טרעזשערי סעקרעטאר פארטיידיגט טראמפ'ס נייע רוסישע דיזעל אפמאך; רייסט אראפ אייראפעאישע קריטיקירער אלס "היפאקריטן"


טרעזשערי סעקרעטאר סקאט בעסענט האט שארף צוריקגעשאסן קעגן די קריטיקירער פון פרעזידענט טראמפ'ס נייע רוסישע דיזעל אפמאך, ספעציעל ארויסברענגענדיג אייראפע פאר זייער "היפאקריטיע". בעסענט האט געטענה'ט אז די אייראפעאישע לענדער האבן אריינגעפאמפט מער געלט אין רוסלאנד זינט די אוקראינע מלחמה האט אויסגעבראכן וויפיל זיי האבן געגעבן פאר אוקראינע זעלבסט. ער האט קלארגעשטעלט אז עס איז אבסאלוט היפאקריטיש פון זייער זייט צו זאגן אז אמעריקע טאר נישט געניסן פון א ביליגערע פרייז אויף דיזעל.


דער נייער אפמאך, וואס איז געמאלדן געווארן דורך פרעזידענט טראמפ דעם 9'טן אקטאבער נאך א טעלעפאנישע געפרעך מיט וולאדימיר פוטין, וועט ברענגען הונדערטער טויזנטער טאנען פון רוסישע דיזעל קיין אמעריקע און צו די וועלטליכע מארקעטס. נאך מער דיזעל ווערט ערווארטעט אין די קומענדיגע מאנאטן, בעת די טרעזשערי דעפארטמענט וועט נאכלאזן די סאנקציעס אויף דיזעל דעליוועריס ביז יאר 2027. טראמפ האט אראפגעשטעלט דעם דיעל אלס א וועג צו נידערן די ברענשטאף פרייזן פאר אמעריקאנער פארמערס און טראק דרייווערס, אין א צייט וואס די הויכע גאזאלין פרייזן זענען א שווערע לאסט פאר די רעפובליקאנער בעפאר די קומענדיגע מידטוירם עלעקשאנס.


כאטש בעסענט'ס טענה האט א געוויסע באזע, פעלט אבער אביסל קאנטעקסט. א ברייט-ציטירטע אנאליז האט טאקע געוויזן אז די אי-יו (EU) האט אויסגעגעבן מער געלט אויף רוסישע אויל און גאז אין 2024 וויפיל זיי האבן געגעבן פאר אוקראינע אין דירעקטע פינאנציעלע הילף. אבער פאקט-טשעקערס ווייזן אן אז די ציפערן רעכענען נישט אריין די מיליטערישע שטיצע און דעקן נישט די גאנצע צייט פון די מלחמה. דערצו רוקט זיך אייראפע אלס מער אוועק פון רוסישע ענערגיע, און בריסל פלאנירט עס אינגאנצן אפצושטעלן ביז 2027.


דערווייל האט דער אפמאך געצויגן שארפע קריטיק פונעם אוקראינישן פרעזידענט וולאדימיר זעלענסקי און אפילו פון טראמפ'ס נאנטער אליאירטער, סענאטאר לינדזי גרעהעם. זיי טענה'ן אז דאס נעמט אראפ דעם דרוק פון מאסקווע, פונקט נאכדעם וואס דער פרעזידענט האט אונטערגעשריבן א מעכטיגע רוסלאנד סאנקציעס געזעץ. עס איז אויך אינטערעסאנט אנצומערקן אז בעסענט אליינס האט פריער אינגאנצן אויסגעשלאסן אזא סארט נאכלאזונג אין סאנקציעס. צי די פרייזן ביים פאמפ וועלן טאקע פאלן ווי צוגעזאגט בלייבט דערווייל אומקלאר, און דערווייל איז דאס א פאליטישע געפעכט איבער די ציפערן און דעם מעסעדזש.