היסטאריש: פרעזידענט טראמפ מעלדט דעם "גרעסטן אויל אפמאך אין די וועלט'ס היסטאריע" מיט ווענעזועלע

פרעזידענט טראמפ האט געמאלדן וואס ער רופט אן אלס דער גרעסטער אויל דיעל אין די וועלט'ס היסטאריע, אנטפלעקנדיג אן אפמאך מיט ווענעזועלע וואס קען אריינברענגען אזוי סאך ווי 100 ביליאן דאלאר אין אינוועסטמענטס אויפצולעבן דאס לאנד'ס צופאלענע ענערגיע סעקטאר. לויט די דעטאלן וואס זענען ארויסגעגעבן געווארן דורך ביידע רעגירונגען, גיט דער דיעל פאר א ניי-געגרינדעטע פריוואטע קאמפאני קאנטראל איבער 65 ביליאן פאסן פון ווענעזועלע'ס אויל רעזערוון, צעשפרייט איבער 17 פעלדער, דורכאויס א 100-יעריגע אנטוויקלונג אפמאך.

טראמפ האט געזאגט אז דער אפמאך איז אויסגעהאנדלט געווארן דורך סעקרעטערי אוו סטעיט מארקא רוביא און דיפענס סעקרעטערי פיט העגסעט, וועלכע האבן געארבעט דירעקט מיט ווענעזועלע'ס אקטינג פרעזידענט, דעלסי ראדריגעז. דער פרעזידענט האט ארויסגעברענגט אז דער דיעל וועט מער ווי דאפלען אמעריקע'ס אויל רעזערוון און וועט דראסטיש נידערן די געז פרייזן פאר אמעריקאנער קאנסומערס.

לויט אן אמעריקאנער באאמטער וואס איז באקאנט מיט די דעטאלן, וועט די נייע פריוואטע קאמפאני באקומען ארום 55 פראצענט קאנטראל אויף די פראדוקציע, אריינגערעכנט די רעכט צו קויפן אויל פאר ביליג. אויב דאס גייט טאקע צושטאנד קומען אויף אזא פארנעם, וועט די קאמפאני ווערן די צווייט-גרעסטע קארפאראציע אין די וועלט וואס פארמאגט אויל רעזערוון, קומענדיג גלייך נאך 'סאודי אראמקא'. די ראדריגעז רעגירונג האט אראפגעלייגט דעם אפמאך אלס א קריטישע שריט צו עקאנאמישע ערהוילונג, מיט שאצונגען אז עס קען עווענטועל אריינברענגען מער ווי 209 ביליאן דאלאר אין טעקס רעוועניו פאר קאראקאס, און שאפן אסאך נייע דזשאבס אין ווענעזועלע'ס אויל אינדוסטריע. דער דיעל קומט אין א צייט וואס ווענעזועלע זיצט אויף ריזיגע, אומאנטוויקלטע רעזערוון, וואס שטעלט פאר ארום א פינפטל פון די וועלט'ס באקאנטע אויל סופליי.

די מעלדונג קומט קוים ניין חדשים נאכדעם וואס אמעריקאנער קרעפטן, אונטער טראמפ'ס דירעקטע פארארדענונג, האבן געכאפט דעם דעמאלטדיגן פרעזידענט ניקאלאס מאדורא און אים געברענגט קיין אמעריקע צו שטיין א פראצעס אויף פעדעראלע דראג טראפיקינג קלאגעס. זינט דעמאלט האבן וואשינגטאן און קאראקאס אנגעהויבן א נייע קאפיטל אין זייערע באציאונגען, ווען די אינטערים רעגירונג אין ווענעזועלע האט געעפנט דאס לאנד'ס אויל אינדוסטריע פאר פיל מער פריוואטע און אויסלענדישע אינוועסטמענטס.

רעפובליקאנער געזעצגעבער האבן שטארק אויסגעלויבט דעם שריט, און טייל האבן עס אנגערופן א "היסטארישע געווינס" וואס בענעפיטירט ביידע לענדער און שטעלט אפ דעם פלוס פון ביליגע ווענעזועלע אויל קיין כינע. דעמאקראטישע קריטיקירער, פון די אנדערע זייט, האבן אויפגעברענגט פראגעס איבער די לעגיטימקייט פונעם דיעל, טענה'נדיג אז דאס אראפווארפן מאדורא פון מאכט איז געווען אויסגערעכנט פון פאראויס פונקטליך פאר דעם ציל צו מאכן אזא סארט אפמאך.

אבער אריבער די פאליטישע דעבאטעס, בלייבן נאך אלס ערנסטע פראגעס איבער ווי שנעל - אדער צי בכלל - דער אמביציעזער פלאן קען ווערן אויסגעפירט למעשה. קיין פולע טעקסט פונעם אפמאך איז נאכנישט ארויסגעגעבן געווארן פארן פובליק, און וויכטיגע דעטאלן ווי למשל וועלכע פריוואטע קאמפאני וועט אנפירן דעם פראדזשעקט, ווי שנעל מ'קען אנהייבן גראבן, און ווער עס וועט פינאנצירן די נויטיגע אינפראסטרוקטור, זענען נאך אומקלאר. עקאנאמיסטן האבן אויך ארויסגעברענגט ספיקות צי ראדריגעז האט בכלל די לעגאלע רעכט צו פארפליכטן ווענעזועלע צו א 100-יעריגע דיעל פון אזא פארנעם, און גרויסע אויל קאמפאניס קענען זיין צוריקגעצויגן פון אריינגיין דערין צוליב די פאליטישע אומסטאביליטעט אינעם לאנד. דערצו איז ווענעזועלע'ס אויל אינפראסטרוקטור שטארק פארנאכלאזט געווארן נאך יארן פון נישט אריינלייגן קיין געלט דערין, וואס מיינט אז אפילו מיט די גרעסטע אינוועסטמענטס, וועט נעמען יארן - און נישט בלויז חדשים - צוריקצומאכן דאס לאנד אלס א הויפט גלאבאלע אויל סופלייער.