ווייס פרעזידענט ווענס מעלדט איבער פרישע פלענער צו פארברייטערן אויל רעפיינערי אין טעקסעס צו נידערן גאז פרייזן



טעקסעס - ווייס פרעזידענט דזשעי. די. ווענס האט געמאלדן ביי א ראלי אין טיילער, טעקסעס, אז די טראמפ אדמיניסטראציע גייט נוצן דעם "דעפענס פראדוקציע אקט" צו פארברייטערן די לאקאלע 'דעלעק' אויל רעפיינערי.


רעדנדיג צו שטיצער, האט ווענס געזאגט אז דער פראדזשעקט וועט דראסטיש הייבן די פראדוקציע אינעם פלענט, וואס פראצעסירט יעצט ארום 74,000 פעסלעך אויל א טאג. די פלאן איז צו פראדוצירן נאך מיליאנען עקסטערע גאלאנען פון סיי קאמערציאלע און סיי מיליטערישע ברענשטאף יעדן טאג. ער האט אונטערגעשטראכן אז דער שריט וועט העלפן נידערן די פרייזן פאר דרייווערס און לופט-רייזנדע, בשעת עס וועט פארשטארקן די ענערגיע סטאביליטעט און די נאציאנאלע זיכערהייט פון אמעריקע.


די איניציאטיוו איז א טייל פון די אדמיניסטראציע'ס ברייטערע באמיאונגען צו פארמערן די לאקאלע רעפיינערי קאפאציטעט אין לאנד, אין ליכט פון די גלאבאלע סופליי מאנגל. לאקאלע באאמטע און פארשטייער פון די קאמפאני האבן אנגעוויזן אז דער פראדזשעקט קען שאפן הונדערטער נייע דזשאבס אין סמיט קאונטי. ווענס האט ארויסגעברענגט אז דאס וועט ברענגען א דירעקטע בענעפיט פאר טעקסעס פאמיליעס און פאר די אלגעמיינע אמעריקאנער ענערגיע סעקטאר.


דער "דעפענס פראדוקציע אקט", וואס איז א געזעץ נאך פון די קאלטע קריג עפאכע, ערלויבט די פעדעראלע גאווערנמענט צו געבן פריאריטעט און שטיצן וויכטיגע אינדוסטריעלע פראדזשעקטס וואס זענען פארבונדן מיט נאציאנאלע זיכערהייט. מיט'ן זיך צוזאמשטעלן מיט 'דעלעק', זוכט די אדמיניסטראציע צו צולייגן א שטארקע רעפיינערי קראפט אין א סטעיט וואס איז באקאנט פאר איר ענערגיע פראדוקציע. פונקטליכע דעטאלן איבער די פאנדינג און ווען די ארבעט וועט זיך אנהייבן זענען נאכנישט ארויסגעגעבן געווארן דורך די ווייסע הויז אדער די קאמפאני.


דאך האט ווענס קלארגעמאכט אז די עקסטערע גאז פראדוקציע וועט ברענגען א מער סטאבילע סופליי און מעגליכע ביליגערע פרייזן ביים פאמפ און פאר עראפלאנען. די מעלדונג קומט אין א צייט וואס די אדמיניסטראציע לייגט א שטארקע דגוש אויף ענערגיע זעלבסטשטענדיגקייט, גרייטנדיג זיך צו די קומענדיגע מידטוירם עלעקשאנס. איינוואוינער אין די טיילער געגנט ערווארטן צו זען קאנסטראקשן אקטיוויטעטן אין די נאענטע צוקונפט און פרישע ארבעטס-מעגליכקייטן אויף א לענגערע טערמין. באאמטע וועלן ווייטער ארבעטן מיט 'דעלעק' צו פיינעלייזן די פלענער און פארשנעלערן די פראדוקציע.