בס"ד

דראמאטישע רעטונג: סקיי-דייווערס שפרינגען פונעם הימל צו ראטעווען פאסאזשירן פון א פליגער קראך אין וויסקאנסין


א רוטינע 'סקיי-דייווינג' פלי רייזע איבער וויסקאנסין האט זיך אין א רגע פארוואנדלט אין א לעבנס-רעטונג מיסיע. דזשאן בעכטעל און נאך צוויי ערפארענע סקיי-דייווערס זענען געווען הויך אין די לופטן העכער די שטאט 'איסט טרוי' ווען זיי האבן באמערקט ווי א קליינער פליגער פארשווינדט זיך פלוצלינג אונטער די ביימער, און זיי האבן גלייך פארשטאנען אז דאס איז נישט קיין נארמאלע לאנדונג.


אן קיין צווייפל האבן זיי גלייך געבעטן זייער פילאט צו טרעפן א זיכערע פלאץ וואו אראפצושפרינגען, און די גרופע האט זיך אראפגעלאזט מיט זייערע פאראשוטן גראד אריין אינעם קארן-פעלד וואו דער פליגער האט געקראכט. איינער פון די סקיי-דייווערס, א געוועזענער פאראמעדיק, האט תיכף אנגעהויבן באהאנדלען א פאסאזשיר וואס האט געליטן פון אן ערנסטע קאפ וואונד, בעת די אנדערע האבן אלארמירט די עמערדזשענסי קרעפטן און פארזיכערט דעם ארט ביז די ערשטע הילף איז אנגעקומען.


בעכטעל האט שפעטער איבערגעגעבן אז די טיימינג איז געווען אומגלויבליך. "די טיימינג וואלט נישט געקענט זיין בעסער," האט ער געזאגט. "ווען מיר פליען ארויס פינף מינוט פריער, וואלטן מיר עס נישט געזען; און ווען מיר גייען ארויס 15 מינוט שפעטער, וואלטן מיר שוין נישט געקענט אנקומען אהין צו העלפן."


אלע פיר מענטשן וואס זענען געווען אויפן קליינעם פליגער, וואס האט געקראכט אביסל דרום פונעם לאקאלן עירפארט, ערווארטן זיך צו ערהוילן אינגאנצן, א דאנק די שנעלע רעאקציע פון די סקיי-דייווערס. בעכטעל, וואס טוט שוין סקיי-דייווינג איבער וויסקאנסין פאר דרייסיג יאר, זאגט אז דאס איז די ערשטע מאל וואס ער שפרינגט אראפ צו העלפן ביי אן עמערדזשענסי, צולייגנדיג: "איך וואלט עס זיכער איבערגעטאן אין א סעקונדע."


די אורזאך פונעם קראך ווערט ווייטער אויסגעפארשט דורך די פעדעראלע אוויאציע אטאריטעטן.