פרעזידענט טראמפ גיט ענדגילטיגע באשטעטיגונג צו עקזעקוטירן דעם 'פארט הוד' טעראריסט דורך א פייערינג סקוואד


וואשינגטאן. – פרעזידענט טראמפ האט געגעבן זיין ענדגילטיגע באשטעטיגונג דורכצופירן די טויט שטראף אויף נידאל כאסאן, דער געוועזענער ארמיי מעידזשאר וועלכער האט אומגעברענגט 13 מענטשן און פארוואונדעט נאך 32 ביי א שוידערליכע שיסעריי אין די 'פארט הוד' מיליטערישע באזע אין יאר 2009. די עקזעקיושן וועט דורכגעפירט ווערן דורך א מיליטערישע "פייערינג סקוואד".


דער באשלוס, וואס איז רעקאמענדירט געווארן דורך דעפענס סעקרעטערי פיט העגסעט און באשטעטיגט געווארן דורך פענטאגאן ווארטזאגער שאן פארנעל, מאכט דעם וועג קלאר פאר די טויט שטראף וואס איז שוין ארויסגעגעבן געווארן קעגן כאסאן צוריק אין 2013, אבער איז געווארן אפגעשטיפט פאר מער ווי א יארצענדלינג צוליב פארשידענע אפעלאטן אין די געריכטן.


כאסאן האט דעמאלטס געעפנט פייער אינעם צענטער פון די באזע שרייענדיג "אללא אכבאר". ער האט שפעטער געזאגט אין געריכט אז ער האט דאס געטאן אלס נקמה פאר די אמעריקאנער מיליטערישע אפעראציעס אין מוסולמענישע לענדער. ביי זיין טרייעל האט ער זיך אליינס פארטרעטן און אפן געזאגט פאר די דזשורי אז ער איז דער שיסער.


דער עקטינג ארמיי סעקרעטערי עדעם טעל האט באשטימט דעם דאטום פאר די עקזעקיושן אויף דעצעמבער 3 אין פארט הוד. דאס וועט זיין די ערשטע מאל וואס די אמעריקאנער מיליטער פירט דורך אן עקזעקיושן זינט 1961, און די ערשטע מאל וואס עס ווערט דורכגעפירט דורך א פייערינג סקוואד זינט די צווייטע וועלט קריג, א מעטאד וואס איז אין די לעצטע יארן מער באקאנט געווארן מיט עטליכע סטעיט-לעוול עקזעקיושנס אין סאוט קאראליינע.


כאסאן ווערט געהאלטן אין די 'פארט לעווענווארט' טורמע אין קענזעס זינט ער איז געווארן פאראורטיילט. זיין לעצטע לעגאלע פרואוו אפצושטעלן דעם אורטייל איז ארויסגעווארפן געווארן אין אפריל 2025, וואס האט אים אוועקגענומען זיין לעצטע האפענונג זיך ארויסצודרייען פונעם טויט שטראף.


פענטאגאן אפישעלס האבן אראפגעלייגט די באשטעטיגונג אלס א לאנג-ערווארטעטע גערעכטיגקייט פאר די קרבנות און זייערע פאמיליעס. דער פענטאגאן ווארטזאגער פארנעל האט זיך קורץ און שארף אויסגעדרוקט: "דער טאג פון משפט פאר כאסאן איז ענדליך אנגעקומען."