נתניהו באזוכט מיליטערישע פאזיציעס אין עזה: "מיר קאנטראלירן 60 פראצענט פונעם פאס און מיר פלאנען עס צו פארברייטערן"


דער מדינת ישראל פרעמיער מיניסטער בנימין נתניהו האט דעם 2'טן סעפטעמבער אפגעשטאט א באזוך ביי א צה"ל פאסטן נעבן די אזוי-גערופענע "געלע ליניע" אין עזה, וואו ער האט ארומגעקוקט אויף די געגנט וואס איז גענצליך חרוב געווארן נאך קרוב צו דריי יאר פון מלחמה, שטייענדיג קעגן א לאנדשאפט פון איינגעפאלענע געביידעס און ברוכווארג.


אין ווידעא קליפס פונעם באזוך זעהט מען נתניהו אנגעטוהן אין מיליטערישע קליידונג צוזאמען מיט זעלנער אונטער קאמופלאזש נעצן, ווייזנדיג אויף די חורבנות אונטן בעת ער האט באקומען א באריכט פון די קאמאנדירן אויפ'ן פעלד. ער איז באגלייט געווארן דורך דעם טשיף אוו סטאף איל זמיר, דער הויפט פון די סאדערן קאמאנד יניב עשור, און דער קאמאנדיר פון די 7'טע ארמארד בריגאדע אלעד צורי. נתניהו האט זיך באצויגן צו זיי און צו די ארומיגע זעלנער אלס "העלדן".


דורכאויס דעם באזוך האט נתניהו קלארגעשטעלט די יעצטיגע פאזיציע פון מדינת ישראל אינעם ראיאן, זאגנדיג אז די מיליטער קאנטראלירט בערך 60 פראצענט פונעם עזה פאס און פלאנט צו פארברייטערן דעם קאנטראל נאך ווייטער. ער האט ארויסגעברענגט אז די אנגייענדע מיליטערישע אנוועזנהייט איז א טייל פון א כסדר'דיגע ארבעט צו עלימינירן טעראר סטראשונגען, זאגנדיג אז אפעראציעס פאר דעם צוועק קומען פאר "טאג טעגליך".


ער האט אויך באשטעטיגט אז די זעלנער פלאנען זיך נישט ארויסצוציען פון די "געלע ליניע", וואס איז די אומאפיציעלע גרעניץ וואס צייכנט אפ די יעצטיגע לימיט פון די טעריטאריע וואס צה"ל קאנטראלירט אינעווייניג אין עזה. די ווערטער זענען געקומען אלס א טייל פון א ברייטערע אפעראציאנעלע באריכט וואס האט אריינגערעכנט א שמועס איבער א הויכראנגיקער כאמאס פירער וואס איז לעצטנס געכאפט געווארן דורך די כוחות.


דער באזוך קומט אין די צייט וואס עס גייט אן א סענסיטיווע, פיל-פֿאזיגע פייער-אפשטעל פראצעס וואס האט זיך אנגעהויבן אנהייב יאר, נאכדעם וואס מען האט צוריקגעברענגט די איבערבלייבענישן פונעם לעצטן באקאנטן משכון. נתניהו האט שוין עטליכע מאל איבערגעחזר'ט אז קיין שום גרויסע ריקאנסטראקשען (איבערבוי) פראיעקטן אין עזה קענען נישט פאראויסגיין ביז כאמאס לייגט אראפ די געווער, א פאדערונג וואס די טעראר גרופע האט דערווייל אפגעווארפן טראץ אן אמעריקאנער פארשלאג וואס האט געזאלט ברענגען אן ענדע צום קריזיס. ביים באזוך ביים פאסטן האט ער נאכאמאל איבערגעזאגט זיין שטעלונג, אנווייזנדיג אז דאס אנעמען די געווער פון כאמאס און די ברייטערע דעמיליטאריזאציע פון עזה איז די קומענדיגע פאזע פון מדינת ישראל'ס צילן בעפאר סיי וואספארא איבערבוי קען זיך אנהייבן.


די בילדער פונעם באזוך, וואו מען זעהט צה"ל זעלנער פאזיציאנירט צווישן א חרוב'ע שטאטישע לאנדשאפט, שטרייכט אונטער דעם פארנעם פון די חורבנות וואס האבן זיך אנגעזאמלט איבער עזה זינט די מלחמה האט אויסגעבראכן נאך די כאמאס אטאקעס אין אקטאבער 2023. כאטש מדינת ישראל באאמטע האבן שטילערהייט געוויזן א גרייטקייט פאר באגרעניצטע איבערבוי ארבעט אין געגנטער וואס זענען שוין אונטער פולע צה"ל קאנטראל, האבן זיי קלארגעשטעלט אז אזעלכע שריט וועלן זיין שטארק באגרעניצט און איבערגעקוקט דורכ'ן מיליטער, און נישט דורך די ארטיגע איינוואוינער.


דערווייל דינט נתניהו'ס טור איבער די חורבנות סיי אלס א צייכן פון די יעצטיגע מיליטערישע אנוועזנהייט אינעם פאס, און סיי אלס א מעסעדזש אז די הויפט באדינגונגען פון מדינת ישראל פאר א פולע לעזונג בלייבן אומגעטוישט.