טראגעדיע אויפ'ן וואסער: שיפל מיט 60 פאסאזשירן איבערגעדרייט נאך א בלוטיגע געשלעג מיט מאטשעטעס; צוויי טויט און צענדליגע געראטעוועט


א פרימיטיווע שיפל וואס האט געטראגן ארום 60 מענטשן האט זיך איבערגעדרייט זונטאג ביינאכט ארום 11 אזייגער, בערך 10 מייל אוועק פון די 'מאנא איילענד' אינעם מאנא פאסאזש. דאס איז געקומען נאכדעם וואס א ווילדע געשלעג מיט מאטשעטעס האט אויסגעבראכן צווישן די פאסאזשירן, וואס האט געפירט דערצו אז דאס איבערגעפילטע שיפל זאל זיך איבערדרייען אין די טונקעלע וואסערן און אריינווארפן צענדליגע מענטשן אין ים.


די דראמאטישע סצענע איז אנטדעקט געווארן מאנטאג ארום מיטאג צייט, ווען א ציווילע שיף האט באמערקט פיר מענטשן שווימען אין וואסער און האט תיכף אלארמירט די אטאריטעטן. א מאסיווע רעטונג אפעראציע איז באלד אריינגעגאנגען אין קראפט, אריינגערעכנט די אמעריקאנער קאוסט גארד, פארטא ריקא פאליציי, קאסטומס ענד בארדער פראטעקשאן (CBP), און לאקאלע אגענטורן פונעם דאמיניקען רעפובליק.


רעטונגס קרעפטן האבן באוויזן ארויסצושלעפן כאטש 40 מענטשן לעבעדיגערהייט פונעם וואסער, אבער ליידער זענען צוויי קערפערס ארויסגעצויגן געווארן טויט. די זוכענישן זענען נאך אנגעגאנגען מאנטאג פארנאכטס צו טרעפן די איבערגעבליבענע פאסאזשירן וואס פעלן נאך.


באאמטע האבן אראפגעמאלן א כאאטישע און לעבנס-געפארפולע סצענע, אנגעוויזנדיג אז אסאך פון די געראטעוועטע זענען שוין געווען פארוואונדעט פונעם מאטשעטע געשלעג נאך בעפאר די שיף האט זיך איבערגעדרייט, וואס האט פילפאכיג שווערער געמאכט די רעטונגס ארבעט. א דאנק די שנעלע קאארדינאציע צווישן די אמעריקאנער און דאמיניקאנער רעטונגס טימז, האט מען באוויזן צו ראטעווען דעם גרעסטן טייל פון די פאסאזשירן רעלאטיוו שנעל.


די 'מאנא פאסאזש' איז שוין לאנג באקאנט אלס א געפארפולע רוטע פאר די וואס פרובירן צו מאכן דעם ריזיקאלישן רייזע צו אנטלויפן פון שווערע אומשטענדן אין זייערע היימלענדער, און די יעצטיגע טראגעדיע לייגט זיך צו צו די טרויעריגע רעקארד פון סכנות אויפ'ן ים. דערווייל גייט אן אן אויספארשונג צו דערגיין די פונקטליכע צאל פארוואונדעטע און וואס פונקטליך האט געפירט צום בלוטיגן געשלעג.