צוויי ארעסטירט פארן ארויסשווינדלען טויזנטער דאלארן פון א מאשין אין וואלמארט נוצנדיג פאלשע 'קארדבאורד' טעלעפאנען

וועסט בוירלינגטאן. – די לאקאלע פאליציי האט ארעסטירט צוויי מענער און זיי אנגעקלאגט מיט שווערע קלאגעס, נאכדעם וואס זיי האבן באוויזן ארויסצושווינדלען קרוב צו 7,000 דאלאר פון אן אטאמאטישע מאשין אין א לאקאלע 'וואלמארט' געשעפט, דורך נוצן פאלשע סעלפאונס געמאכט פון קארדבאורד און פאפיר.

די מאשין, באקאנט אלס 'עקאו-עי-טי-עם' (EcoATM), איז אן אטאמאטישע קיאסק וואס נעמט אן אלטע עלעקטראנישע געצייג און צאלט אויפן פלאץ קעש לויט די ווערד פונעם כלי. לויט די פאליציי טשיף, דזשעסי לאגאן, האבן די צוויי פארשוינען - דזשעיקאב דזשאנסאן און דאמאן מענינג - דורכגעפירט 89 סוקסעספולע טראנזאקציעס, ארויסציענדיג א סך הכל פון 6,792 דאלאר אין קעש. זיי האבן אויך פרובירט דורכצופירן דעם זעלבן סקעם נאך 46 מאל, אבער די מאשין האט אפגעווארפן יענע פראווענישן.

אינוועסטיגעיטארס האבן אויסגעגעפונען אז די פאלשע טעלעפאנען זענען געווען ספעציעל אויסגעפארעמט נאכצומאכן די סייז, פארעם און אויסזען פון עכטע סעלפאונס, כדי צו קענען אויסנארן די 'עי-איי' (AI) קאמפיוטער סיסטעם פון די מאשין. די פאליציי האט קאנפיסקירט צענדליגע אזעלכע פאלשע טעלעפאנען, וואס זענען באשטאנען פון 3D קארדבאורד מאדעלן און ארויסגעפרינטע בילדער ארויפגעקלעבט אויף קארדבאורד אדער סטייראפאום.

אום צו קענען ארומגיין די לימיטס פון וויפיל טראנזאקציעס איין פערזאן מעג מאכן, האבן די צוויי שווינדלער גענוצט אנדערע מענטשנ'ס איי-די'ס (ID) אין טייל פון די פעלער.

די אויספארשונג האט זיך אנגעהויבן נאכדעם וואס אן ארבעטער פון די פירמע האט באמערקט פארדעכטיגטע אקטיוויטעטן ביים קיאסק אינעם וועסט בוירלינגטאן וואלמארט. צווישן די חדשים פון אפריל און מאי האט די מאשין כסדר אנגענומען די פאלשע טעלעפאנען און ארויסגעגעבן קעש.

די פאליציי טשיף האט אנגעוויזן אז די גרויסע סומע געלט וואס איז געגנבעט געווארן און די צאל טראנזאקציעס צייגט אז דאס איז געווען א גוט-אויסגעפלאנטע אפעראציע און נישט קיין איינמאליגע פראוועניש. ביידע פארשוינען זיצן יעצט אין די 'דעס מוינס קאונטי' טורמע, און זיי זענען אנגעקלאגט געווארן אויף צווייטע-גראד גניבה און אנדערע קרימינאלע קלאגעס. די אויספארשונג גייט נאך אן, און די אטאריטעטן גלייבן אז נאך מענטשן זענען מעגליך געווען פארמישט אין דעם סקעם.