רוסישער אויסערן מיניסטער: איראן קען זיך מעגליך אנשליסן אינעם נייעם 'מעקא' פארטיידיגונגס אפמאך


דער רוסישער אויסערן מיניסטער סערגעי לאווראוו האט פארגעשלאגן אז איראן קען זיך עווענטועל אנשליסן אינעם נייעם "מעקא געמיינזאמע פארטיידיגונגס אפמאך". דער אפמאך, וואס איז אונטערגעשריבן געווארן דעם פארגאנגענעם אוגוסט דורך סאודי אראביע, פאקיסטאן און טערקיי, איז אפן פאר פרישע מיטגלידער, און לויט לאווראוו קען אן איראנער באטייליגונג זיין א מעכטיגע שריט פאראויס צו ברענגען סטאביליטעט אינעם ראיאן.


דער "מעקא אפמאך", וואס איז געשלאסן געווארן דעם 7'טן אוגוסט 2026, איז א מיליטערישע אליאנץ וואס איר הויפט פונקט איז אז אן אטאקע אויף סיי וועלכע פון די דריי גרינדער לענדער וועט באטראכט ווערן ווי אן אטאקע אויף אלע דריי. די לענדער האבן שוין אויפגעשטעלט פלענער פאר א פערמאנענטע הויפטקווארטיר אין סאודי אראביע צו קאארדינירן פאליטישע און מיליטערישע שריט. באאמטע פון די דריי לענדער האבן קלארגעשטעלט אז דער אפמאך איז בלויז געצילט פאר פארטיידיגונג און איז נישט געוואנדן קעגן קיין שום ספעציפישע לאנד.


גערעדט האט לאווראוו ביי אן אויפטריט אין די 'MGIMO' אוניווערסיטעט אין מאסקווע, וואו ער האט אנגעוויזן אז די אליאנץ דארף נישט בלייבן באגרעניצט בלויז צו די יעצטיגע מיטגלידער. ער האט ספעציפיש דערמאנט עגיפטן און אלזשיר, זאגנדיג אז זייער אריינקום וואלט געווען א פאזיטיווע אנטוויקלונג.


גייענדיג ווייטער צו איראן, האט ער געזאגט אז אויב טעהראן וועט זיך אנשליסן אונטער פאסיגע טערמינען, וועט דאס זיין א פראקטישע שריט צו רעאליזירן רוסלאנד'ס לאנג-יעריגע ציל פון א ראיאנאלע זיכערהייט סיסטעם וואס ווערט געפירט דורך די לענדער פונעם מיטל מזרח אליין. דערווייל האט איראן נאכנישט אריינגעגעבן קיין אפיציעלע פארלאנג זיך אנצושליסן, אבער איראנער באאמטע האבן שוין פריער געמאלדן אז זיי קוקן נישט אן דעם נייעם אפמאך ווי א סטראשע.


דער אפמאך קומט אין א צייט פון אנגעצויגענע ראיאנאלע טענסיעס און קאנפליקטן וואס נעמען אריין איראן. דערווייל רוקן זיך סאודי אראביע, פאקיסטאן און טערקיי פאראויס מיט פראקטישע שריט, אריינגערעכנט געמיינזאמע מיליטערישע איבונגען און קאאפעראציע אין די פארטיידיגונג אינדוסטריע. טערקישע באאמטע האבן עס אפילו צוגעגליכן צו אנדערע גרויסע קאלעקטיווע פארטיידיגונגס אליאנצן איבער די וועלט.


רוסלאנד שטיפט שוין לאנג אז די מיטל מזרח לענדער זאלן זיך אליין באשיצן און ווייניגער זיך פארלאזן אויף דרויסנדיגע מאכטן. אנאליסטן צייגן אבער אן אז אריינצוברענגען איראן אין אזא אליאנץ וועט פאדערן גאר אסאך דיפלאמאטישע ארבעט, צוליב די היסטארישע רייבערייען און לעצטיגע מיליטערישע קאנפראנטאציעס צווישן די לענדער אין ראיאן. דאך, צייגן לאווראוו'ס ווערטער אז מאסקווע איז שטארק פאראינטערעסירט צו זען דעם אפמאך זיך אויסברייטערן אלס א מעכטיגע פלאטפארמע אינעם ראיאן.