היסטארישע 1.5 טריליאן דאלאר: סעקרעטערי אוו וואר פיט העגסעט לייגט פאר דעם נייעם ריזיגן דיפענס בודזשעט


סעקרעטערי אוו וואר, פיט העגסעט, ארבעט אריין שווער צו איבערצייגן קאנגרעס צו באשטעטיגן די טראמפ אדמיניסטראציע'ס פארגעשלאגענע 1.5 טריליאן דאלאר דיפענס בודזשעט פארן יאר 2027. ער באצייכנט דעם בודזשעט אלס א "דורות'דיגע אינוועסטמענט" אין די אמעריקאנער מיליטערישע קראפט.


רעדנדיג ביי א פאנעל מיט מיליטערישע פירער, האט העגסעט ארויסגעברענגט ווי אזוי די היסטארישע פארלאנג - וואס איז די גרעסטע אין די אמעריקאנער היסטאריע - וועט זיך קאנצענטרירן אויף מאדערניזירן קריטישע אפטיילונגען אינעם מיליטער. די הויפט צילן זענען צו פארברייטערן די דראון קאפאביליטעטן, אנטוויקלען 'עי-איי' (ארטיפישעל אינטעלידזשענס) און אטאמאטישע וואפן סיסטעמען, בויען פרישע קריגס-שיפן אין א שנעלערן טעמפא, און איבערבויען די לאקאלע דיפענס אינדוסטריע צו קענען בעסער זיך פארמעסטן מיט אמעריקע'ס גלאבאלע קעגנערס.


באאמטע ערקלערן אז די ריזיגע פאנדינג איז קריטיש וויכטיג צו פאררעכטן די נאכגעלאזקייט פון די לעצטע יארן און צוריקשטעלן אמעריקע'ס אפשרעקונג קראפט אין א צייט פון קאמפליצירטע גלאבאלע סטראשונגען. דער 1.5 טריליאן דאלאר פיגור, וואס רעכנט אריין סיי די געהעריגע בודזשעט און סיי עקסטערע נויטיגע פאנדינג, איז א געוואלדיגע 42 פראצענט העכערונג פון די פריערדיגע יארן.


די אדמיניסטראציע פירער טענה'ן אז די גרויסע סומע איז נויטיג צו קענען ארויסשטעלן די קומענדיגע דור פון וואפן סיסטעמען שנעל און אין גרויסע קוואנטום, און אין די זעלבע צייט העכערן די געהאלט פאר די סאלדאטן און פארבעסערן די אינפראסטרוקטור. די אינוועסטמענטס אין דראונס און עי-איי טעכנאלאגיע וועט טוישן דעם גאנצן בילד ווי אזוי דאס מיליטער אפערירט, בעת וואס די פרישע שיפן וועלן פארגרעסערן די נעיווי פלאטע און פארשטארקן די לאנג-טערמין גרייטקייט פונעם מיליטער.


העגסעט האט עטליכע מאל קלארגעשטעלט אז אויב מען וועט נישט באשטעטיגן דעם פולן בודזשעט, וועט דאס זיין איינע פון די גרעסטע ריזיקעס פאר די זיכערהייט פונעם לאנד. ער האט ארויסגעברענגט דעם באקאנטן ציל פון "שלום דורך שטארקייט" - אז ווען אמעריקע ווייזט ארויס אן איבערוועגנדע קראפט, האלט דאס אפ מלחמות.


דערווייל גייט נאך אן א דעבאטע אין קאנגרעס איבער די פונקטליכע צעטיילונג פון די געלטער און די באלאנס צווישן טראדיציאנאלע וואפן און נייע טעכנאלאגיעס. ווי נאר די נייע פינאנציעלע יאר דערנענטערט זיך, לייגט דער סעקרעטערי ווייטער אן א שטארקן דרוק אויף די געזעצגעבער צו באשטעטיגן דעם גאנצן פעקעדזש ווי אמשנעלסטן, כדי די מאדערניזאציע פלענער זאלן קענען פאראויסגיין אן קיין פרישע פארהאלטונגען.