נתניהו ביים אפצייכענען 3 יאר זינט די אקטאבער 7 אטאקעס: "כאמאס פירערשאפט אין עזה וועט ווערן אינגאנצן אויסגעריסן"


אין ליכט פונעם דריטן יארטאג זינט די שוידערליכע אקטאבער 7 אטאקעס, האט פרעמיער מיניסטער בנימין נתניהו היינט געעפנט די רעגירונגס קאבינעט זיצונג מיט א טרויעריגע אנדענק פאר די קרבנות פונעם שרעקליכן מאסאקער אין די שטעטלעך ארום עזה. ער האט אפגעגעבן כבוד פאר די זעלנער וואס זענען געפאלן אין די מלחמה, ווי אויך פאר די מענער, פרויען און קינדער וואס זענען אומגעברענגט געווארן יענעם ביטערן טאג.


נתניהו האט איבערגעגעבן פאר די מיניסטארן אז די מיליטער האט שוין עלימינירט 4,000 פון די ארום 6,000 כאמאס טעראריסטן וואס זיי זוכן זינט די אטאקע. ער האט קלארגעשטעלט אז קיינער פון די פארבליבענע טעראריסטן האבן נישט קיין אימיוניטי, און געשוואוירן אז מען וועט עווענטועל אנקומען צו יעדן איינציגן פון זיי. דער פרעמיער מיניסטער האט דעקלארירט קליפ און קלאר אז די כאמאס פירערשאפט אין עזה וועט ווערן אינגאנצן אויסגעריסן, אנווייזנדיג אז די לעצטע דריי יאר זענען א דירעקטע רעאקציע צו די אכזריות'דיגע אטאקעס פון אקטאבער 7.


דער פרעמיער מיניסטער האט אויך אויסגענוצט די געלעגנהייט ארויסצוברענגען א ברייטערע סטראטעגישע טויש, זאגנדיג אז מדינת ישראל איז יעצט די שטארקסטע מיליטערישע קראפט אינעם מיטל מזרח, בעת אירע פיינט זענען געבליבן שוואכער ווי סיי ווען אין די נאענטע היסטאריע. אלס באווייז דערצו האט ער אנגעוויזן אויף די 'תקומה' ראיאן אינעם מערב נגב, וואו ארום 90 פראצענט פון די עוואקואירטע איינוואוינער זענען שוין צוריקגעקומען אהיים, און נייע פאמיליעס ציען זיך יעצט אריין אין די איבערגעבויטע קיבוצים און שטעטלעך. אן ענליכע אויפלעבונג קומט אויך פאר אין צפון.


גייענדיג צו זיכערהייט אנגעלעגנהייטן, האט נתניהו געווארנט אז כאטש כאמאס איז שטארק אפגעשוואכט געווארן, קענען זיי מעגליך פרובירן אנצומאכן א פראוואקאציע מיט זייערע פארבליבענע כוחות אין די טעג בעפאר די קומענדיגע וואלן, אין האפענונג צו טוישן די רעזולטאטן. ער האט קלארגעמאכט אז מדינת ישראל איז גרייט אפצושטעלן סיי וועלכע אזא פרואוו און וועט ענטפערן מיט א מאסיווע קראפט. ער האט אויסגעפירט מיט א שארפע מעסעדזש צו די פיינט נישט צו אויספרובירן דאס לאנד, נאכדעם וואס מען האט שוין געזען וואס די מיליטער האט באוויזן אויף זיבן פראנטן דורכאויס די מלחמה.