערע שאטער איז אויפגעשטעלט געווארן נעבן די זאל וואס זאל דינען אלס פארצימער איידערן אריינקומען אין זאל.

ספעציעלע מתנות זענען פארטיילט געווארן פאר די חשובע תומכים, און גאר ווערדפולע גאלדענע און זילבערנע חפצים פאר די גרעסערע נדיבים.

א הערליכע הויכשטאקיגע בימת הכבוד האט באשיינט די אויבנאן פונעם זאל, ווי עס זענען זענען געזעצן אויסגעשורה'ט מערערע גדולי הדור, אדמור"י ורבני העיר, דיינים ראשי ישיבות ומרביצי תורה שליט"א וואס האבן איבערגעפילט דעם אויבנאן און ארויסגעוויזן זייער הערצה און שטיצע פאר דעם הייליגע'ן צדקה.

דער מייסטער אנפירער און יושב ראש הרב מאיר מרדכי בערקאוויטש מתושבי העיר האט אנגעפירט די גאנצע מעמד מיט אן הילכיגע שטימע און קאלירפולע רעדע, דער געטרייע מנהל הכולל הרב ישכר בעריש רובין האדמו"ר מדאמבראווא האט איבערגעגעבן דעם 'דבר רבי מאיר' און א גריס מהנעשה והנשמע אונטער די קוליסן אין דעם מאסיווע אפאראציע פון כולל חבת ירושלים.

אלס אורח הכבוד האט אויפגעטרעטן כ"ק אדמו"ר מסטוטשין שליט"א, וועלכער האט אויפגעפלאמט מיט א אש קודש אלע הערצער מיט גאר ווארימע און הארציגע דיבורים איבער די געוואלדיגע סגולה פון דעם צדקה און וואו עס איז געווען קודש קדשים ביי אלע פריערדיגע צדיקים כידוע, צו שטיצן עניי ארץ הקודש לצדקת רבי מאיר בעל הנס.

די פרס 'חבת ירושלים תנו כבוד התורה' איז געשאנקען געווארן פאר הרב הגאון ר' נפתלי צבי מייזליש שליט"א איידעם ביי כ"ק הגה"צ גאב"ד סאטמאר מאנסי שליט"א, און פאר הרב הגאון ר' שמואל קאליש שליט"א מדייני קהילה קדושה בעלזא.

ספעציעלע פרסים און תעודות זענען געגעבן געווארן פאר די חשובע גבאי קודש און עסקני הקופה, איבערהויפט די 'נזר נחלת אבות' פאר העסקן הנמרץ ר' משה פריעזעל הי"ו, און פאר האברך החשוב הנגיד ר' יששכר דוב טעסלער הי"ו          און מיט נזר גבאות קודש איז באקרוינט געווארן בנש"ק הרב מנשה וואגשאהל שליט"א נכדו חביבו פון כ"ק אדמו"ר משינאווא זצוק"ל וואס די דינער איז געווען לז"נ הטהורה, און ווי אויך אפאר חשוב'ע גבאי קודש, הרב הערשל טויבער שליט"א נכד הרה"ק בעל דברי שלמה מבאבוב זצוק"ל מרביץ תורה בק"ק באבוב, מוה"ר יחיאל צבי שטוקמאן הי"ו מחשובי ק"ק בעלזא און מוה"ר יעקב קעלנער הי"ו גבאי נאמן ביהמ"ד נועם יעקב דחסידי פשעווארסק.

צום שלוס פונעם דיננער איז געווען דערהויבענע מאמענטען ווען מ'האט פארקויפט די זכות ברכת המזון אויף א הייליגע בעכער וואס איז אריבערגעגאנגען מדור דור, דריי דורות פון צדיקים, די בעכער פון הרה"ק ר' מאטל'ע הארנסטייפלער זצוק"ל, וואס איז דערנאך אריבערגעגאנגען צו זיין איידעם הרה"ק ר' שלום אליעזר'ל פון ראצפערט און דערנאך צו זיין איידעם הרה"ק בעל קדושת ציון מ'באבוב זכותם יגן עלינו, די זכות איז פארקויפט געווארן פאר א גרויסע סכום, און מיטן בענטשען איז מכובד געווארן הרה"ג ר' נפתלי צבי מייזליש שליט"א חתן הגה"צ גאב"ד סאטמאר מאנסי שליט"א, מקבל פרס 'חבת ירושלים תנו כבוד התורה', און די עולם איז אריבער מקבל זיין כוס של ברכה פון דעם הייליגען בעכער.

די ריזן ציבור האט פארלאזט דעם זאל נאך א הערלכיע פראגראם, און אהיימגענומען פילע שיינע מתנות, ועל כולם די פילע ברכות וסגולות עד אין שיעור וערך פון שטיצן דעם הייליגען מסורה'דיגן קופה כולל חבת ירושלים לצדקת ר' מאיר בעל הנס

אלקא דמאיר עננו!