שפאנונג אין מיטל מזרח: אמעריקאנער מיליטער פארניכטעט 5 איראנער אויל טאנקערס נאך איראנער מיסיל אטאקעס אויף אמעריקאנער קריגס-שיף

די אמעריקאנער צענטקאם (CENTCOM) האט דעם 8'טן סעפטעמבער חרוב געמאכט פינף איראנער אויל טאנקערס, נאכדעם וואס די איראנער רעוואלוציאנערע גווארדיע האט צוויי מאל פרובירט צו אטאקירן אן אמעריקאנער נעיווי קריגס-שיף מיט באליסטישע מיסילס אין די פריערדיגע צוויי טעג. צענטקאם האט אידענטיפיצירט פיר פון די שיפן - די קאוויז, טשארמינאר, הארייזאן 1 און די ריעסקא - וועלכע זענען באטראפן און פארניכטעט געווארן אינעם גאלף אוו אמאן. א פינפטע שיף, די דעריא, איז געצילט געווארן נעבן די כארג אינזל, וואס דינט אלס איראן'ס הויפט צענטער פאר אויל עקספארט אינעם פערסישן גאלף.

טראץ די נאכאנאנדע מיסיל פרואוון, האט די אמעריקאנער קריגס-שיף באוויזן זיך ארויסצודרייען פון ביידע אטאקעס און איז פארבליבן אויף אקטיווע פאטראל אין די ראיאן, און צענטקאם האט באשטעטיגט אז קיין איין אמעריקאנער זעלנער איז נישט געשעדיגט געווארן. בעפאר די אמעריקאנער קרעפטן האבן דורכגעפירט די סטרייקס, האבן זיי פארארדנט די מאנשאפט (קרו) אויף יעדע שיף צו פארלאזן די שיף. איראנער סטעיט מידיא האט טאקע באשטעטיגט אז די מאנשאפט פון כאטש צוויי טאנקערס זענען שפעטער געראטעוועט געווארן דורך רעטונגס-שיפלעך (לייפבאוטס).

א דראמאטישע ווידעא וואס איז ארויסגעגעבן געווארן צוזאמען מיט די צענטקאם סטעיטמענט צייגט פונקטליך וויאזוי די אפעראציע איז צוגעגאנגען. מען זעט דארט פונקטליכע סטרייקס וואס טרעפן די שיפן איינס נאכן צווייטן, וואס האט ארויסגערופן שווערע רויך און פייערן אויף עטליכע שיפן. לויט די באריכטן זענען די קאוויז, הארייזאן 1 און דעריא געטראפן געווארן מיט מיסילס וואס זענען געווען געצילט אויף זייערע מאטארן און סטירינג אפטיילונגען, בעת די טשארמינאר און ריעסקא זענען באטראפן געווארן מיט באמבעס. די ריעסקא האט געליטן די ערגסטע שאדן, און אין די ווידעא זעט מען ווי די שיף איז אינגאנצן ארומגענומען מיט פלאמען בעפאר זי איז ענדליך געזונקען אינעם גאלף אוו אמאן.

צענטקאם האט אנגעוויזן אז אלע פינף שיפן זענען א טייל פון א מולטי-ביליאן דאלארדיגע שאטן-נעצווערק וואס ווערט באנוצט צו פינאנצירן די איראנער רעוואלוציאנערע גווארדיע און אירע טעראר פראקסיס, און זיי האבן אראפגעשטעלט די סטרייק אלס א שווערע עקאנאמישע קלאפ פונקט ווי א מיליטערישע.

דאס איז שוין די צווייטע גרויסע אמעריקאנער סטרייק אויף איראן'ס פלאטע אין בלויז דריי טעג צייט, נאכפאלגנדיג אן ענליכע אפעראציע דעם 5'טן סעפטעמבער וואו דריי אנדערע טאנקערס זענען חרוב געווארן נאכדעם וואס די רעוואלוציאנערע גווארדיע האט געשאסן באליסטישע מיסילס אויף אן אמעריקאנער עירקרעפט קעריער און דעסטרויער. יענע פריערדיגע אינצידענט האט געברענגט א שארפע ווארענונג פון אדמיראל ברעד קופער, דער קאמאנדיר פון צענטקאם, וועלכער האט קלארגעשטעלט אז סיי וועלכע איראנער אטאקע אויף אמעריקאנער שיפן וועט קאסטן א טייערן פרייז פאר איראן'ס אויל פלאטע. די יעצטיגע סטרייק צייגט אז אמעריקע האלט איין איר צוזאג, וואס ברענגט צו אן עסקלעישאן אנשטאט אפצוהאלטן ווייטערדיגע אטאקעס.

אין די שעה'ן נאך די סעפטעמבער 8 סטרייק, האט די איראנער רעוואלוציאנערע גווארדיע נעיווי ארויסגעגעבן פרישע ווארענונגען פאר טאנקער מאנשאפטן וואס אפערירן נעבן קואוועיט און באכריין, אז זיי זאלן תיכף פארלאזן זייערע שיפן אדער ריזיקירן צו ווערן געצילט אין ווייטערדיגע נקמה אטאקעס.

איראן'ס ענטפער איז געקומען זייער שנעל און האט געצילט אסאך ווייטער פון די דירעקטע קאנפליקט זאנע ווי אין די פריערדיגע פעלער. דורכאויס די נאכט האבן איראנער קרעפטן ארויסגעשאסן א באראזש פון באליסטישע מיסילס אויף די 'מואוואפאק סאלטי' עיר בעיס אין ירדן (דזשארדאן), א באזע וואס האסטירט אמעריקאנער לופט אפעראציעס. דאס איז די ערשטע מאל אין די יעצטיגע קאנפליקט וואס איראן שיסט אזוי ווייט צו מערב ווי די ירדן טעריטאריע.

ירדן און אליאירטע פאטריאט באטעריעס האבן אינטערסעפטירט די מערהייט פון די פליענדיגע מיסילס, אבער די אטאקע שטעלט מיט זיך פאר אן ערנסטע פארברייטערונג פונעם קאנפליקט. אין א צייט וואס די פרייזן פון אויל רוקן זיך ארויף נענטער צום 100 דאלאר א פאס (בארעל) מארק, און ביידע זייטן טוישן זיך יעצט מיט סטרייקס כמעט יעדע פאר טעג, האט זיך די יעצטיגע קאנפליקט איבער עטליכע אויל טאנקערס אנטוויקלט צו איינע פון די מערסט אנגעצויגענע און שנעל-עסקאלירנדע פראנטן אינעם ברייטערן אמעריקע-איראן קאנפליקט.