בס"ד

דירעקטע מיליטערישע קלעפ צווישן אמעריקע און איראן; טראמפ לייגט ארויס פאלשע 'עי-איי' ווידעאו ווי איראנער אויל אינזל פליט אין דער לופטן


די אנגעצויגנקייט צווישן וואשינגטאן און טעהראן האט אויסגעבראכן אין אן אפענע מיליטערישע קאנפליקט זונטאג ביינאכט, ווען די צוויי לענדער האבן זיך געטוישט מיט דירעקטע אטאקעס צום ערשטן מאל אין וואכן. די אמעריקאנער 'סענטקאם' קאמאנד האט באשטעטיגט אז זיי האבן דורכגעפירט א "באגרעניצטע און פונקטליכע אטאקע" קעגן איראנער מינע-לייגן איינריכטונגען, און האבן חרוב געמאכט צוויי ארויסשיסערס אויפ'ן 'לאראק' אינזל אינעם הארמוז דורכגאס.


איראן האט רעאגירט גאר שנעל, ווען די רעוואלוציאנערע גווארדיע האט געמאלדן א נקמה-אטאקע מיט מיסילס אויף צוויי אמעריקאנער-פארבינדענע באזעס אין ירדן, זאגנדיג אז עס האט אנגעמאכט שווערע שאדנס. ירדן'ס מיליטער האט געמאלדן אז זיי האבן באוויזן אראפצושיסן עטליכע פון די פליענדיגע מיסילס, בשעת איראנער באאמטע האבן באריכטעט אז זיי האבן געליטן טויטפעלער פון די אריגינעלע אמעריקאנער אטאקע.


אינמיטן די עכטע פייער-אויסטוישן, האט פרעזידענט דאנאלד טראמפ צוגעגעבן א מאדנע דריי צו די געשיכטע, ווען ער האט ארויסגעלייגט אויף זיין 'טרוט סאושל' פלאטפארמע א ווידעאו וואס זעט אויס צו זיין געמאכט דורך 'עי-איי' (AI), וואס צייגט דראמאטישע אויפרייסן אויפ'ן איראנער 'כארג' אינזל. דער קעפשן צום ווידעאו האט בלויז געליינט: "כארג אינזל ווערט צעשמעטערט אויף פיצלעך!!!" די קליפ צייגט ווי א פילאט קוקט ארויס פון אן עראפלאן בשעת אן אויל פעלד אונטן פלאקערט אין פייער, נאכגעפאלגט מיט א צווייטע קליפ ווי א רייע מיסילס קראכן אריין אין א קאוסטעל אויל פאסילעטי. עס איז אינטערעסאנט אנצומערקן אז קיין שום אפיציעלע אמעריקאנער מיליטערישע סטעיטמענט האט נישט דערמאנט קיין אטאקע אויפ'ן כארג אינזל, און עס איז דערווייל אומקלאר צי טראמפ'ס קאמפיין האט פראדוצירט דעם ווידעאו אדער בלויז איבערגעלייגט פון אן אנדערע אקאונט.


די באהויפטונג האט שנעל געברענגט א רעאקציע פון איראנער באאמטע. כאמיד באווארד, דער הויפט פון די נאציאנאלע איראנער אויל פירמע, האט אוועקגעמאכט טראמפ'ס פאוסט אלס "לאכעדיג", און האט קלארגעשטעלט אז די אפעראציעס אויפ'ן כארג אינזל גייען אן ווי געהעריג אן קיין שום שטער. דער אינזל געפינט זיך ארום 400 מייל צפון-וועסט פונעם הארמוז דורכגאס, גאר ווייט פון וואו די עכטע אמעריקאנער אטאקע איז פארגעקומען. דאס האט געפירט טייל אנאליסטן צו שפעקולירן צי טראמפ האט זיך פשוט פארמישט צווישן דעם 'כארג' אינזל און דעם 'לאראק' אינזל, וואס איז געווען דער עכטער ציל פון די אמעריקאנער אפעראציע. ווי עס זאל נאר זיין, טראגט דער כארג אינזל א ריזיגע סטראטעגישע וויכטיגקייט, וויבאלד עס פראצעסירט קרוב צו 90 פראצענט פון איראן'ס אויל עקספארטן און איז דער הויפט זייל פאר טעהראן'ס שוואכע עקאנאמיע.


דאס איז נישט דאס ערשטע מאל וואס דער כארג אינזל ווערט א ציל-ברעט אין טראמפ'ס רעטאריק דורכאויס דעם ברייטערן קאנפליקט. ער האט שוין אין דער פארגאנגענהייט געסטראשעט איבערצונעמען דעם אינזל אינגאנצן, און אין מערץ האט ער געזאגט אז אמעריקע האט "טאטאל פארניכטעט יעדע מיליטערישע ציל" דארטן ביי א פריערדיגע רונדע פון אטאקעס. צי די זונטאגדיגע 'עי-איי' ווידעאו איז געווען געמיינט אלס א ווארענונג, א בלאף, אדער סתם פאליטישע רעטאריק, האט עס צוגעגעבן א פרישע שיכט פון צומישעניש צו אן אזוי-אויך אנגעצויגענע נאכט פון עכטע קאמפן. בשעת ביידע זייטן טוישן ווייטער קלעפ אינעם ראיאן, ווערט די ליניע צווישן עכטע מיליטערישע אנטוויקלונגען און פאלשע אנליין פראפאגאנדע אלס מער פארנעפלט.