קאוסט גארד טרעפט ברוכווארג אין די זוכענישן נאך א פארשוואונדענע מעדיצינישע פליגער נעבן נענטאקעט


די אמעריקאנער 'קאוסט גארד' זאגט אז זיי האבן געפונען א שטח פון ברוכווארג וואס ציט זיך אויף ארום 80 ביז 90 פיס ברייט, אינעם אקעאן נעבן די ברעגעס פון 'נענטאקעט', מאסאטשוסעטס. דאס איז די ערשטע פיזישע שפורן וואס אינוועסטיגעיטארס טרעפן פונעם פארשוואונדענעם מעדיצינישן טראנספארט פליגער זינט עס איז נעלם געווארן.


"אצינד זענען מיר בלויז פאקוסירט אויף צו טרעפן די מענטשן," האבן באאמטע געזאגט, אונטערשטרייכנדיג אז דאס געפינען די זעקס פאסאזשירן וואס זענען געווען אויפן פליגער בלייבט די העכסטע פריאריטעט, בשעת די רעטונגס אגענטורן ארבעטן אויפן סצענע.


דער פליגער, א 'גאלפסטרים G100' מעדיצינישע טראנספארט וואס איז געפארן פון בערמיודע קיין באסטאן, האט פארלוירן קאנטאקט מיט די לופט טראפיק קאנטראלערס פרי שבת אינדערפרי, ארום 20 מייל אוועק פון די נענטאקעט אינזל. פיר קאנאדישע בירגער און צוויי בערמיודע איינוואוינער זענען געווען דערויף בעת'ן עקסידענט.


באאמטע געבן איבער אז די גרויסע מאס ברוכווארג וואס איז צושפרייט איבערן גאנצן זוך-שטח מאכט עס שווער צו זאגן מיט זיכערקייט פונקטליך וואס די מאנשאפטן זעען אויפן וואסער, וואס דאס קאמפליצירט די ארבעט אפצושאצן די סצענע, אפילו ווען די זוכענישן גייען אן אין פולן קראפט.


קאוסט גארד מאנשאפטן אין די לופטן און אויפן וואסער, אריינגערעכנט העליקאפטערס, שיפן און פליגערס, אינאיינעם מיט הילף פון די ניו יארקער 'עיר נעשאנאל גארד', ארבעטן ארום די זייגער זינט דער פליגער איז פארשוואונדען געווארן. די זוכענישן האבן שוין דערווייל ארומגענומען טויזנטער קוואדראט מייל אינעם אקעאן, וואס צייגט אויף די גרויסע פארנעם פון די אפעראציע בשעת די רעטונגס-קרעפטן יאגן זיך צו טרעפן מעגליכע איבערלעבער.


קאוסט גארד באאמטע זאגן אז א פולע אויספארשונג איבער וואס עס האט געפירט דערצו אז דער פליגער זאל אראפקראכן וועט נאכפאלגן נאר נאכדעם וואס די זוך און רעטונגס אפעראציעס וועלן זיך ענדיגן.