טראגעדיע אין צפון ארץ ישראל: 15-יעריגער אומגעקומען און ארום 20 פארוואונדעט פון אן אלטע חיזבאללא באמבע אויפרייס


א שרעקליכע טראגעדיע האט פאסירט אין צפון ארץ ישראל נעבן די לבנון גרעניץ, ווען אן אלטע אומ-אויפגעריסענע חיזבאללא באמבע האט פלוצלינג אויפגעריסן אינמיטן א שולע טריפ. א 15-יעריגער איז ל"ע אומגעקומען אויפ'ן ארט, און ארום צוואנציג אנדערע זענען פארוואונדעט געווארן, טייל פון זיי אין אן ערנסטן צושטאנד.


די סטודענטן און לערער זענען געווען אויף א הייקינג טריפ פון די שטאט מעלות-תרשיחא ווען די עקספלאוזשען האט פאסירט. באלד נאכ'ן אינצידענט האבן מיליטערישע העליקאפטערס עוואקואירט די שווער פארוואונדעטע פונעם ווייטן 'רכס רמים' געגנט צו די ארומיגע שפיטעלער.


ווידעא פוטעדזש וואס איז ארויסגעגעבן געווארן פונעם סצענע צייגט ווי מיליטערישע קרעפטן און עמערדזשענסי טיעמס ארבעטן פיבערהאפטיג ביים ארט פונעם אויפרייס. די גאנצע געגנט איז ארומגענומען מיט רויטע טעיפ, און באמבע עקספערטן זענען אויפ'ן ארט צו מאכן זיכער אז די געגנט איז סעיף און קיינער זאל זיך נישט דערנענטערן.


לויט אן ערשטראנגיגע אפשאצונג פון די מיליטער, איז דער אויפרייס געקומען פון א חיזבאללא קלאסטער-באמבע וואס איז איבערגעבליבן פון פריערדיגע ראקעטן אטאקעס אין די געגנט און האט דעמאלטס נישט אויפגעריסן. ספעציעלע באמבע אפטיילונגען, אריינגערעכנט עקספערטן פון די 'יהלום' איינהייט, זענען אראפגערופן געווארן צו אונטערזוכן דעם געגנט און מאכן זיכער אז די ארומיגע וועגן זענען ריין פון פרישע סכנות.


לאקאלע באאמטע און שולע פירער ארבעטן אינאיינעם צו שטיצן די פארוואונדעטע און די פאמיליעס אין די שווערע מינוטן. באאמטע האבן אונטערגעשטראכן אז די באמבע איז ליידער געבליבן באהאלטן טראץ פריערדיגע פרואוון צו רייניגן די געגנט פון אלטע אויפרייס מאטעריאלן. די שרעקליכע בילדער פונעם סצענע דינען אלס א ווייטאגליכע דערמאנונג ווי אזוי אלטע איבערגעבליבענע באמבעס קענען נאך קאסטן מענטשליכע לעבנס לאנג נאכדעם וואס די ראקעטן פליען שוין נישט.