דזשעי-פי מארגען ווארנט: א גלאבאלע שפייז קריזיס קען אויסברעכן אין יאר 2027


די באקאנטע 'דזשעי-פי מארגען' באנק האט ארויסגעגעבן א שארפע ווארענונג איבער א מעגליכע גלאבאלע שפייז קריזיס וואס קען פאסירן אין יאר 2027, פאראויסזאגנדיג אז די אינפלאציע אויף עסנווארג וועט ארויפשיסן צו 5 פראצענט אנהייב יענעם יאר.


די פרישע שאצונג, וואס איז ארומגערעדט געווארן אויף 'פאקס ביזנעס' דעם 25'סטן אוגוסט, צייגט א דראסטישע שפרונג פונעם 2.8 פראצענט ראטע וואס ווערט ערווארטעט אין 2026. דערווייל האלט די שפייז אינפלאציע אין אמעריקע ביי ארום 3 פראצענט, און אגריקולטור סטאקס ווייזן שוין צייכנס פון שוואכקייט.


אין א באריכט אונטערן נאמען "שפייז זיכערהייט איז נאציאנאלע זיכערהייט", ווייזן די אנאליסטן אן אויף א צוזאמשטעל פון קלימאט טוישונגען און געא-פאליטישע אנגעצויגנקייטן וואס קענען שטערן די סופליי טשעין און ארויפטרייבן די פרייזן.



וועטער און מלחמות


א הויפט ריזיקע וואס די באנק ברענגט ארויס איז די מעגליכקייט פון א "סופער על ניניא" וועטער ערשיינונג, וואס קען אנגרייפן די הויפט ראיאנען וואו מען פלאנצט תבואה. היסטאריש האבן אזעלכע וועטערס שטארק רעדוצירט די גערעטעניש און געברענגט א כאאס אין די פרייזן אויפן גלאבאלן מארקעט.


אין דער זעלבער צייט, זענען דא ערנסטע זארגן איבער די ענערגיע סופליי צוליב די אנגעצויגנקייטן מיט איראן. א גרויסע טייל פון די וועלט'ס פוירטעלייזער (מיסט צו פלאנצן) פארט דורך די 'הארמוז דורכגאס', א שמאלע וואסער-וועג וואס איז יעצט אונטער א געא-פאליטישע פראבלעם. יעדע לענגערע שטערונג דארט קען הייבן די קאסטן פאר פלאנצערס און רעדוצירן די קומענדיגע גערעטענישן.



קיין רעזערוון פאר פוירטעלייזער


דער באריכט לייגט א ספעציעלע דגוש אויף 'נייטראדזשין פוירטעלייזער'. אנדערש ווי אויל, וואס רוב לענדער האבן אן עמערדזשענסי רעזערוו דערפאר, עקזיסטירט נישט קיין שום סטראטעגישע רעזערוו סיסטעם פאר פוירטעלייזער. דאס מיינט אז אויב די סופליי ווערט אפגעשטעלט אפילו פאר א קורצע צייט, זענען די פלאנצערס און די גאנצע אגריקולטור סיסטעם גאר שטארק אויסגעשטעלט צו א מאנגל.


די צוזאמשטעל פון די אלע פראבלעמען — וועטער פראבלעמען אינאיינעם מיט א מאנגל אין פוירטעלייזער — קען ארויפטרייבן די פרייזן פיל העכער ווי יעדע פראבלעם באזונדער. דזשעי-פי מארגען ווארנט אז פאליטישאנס און מארקעט פירער מוזן אנהייבן אנקוקן די שפייז סיסטעם אלס א סטראטעגישע אישו, ספעציעל אין א צייט וואס אינפלאציע איז שוין ממילא א סענסיטיווע טעמע פאר קאנסומערס.


מיט די פאראויסזאגונג פון א 5 פראצענטיגע אינפלאציע אין 2027, איז די אויפמערקזאמקייט יעצט געוואנדן צו זען צי די רעגירונגען און די אינדוסטריע וועלן נעמען שריט צו פארשטארקן די סופליי קייטן און זיך גרייטן צום קומענדיגן קריזיס בעוד מועד.