בס"ד

וואונדערליכע רעטונג: 15-יעריגער אפגעראטעוועט נאכן זיצן צוויי טעג אויף אן איבערגעדרייטע שיפל אין די פרירנדע אלאסקע וואסערן

א 15-יעריגער יוגנטליכער איז אפגעראטעוועט געווארן פון די אייז-קאלטע וואסערן פונעם בערינג ים אין אלאסקע, נאכן זיך אנכאפן און זיצן אויף זיין איבערגעדרייטע שיפל פאר קרוב צו צוויי טעג אן קיין עסן אדער טרינקען. די רעטונג קומט אבער אינאיינעם מיט א שווערע טראגעדיע, נאכדעם וואס זיין עלטערע ברודער און קאזין זענען ליידער אומגעקומען אינעם אינצידענט.


דער 15-יעריגער דערעק פארקער אגנאאנגא, איז ארויסגעפארן דעם פארגאנגענעם פרייטאג אינאיינעם מיט זיין 35-יעריגן ברודער סידני קולאוויאי און א קאזין, אויף א פישינג טריפ פונעם קליינעם אלאסקע דארף 'סאוואאנגא'. זיי האבן געפלאנט זיך אומצוקערן זונטאג אינדערפרי.


שבת ביינאכט האט פאסירט די טראגעדיע. צוליב שווערע וועטערס און א פארפלאנטערטע פישינג שטריק, האט זיך זייער 18-פיסיגע שיפל איבערגעדרייט, אריינווארפנדיג אלע דריי אין די פרירנדע וואסערן. ווען זיי זענען נישט אהיימגעקומען אין צייט, האבן פאמיליע מיטגלידער אלארמירט די אויטאריטעטן, וואס האט געפירט צו א ברייטע זוכונג אקציע דורך די 'קאוסט גארד' און אלאסקע סטעיט טרופערס.


ענדליך, מאנטאג אינדערפרי, האט א קאוסט גארד פליגער באמערקט דעם יוגנטליכן קניען אויפן איבערגעדרייטן שיפל, ארום פיר מייל פונעם 'סעינט לארענס' אינזל. א דערנעבנדיגע פישינג שיף, די 'נארטוועסט עקספלארער', איז צוגעפארן און אים ארויפגעצויגן צו זיכערהייט, א דראמאטישע מאמענט וואס איז אויפגעכאפט געווארן אויף ווידעא.


ליידער איז די הילף געקומען צו שפעט פאר זיין ברודער און קאזין. דער ברודער איז פארפלאנטערט געווארן אין די פישינג שטריק און איז אריינגעשלעפט געווארן אונטערן שיף ווען עס האט זיך איבערגעדרייט. דער קאזין האט זיך ארויסגעגליטשט פונעם שיפל און איז אומגעקומען פון די ביטערע קעלט דורכאויס די נאכט בעפאר די רעטער זענען אנגעקומען.


דער געראטעוועטער יוגנטליכער האט געליטן פון 'הייפאטורמיע' (אונטער-נארמאלע קערפער טעמפעראטור). די רעטער האבן אים גלייך איינגעוויקלט אין דאכענעס און אים אנגעווארימט מיט הייסע פאקעטס, בעפאר מ'האט אים אפגעפירט אין א שפיטאל אין די שטאט נאם פאר ווייטערדיגע מעדיצינישע באהאנדלונג.


אין דעם קליינעם דארף סאוואאנגא, וואס ציילט קוים 800 איינוואוינער און וואו פיש-כאפן איז א טייל פונעם טעגליכן לעבנסשטייג, באצייכנט מען די רעטונג אלס אן אפענער נס. אין די זעלבע צייט טרויערט די קאמיוניטי אויפן פארלוסט פונעם ברודער, וועלכער איז געווען א באקאנטער קאפיטאן און א געטרייער שטיצער פארן דארף.