כוטהי באליסטישע מיסיל קראכט און פאלט אראפ סעקונדעס נאכן ווערן ארויסגעשאסן אין תימן


א באליסטישע מיסיל וואס איז ארויסגעשאסן געווארן דורך די איראן-געשטיצטע כוטהי טעראריסטן אין תימן, האט געליטן א קאטאסטראפאלע דורכפאל און געקראכט בלויז עטליכע סעקונדעס נאכן ווערן ארויסגעשאסן.


אין א ווידעא וואס צירקולירט אויף די סאציאלע נעצן, קען מען זען ווי די מיסיל ווערט ארויסגעשאסן פונעם 'מיראב' בארג אין די טאיז פראווינץ, און באלד דערויף זעט מען א ריזיגע וואלקן פון רויך, בשעת שטיקער פונעם צעקראכטן מיסיל פליען אראפ אויף די באוואוינטע געגנטער ארום. דער טעכנישער דורכפאל האט פאסירט גלייך אין די ערשטע פאזע פונעם פלי, וואס צייגט אויף די טעכנישע פראבלעמען און ריזיקעס וואס די כוטהיס האבן מיט זייערע פארברייטערטע מיסיל און דראון אפעראציעס.


די איראן-געשטיצטע כוטהיס האבן שוין אומצאליגע מאל ארויסגעשאסן באליסטישע מיסילס און דראונס פון די געגנטער אונטער זייער קאנטראל, צילנדיג סיי די תימן'ער רעגירונג פאזיציעס און סיי אינטערנאציאנאלע קאמערציאלע שיפן אינעם רויטן ים. די טאיז פראווינץ ווערט אפט באנוצט אלס אן ארויסשיס ארט פאר די אטאקעס. כאטש וואס די ספעציפישע מיסיל האט נישט דערגרייכט איר ציל, האט דער דורכפאל אריינגעלייגט די ארטיגע ציווילע איינוואוינער אין אן ערנסטע סכנה, און עס צייגט נאכאמאל די געפאר פון אפערירן מיט אזעלכע מאכטפולע וואפן צווישן ציווילע מענטשן, ווען א דורכפאל קען פירן דערצו אז שטיקער זאלן פאלן אויף די לאקאלע איינוואוינער וואס לעבן אונטער די כוטהי הערשאפט.


די כסדר'דיגע מיסיל אקטיוויטעטן זענען א טייל פון א ברייטערע איראנע טעראר קאמפיין וואס סטראשעט די סטאביליטעט אינעם ראיאן, די גלאבאלע שיפס אינדוסטריע, און די זיכערהייט פון אמעריקע'ס אליאירטע, אריינגערעכנט ארץ ישראל און די גאלף לענדער. אפילו ווען אן ארויסשיס פאלט דורך, שטרייכט עס אונטער דעם פאקט אז די כוטהיס זענען גרייט צו שיסן באליסטישע וואפן פון ציווילע געגנטער, אן קיין טראפ רחמנות אויף די לעבנס פון זייערע אייגענע בירגער און אן זיך רעכענען מיט אינטערנאציאנאלע געזעצן. די טעכנישע דורכפעלער טוען אבער נישט פארמינערן די אלגעמיינע סכנה פון דעם ריזיגן וואפן ארסענאל וואס ווערט פינאנצירט און סופלייט דורך טעהראן.


אינצידענטן ווי דאס דינען אלס א דערמאנונג אז די כוטהי מיסיל פראגראם בלייבט אן ערנסטע געפאר, כאטש עס איז ווייט פון פערפעקט. עקספערטן זאגן אז עס פאדערט זיך א קעסיידערדיגע דרוק אויף די טעראר גרופע און אויף זייערע איראנע באלעבאטים, צו רעדוצירן די ריזיקע פון סוקסעספולע אטאקעס קעגן ציווילע און קאמערציאלע צילן. ווילאנג די כוטהיס פארמאגן די מעגליכקייט און דעם ווילן צו שיסן אזעלכע וואפן, וועט דער ראיאן ווייטער שטיין אויסגעשטעלט צו אומסטאביליטעט און די כסדר'דיגע מעגליכקייט פון אן עסקאלאציע.