בס"ד


עזה: 4 פאלעסטינער אומגעקומען אין פרישע מדינת ישראל אטאקעס טראץ פייער-אפשטעל; זוהן פון געזונטהייט מיניסטער צווישן די טויטע


מדינת ישראל קרעפטן האבן דורכגעפירט א כוואליע פון לופט-אטאקעס איבער עזה, אין וועלכע אמווייניגסטנס פיר פאלעסטינער זענען אומגעקומען. די פרישע אטאקעס קומען טראץ וואס אן אפיציעלע פייער-אפשטעל איז שוין אין קראפט זינט אקטאבער 2025.


דער מערסט-באקאנטער פערזאן וואס איז אומגעקומען אין די אטאקעס איז באסיר אל-בורש, דער עלטסטער זוהן פון דעם דירעקטאר-דזשענעראל פונעם עזה געזונטהייט מיניסטעריום, מוניר אל-בורש. ער איז געהרגעט געווארן פון א מדינת ישראל דראון אטאקע מערב פונעם דזשאבאליע פליטים לאגער.


די מדינת ישראל מיליטער האט רעאגירט זאגנדיג אז זיי האבן געצילט עטליכע טעראריסטן אין די אפעראציע, אריינגערעכנט באסיר, אבער האבן נישט איבערגעגעבן קיין מער דעטאלן. פון די אנדערע זייט האט זיין פאמיליע געזאגט אז ער האט פונקט אנגעפילט וואסער קאנטעינערס נעבן זיין טאטע ווען ער איז געווארן געטראפן. א ווידעא וואס איז פארשפרייט געווארן צייגט ווי דער טאטע טראגט זיין זוהן'ס קערפער, איינגעוויקלט אין א דאכענע, צום שפיטאל.


אין א באזונדערע דראון אטאקע איז אומגעקומען ראעד אבו אסר אינעם שודזשייע געגנט. אן אנדערע דראון האט געטראפן א קאר אינעם שעיך ראדוואן מארקעט, וואו אמווייניגסטנס איין פערזאן איז געהרגעט געווארן און פיר אנדערע זענען פארוואונדעט געווארן, אריינגערעכנט צוויי קינדער, לויט מעדיצינישע קוועלער.


די סטרייקס זענען א טייל פון די אנגייענדע מיליטערישע אקטיוויטעטן וואס מדינת ישראל פירט אן אין עזה, אפילו נאכדעם וואס די גרויסע שלאכטן האבן זיך שוין אפיציעל אפגעשטעלט כמעט א יאר צוריק. עדות האבן באריכטעט אז מדינת ישראל מיליטערישע טאנקען און טראקס האבן געעפנט פייער מזרח פון דזשאבאליע, און העליקאפטערס און דראונס זענען געזען געווארן פליען העכער כאן יוניס און רפיח דעם זעלבן טאג.


געפאר פון איינפאלנדע געביידעס


אין צוגאב צו די מיליטערישע געפארן, שטייען די ציווילע איינוואוינער אויס א שרעקליכע סכנה פון די ארום 2,000 געשעדיגטע געביידעס איבער עזה וואס דינען אלס שוץ-ארט פאר צענדליגע טויזנטער פאמיליעס וואס זענען געבליבן אן א דאך איבערן קאפ. יו-ען באאמטע ווארענען אז ארום 400 פון די געביידעס זענען אין אן ערנסטע סכנה פון איינפאלן יעדע מינוט, א געפאר וואס ערווארטעט זיך צו ווערן פיל ערגער מיט די קומענדיגע ווינטער רעגנס.


די סכנה איז ליידער א רעאליטעט, נאכדעם וואס א האלב-צובראכענע אפארטמענט געביידע אין עזה סיטי איז שוין איינגעפאלן אנהייב חודש, אומברענגענדיג ארום 20 מענטשן וואס האבן זיך דארט באהאלטן. דאס צייגט ווי די פיזישע חורבנות פון די מלחמה גייען ווייטער אן מיט'ן נעמען קרבנות, אפילו ווען די געווער זענען שוין מערסטנס שטיל.