שיף פארניכטעט: אמעריקאנער מיליטער אטאקירט און טויט 3 "נארקא-טעראריסטן" אויפ'ן וואסער


דאס אמעריקאנער מיליטער האט דורכגעפירט א טויטליכע אטאקע אויף א שנעל-פליענדע שיפל אינעם קאראבישן ים דעם פארגאנגענעם סעפטעמבער 9, אומברענגענדיג דריי פערזאנען וועלכע ווערן אנגערופן דורך באאמטע אלס "נארקא-טעראריסטן" (דראג שמוגלער). לויט א מעלדונג פון די אמעריקאנער 'סאוטקאם' (SOUTHCOM) מיליטערישע אפטיילונג, איז די אפעראציע דורכגעפירט געווארן דורך די "דזשוינט טעסק פארס וועסטערן העמיספער", א נייע ספעציעלע קאמאנד וואס איז ספעציפיש געגרינדעט געווארן צו קאארדינירן טויטליכע שריט קעגן שמוגלער נעצן אינעם ראיאן.


די מיליטער האט ארויסגעגעבן א קורצע צען-סעקונדע ווידעא קליפ וואס צייגט ווי דאס שיפל שטייט רואיג אויפ'ן וואסער, און א מאמענט שפעטער רייסט עס אויף אין א פייער און רויך. באאמטע האבן געזאגט אז קראנטע שפיאנאזש האט קלאר געוויזן אז די שיפל איז געווען אקטיוו פארמישט אין דראג שמוגלעריי און האט זיך געפונען אויף באקאנטע שמוגלער רוטס בעת די אטאקע.


אין די ווידעא וואס צירקולירט אויפן אינטערנעט זעהט מען ווי דאס שיפל פארט אריבער דעם וואסער בעפאר די אטאקע, און נאכן אויפרייס קען מען זען דורך אינפרא-רויט קאמערעס א גרויסע צאל פאקעטס שווימען צווישן די ברוכווארג, וואס זענען לויט אלע ווארשיינליכקייטן פעקלעך מיט דראגס. די מיליטער האט נישט ארויסגעגעבן די נעמען פון די אומגעקומענע, און אויך נישט קיין דעטאלן איבער די שפיאנאזש וואס האט געפירט צו די אטאקע - א זאך וואס איז שוין געווארן א נארמע ביי די מיליטערישע מעלדונגען דורכאויס די יאר-לאנגע קאמפיין.


דאס איז די ערשטע פובליק-געמאלדענע אטאקע אין סעפטעמבער און די דריטע זינט די אטאקעס האבן זיך באנייט אין אויגוסט, נאך א פויזע פון צוויי מאנאטן וואס האט זיך אנגעהויבן ענדע יוני. אינטערעסאנט איז אנצומערקן אז אנדערש ווי ביי פריערדיגע אטאקעס, האט די מיליטער דאסמאל נישט אנגערופן די אומגעקומענע אלס מיטגלידער פון אן אפיציעלע טעראר ארגאניזאציע, א טויש אין די שפראך וואס די אדמיניסטראציע האט ביז יעצט גענוצט.


די יעצטיגע אטאקע איז א טייל פון א פיל ברייטערע קאמפיין וואס גייט שוין אן זינט סעפטעמבער 2025, ווען די טראמפ אדמיניסטראציע האט אנגעהויבן ערלויבן טויטליכע אטאקעס קעגן שיפן וואס פירן דראגס דורכ'ן קאראבישן ים און מזרח פאציפישן אקעאן אריין קיין אמעריקע. די מיטוואך אטאקע איז געווען די 69'סטע פובליק-באשטעטיגטע אפעראציע פונעם קאמפיין, וואס האט שוין אומגעברענגט מער ווי 220 מענטשן איבער די צוויי אקעאנען, לויט אומאפהענגיגע שאצונגען.


דער קאמאנדיר פון די סאוטקאם אפטיילונג, גענעראל פראנסיס דאנאווען, האט אראפגעלייגט דעם ציל פונעם קאמפיין אלס א מיסיע צו ברענגען א "טאטאלע סיסטעמאטישע צוזאמברוך" אויף די נארקא-טעראריסט נעצן, דורכ'ן אומברענגען זייער פירערשאפט און איבערהאקן זייערע אפעראציעס נאך בעפאר די דראגס דערגרייכן אמעריקאנער גאסן. די טעסק פארס האט אויך גענומען ציל אויף אנדערע אינפראסטרוקטור, אריינגערעכנט א שווימענדע געז-סטאנציע אינעם פאציפישן אקעאן וואס איז געווען פארבינדן צו אן עקוואדאר-באזירטע פארברעכער גרופע, וואס אמעריקאנער קרעפטן האבן אטאקירט און געזינקען אנהייב חודש.


דער פארנעם און טויטליכקייט פונעם קאמפיין האט אבער געצויגן שארפע קריטיק, אפילו בשעת די אדמיניסטראציע האלט אין איין פובליצירן יעדע אטאקע אלס א צייכן פון שטארקייט. לעגאלע עקספערטן און מענטשנרעכט ארגאניזאציעס אין אמעריקע און איבער די וועלט פרעגן כסדר צי די אטאקעס - וואס ווערן דורכגעפירט אן קיין ארעסטן, געריכטליכע פראצעסן, אדער פובליק באווייזן פון אן אוממיטלבארע סכנה - זענען אין איינקלאנג מיט לאקאלע און אינטערנאציאנאלע געזעצן.


לויט באריכטן, גלייבט מען אז טייל פון די אומגעקומענע אין דעם קאמפיין זענען מעגליך געווען ציווילע בירגער און נישט קיין באשטעטיגטע שמוגלער, כאטש די רעגירונג האט נישט צוריקגעצויגן פון איר צוגאנג. יעצט ווען דער קאמפיין האלט שוין נאך איר ערשטן יאר און ווייזט נישט קיין צייכנס פון זיך אפשטעלן, וועט די פרישע אטאקע ווארשיינליך ווייטער אנהאלטן דעם דעבאטע איבער וואו עס ציט זיך די ליניע צווישן קעמפן קעגן דראגס און דורכפירן אומגעזעצליכע מארדן.