באריכטן: א מאסיווע פייער האט אויסגעבראכן אין א סאודי אראבישע אויל רעפיינערי נאך א מעגליכע הוטי אטאקע


פרא-איראנער נייעס קוועלער באריכטן איבער א מאסיווע פייער וואס האט אויסגעבראכן אין די 'סאודי אראמקאו' אויל רעפיינערי אין ראביג, צפון פון דזשעדא. לויט די באריכטן איז דאס געקומען אלס רעזולטאט פון אן אטאקע דורך די הוטי רעבעלן, כאטש וואס עס איז דערווייל נאכנישט דא קיין שום אפיציעלע באשטעטיגונג פון די סאודישע אטאריטעטן.


אויף סאשעל מידיא צירקולירן ווידעא קליפס וואס צייגן א שווארצע וואלקן פון רויך און ריזיגע פלאמען וואס הייבן זיך פונעם 'פעטרא ראביג אראמקאו' קאמפלעקס. דער קאמפלעקס געפינט זיך ביים ברעג פונעם רויטן ים, א סטראטעגישע ארט וואס מאכט יעדע קלענסטע שטערונג דארט גאר סענסיטיוו פאר די גלאבאלע ענערגיע מארקעט. די בילדער פון די שווערע רויך און פלאמען האבן נאר פארשטארקט די שמועות, טראץ וואס עס איז נאכנישט אפיציעל באשטעטיגט געווארן.


די יעצטיגע באריכטן זענען א טייל פון א רייע ענליכע קלעימס דורך די הוטיס איבער אטאקעס אויף סאודישע ענערגיע אינפראסטרוקטור, אין ליכט פון די באנייטע שלאכטן וואס קומען פאר אין תימן. פריערדיגע באריכטן איבער אטאקעס אויף פאסיליטיס אין די ריאד געגנט האבן שוין געפירט צו א העכערונג פון קרוב צו 1 פראצענט אין די פרייזן פון 'ברענט' רויע אויל, צוליב די פחדים פון א מאנגל אין סופליי. די ענערגיע מארקעט רעאגירט געווענליך גאר שנעל צו אזעלכע נייעסן, אפילו ווען זיי זענען נאכנישט באשטעטיגט.


דערווייל הערט זיך א שטילקייט פון די סאודישע אפישעלס און פון די 'אראמקאו' קאמפאני זעלבסט, וואס לאזט די אורזאך און די גרויס פונעם שאדן אומבאשטעטיגט. די סאודישע קאאליציע האט שוין עטליכע מאל אין די פארגאנגענהייט אוועקגעמאכט ענליכע הוטי קלעימס אלס איבערגעטריבן אדער פאלש. די סיטואציע בלייבט דערווייל אומקלאר ביז עס וועט קומען אן אפיציעלע סטעיטמענט, אבער עס האלט די אויגן פונעם פובליק אנגעשטרענגט אויף די סענסיטיווע אויל אינפראסטרוקטור אין די ראיאן.