בס"ד


איראנער פירער רופט פאר אראבישע פאראייניגונג אין שאטן פון שווערע אמעריקאנער סאנקציעס


אין א זעלטענע געשריבענע סטעיטמענט, האט דער העכסטער איראנער פירער, מודזשטאבא כאמענעי, גערופן אלע מוסולמענישע לענדער, און בפרט די גאלף לענדער, צו לייגן אין א זייט אלע חילוקים און זיך פאראייניגן קעגן זייער "עכטע פיינט". די מעסעדזש, וואס איז ארויסגעלייגט געווארן אויף זיין טעלעגראם אקאונט אפצוצייכענען די אזוי-גערופענע "איסלאמישע פאראייניגונג וואך", האט גערופן פאר קאאפעראציע צווישן די אראבישע לענדער אין פארשידענע געביטן, אריינגערעכנט געמיינזאמע פארטיידיגונג.


כאמענעי האט געווארנט אז ווער עס מאכט גרעסער די צעטיילונג צווישן מוסולמענער, צו ס'איז במזיד אדער בשוגג, דינט די אינטערעסן פון זייערע פיינט. ער האט אנגעוויזן מיט א פינגער פרעגנדיג: "וואלטן די פאלעסטינער געבליבן אזוי שוואך און אומבאהאלפן ווען די גאנצע מוסולמענישע וועלט שטייט ווען פאראייניגט?" די טיימינג פון די מעסעדזש איז גאר אינטערעסאנט, קומענדיג אין א צייט וואס אמעריקע לייגט ארויף שווערע עקאנאמישע דרוק אויף איראן דורך א נייע מאסיווע סאנקציעס קאמפיין באקאנט אלס "אפעראציע עקאנאמישע אויסוואורף" (Operation Economic Outcast).


מאסיווע סאנקציעס און די בלוטיגע אטאקעס


די נייע קאמפיין, וואס איז אריינגעגאנגען אין קראפט ענדע אוגוסט, איז איינע פון די אגרעסיווסטע סאנקציעס וואס די טראמפ אדמיניסטראציע האט ארויפגעלייגט אויף איראן. עס צילט דעם לאנד'ס אויל עקספארט, שיפינג נעצן, און פינאנציעלע קאנאלן, מיט'ן ציל אפצוהאקן כמעט יעדע מעגליכע הכנסה פארן רעזשים. אמעריקאנער באאמטע האבן עס אראפגעלייגט אלס א גלאבאלע עקאנאמישע אפענסיווע צו אינגאנצן איזאלירן טעהראן און זיי צווינגען אויפצוגעבן זייערע נוקלעארע אמביציעס און מיליטערישע אקטיוויטעטן אינעם ראיאן.


די פרישע סאנקציעס קומען נאך א בלוטיגע קאפיטל אינעם ברייטערן קאנפליקט: א געמיינזאמע אמעריקאנער-מדינת ישראל לופט-אטאקע קאמפיין פריער דעם יאר, וואס האט אומגעברענגט דעם פריערדיגן העכסטן פירער, איאטאלא עלי כאמענעי, אינאיינעם מיט עטליכע פאמיליע מיטגלידער, וואס האט געפירט דערצו אז זיין זון מודזשטאבא זאל איבערנעמען די פירערשאפט.


א פירער אין באהעלטעניש


מודזשטאבא כאמענעי איז נאך נישט געזען געווארן אין פובליק זינט ער איז פארוואונדעט געווארן אין יענע זעלבע אטאקעס ארום זעקס חדשים צוריק. אנשטאט דעם נוצט ער געשריבענע און רעקארדירטע מעסעדזשעס צו קאמוניקירן מיט'ן איראנער פאלק און דעם ראיאן. זיין לעצטע מעסעדזש איז א המשך צו אן ענליכע רוף פאר פאראייניגונג וואס ער האט געמאכט בלויז עטליכע טעג פריער צו די איראנער אינערהאלב דאס לאנד, וואו ער האט געמאלדן אז ער האט פארבאטן סיי וועלכע אקטן וואס קענען שאטן די נאציאנאלע פאראייניגונג, און געפאדערט פון די באאמטע זיך צוריקצוהאלטן פון רעדעס וואס קענען שוואך מאכן דעם פובליק'ס מאראל.


אין זיין מעסעדזש ספעציפיש צו די גאלף פירער, האט ער געפרעגט צו זייערע לענדער'ס רייכטום און טעריטאריעס וואלטן געבליבן פארזיכערט פון אינדרויסנדיגע סטראשונגען אויב די איסלאמישע וועלט וואלט געווען פאראייניגט אונטער איין פאן - א קלארע דערמאנונג פון די לאנג-יעריגע אנגעצויגנקייט צווישן טעהראן און אירע אראבישע שכינים.


אנגעצויגנקייט אינעם ראיאן


די פרישע רוף קומט אין א גאר סענסיטיווע צייט פארן ראיאן. א פייער-אפשטעל אין אפריל און א שפעטערדיגע פארשטענדעניש-אפמאך אין יוני האבן קוים עפעס אויפגעטון צו בארואיגן די אנגעצויגנקייט פונעם קריג. די אראבישע גאלף לענדער קוקן שוין היסטאריש אן איראן'ס רעוואלוציאנערע רעטאריק און אמביציעס מיט גרויס פארדאכט, א פאקט וואס מאכט זייער שווער צו גלייבן אז אזא איסלאמישע פאראייניגונג וואס כאמענעי זוכט יעצט וועט צושטאנד קומען.


עס בלייבט אומקלאר צו זיין מעסעדזש וועט אויפכאפן ביי די גאלף פירער אדער עס וועט אויפגענומען ווערן מיט די זעלבע חשדות וואס באגלייט זייער באציאונג זינט די איסלאמישע רעוואלוציע אין 1979. וואס איז יא קלאר איז, אז איראן'ס נייע פירערשאפט - וואס אפערירט נאך אלס באהאלטנערהייט אונטער מאסיווע עקאנאמישע און מיליטערישע דרוק - פרובירט יעצט אראפצושטעלן דעם קאנפליקט אלס א ברייטערע קריג פאר די גאנצע מוסולמענישע וועלט, אנשטאט בלויז איראן'ס פריוואטע קריג.