טראמפ אדמיניסטראציע גרייט זיך צו אן "עקאנאמישע די-דעי" קעגן איראן; טעהראן סטראשעט צו בלאקירן אויל עקספארטן


די טראמפ אדמיניסטראציע גרייט זיך אונטערצונעמען א מאסיווע נייע עקאנאמישע אפענסיווע קעגן איראן, אין א פרואוו צו פארשטייפערן דעם פינאנציעלן שטריק ארום טעהראן. דער טרעזשערי סעקרעטאר, סקאט בעסענט, האט אראפגעמאלן דעם קאמפיין אלס אן "עקאנאמישע די-דעי" (D-Day), וואס צייגט אז די אדמיניסטראציע פלאנט צו גיין פיל ווייטער ווי בלויז געווענליכע סאנקציעס, און וועט זיך נעמען איבער די פינאנציעלע נעצן וואס האלטן אויף די איראנער עקאנאמיע און דעם רעזשים.


די שריט קומט אין א צייט וואס אמעריקע זוכט אפצוהאקן די לעבנס-וויכטיגע פינאנציעלע רערן, נאכדעם וואס זיי האבן געמאלדן אז איראן'ס מיליטערישע מעגליכקייטן און נוקלעארע פראגראם זענען שוין שטארק צובראכן געווארן.



איראן אין א טיפע קריזיס


דער פרישער דרוק קומט אין א צייט וואס איראן פלאגט זיך מיט א טיפע עקאנאמישע קריזיס, ווען זייער וואלוטע - דער ריאל - איז געפאלן צו היסטארישע נידריגע שטאפלען, און דאס לאנד ליידט פון די קאמבינירטע עפעקטן פון מלחמה, סאנקציעס און א געשטערטע האנדל.


איראנער באאמטע האבן געסטראשעט אפצושטעלן אויל עקספארטן דורכ'ן הארמוז דורכגאס (Strait of Hormuz) - איינע פון די וועלט'ס מערסט סטראטעגישע ענערגיע דורכגענג - אויב אויסלענדישע רעגירונגען וועלן קאאפערירן מיט'ן אמעריקאנער קאמפיין. טעהראן האט געווארנט אז לענדער וואס וועלן ארויסהעלפן אמעריקע מיט דעם דרוק, וועלן באטראכט ווערן אלס אנטיילנעמער אין אן עקאנאמישער מלחמה, וואס ברענגט ארויף די מעגליכקייט פון א פיל ברייטערע קאנפראנטאציע.



פלאטע-בלאקאדע און מיליטערישע אנוועזנהייט


וואשינגטאן'ס סטראטעגיע קומט אויך פאר אינאיינעם מיט אן אנגייענדע פלאטע-בלאקאדע וואס צילט צו באגרעניצן איראן'ס מעגליכקייט צו פירן סחורה און מאכן געלט. טראץ די אנגעצויגענע מצב, האבן אמעריקאנער באאמטע אנגעוויזן אז קאמערציאלע שיפן פארן נאך אלץ דורכ'ן דורכגאס, וואס צייגט אז געוויסע שיפס-פארקער איז נאך מעגליך אפילו ווען די זיכערהייט סיטואציע איז גאר אומסטאביל. די אדמיניסטראציע האפט אז דאס קאמבינירן פינאנציעלע באגרעניצונגען מיט דרוק אויפ'ן וואסער, וועט צווינגען טעהראן זיך צו ספראווען מיט עקאנאמישע קאנסעקווענצן וואס זיי קענען שוין נישט אזוי גרינג אויסמיידן.


אין דער זעלבער צייט גייט די אמעריקאנער מיליטער אדורך א גרויסע טראנזיציע אינעם ראיאן. די "יו-עס-עס עיברעהעם לינקאלן" עירקרעפט קעריער פארלאזט דעם מיטל מזרח נאך אן אויסערגעווענליכע מיסיע וואס האט זיך געצויגן פאר מער ווי ניין חדשים, אינדערצייט וואס די "יו-עס-עס דזשארדזש וואשינגטאן" איז אנגעקומען אינעם ראיאן איבערצונעמען די פאזיציע, כדי צו האלטן דעם דרוק אויף איראן. די טויש אין די קעריערס צייגט אז דער עקאנאמישער קאמפיין קומט נישט פאר אין א וואקיום, נאר אינאיינעם מיט א שטארקע אמעריקאנער מיליטערישע אנוועזנהייט וואס איז געצילט צו פארשטארקן די ברייטערע סטראטעגיע.



וואס וועט זיין די ענדע?


די גרעסטע פראגע יעצט איז, צי וואשינגטאן'ס עקאנאמישע אפענסיווע וועט צווינגען איראן צו קומען צום פארהאנדלונגס-טיש, אדער וועט עס שטיפן די קאנפראנטאציע צו א פיל מער געפארפולע פאזע. אויב עס וועט זיך איינגעבן פאר אמעריקע איבערצוצייגן אויסלענדישע רעגירונגען, בענק, שיפינג קאמפאניס און ענערגיע הענדלער זיך דערווייטערן פון טעהראן, קען איראן אויסשטיין פיל שווערערע פראבלעמען צו האבן צוטריט צו געלט און אינטערנאציאנאלע מארקעטס. אבער אויב טעהראן וועט רעאגירן מיט'ן פארשטארקן זייערע סטראשונגען קעגן שיפן, אדער פרובירן צו שטערן דעם פלוס פון ענערגיע דורכ'ן הארמוז דורכגאס, קען די עקאנאמישע קריגעריי זיך גאר שנעל פארוואנדלען אין א פיל גרעסערע קריזיס מיט קאנסעקווענצן וואס וועלן זיך שפירן ווייט איבער איראן'ס גרעניצן.