בס"ד

קאמישע סצענע אין קאליפארניע: א גנב כאפט א פראסק נאכן פרובירן אנטלויפן אויף א סקעיטבאורד מיט געגנבעטע טולס


א מיטן-נאכט גניבה פון טולס אין קאליפארניע האט גענומען א קאמישע און ווייטאגליכע ווענדונג, און א סעקיוריטי קעמערע האט רעקארדירט יעדע סעקונדע דערפון.


ארום 2 אזייגער ביינאכט, דעם 24'סטן סעפטעמבער אין די שטאט וואקאוויל (Vacaville), קען מען זען אויף א ווידעא ווי דער 35-יעריגער מארק מארינא גנבעט ארויס טולס אין ווערד פון ארום $1,400 פון א פלאמבינג ווען. מיט זיינע הענט אנגעפילט מיט די געגנבעטע חפצים, האט ער פרובירט צו אנטלויפן אויף א סקעיטבאורד. אבער דער סקעיטבאורד האט נישט קאאפערירט, און די קעמערע צייגט ווי ער קראכט אריין אין צוויי געפארקטע קארס בעפאר ער פליט אראפ אויף דער ערד און כאפט עטליכע גוטע פראסקעס.


אין די זעלבע צייט האט א שכן באמערקט פארדעכטיגטע פערזאנען אויף סקוטערס אין די געגנט און איז ארויסגעקומען זיי קאנפראנטירן. די חברה האבן זיך דערשראקן און אפגעצויגן, און מען האט געהערט א קאר אוועקפארן מיט א שנעלקייט. א פאליציי אפיציר וואס איז אנגעקומען פאטראלירן די געגנט האט געטראפן א גרויסע פייפ-רענטש (pipe wrench) ליגן אינמיטן גאס.


עטליכע מינוט שפעטער האט א פאליציי אפיציר רעאגירט צו א רוף איבער געגנבעטע טולס פון א לאקאלע ארבעטס-ווען. די אויספארשונג האט שנעל געפירט צו מארינא, וועלכער איז שוין געווען אויף 'פראבעישן' וואס ערלויבט פאר די פאליציי אים צו זוכן. אפיצירן זענען אראפגעפארן צו זיין הויז פאר א פראבעישן זוך-אקציע, און האבן דארט געטראפן א 'מילוואקי' פאורטעבל בענד-סא (band saw), א 'מילוואקי' סאזאל (Sawzall), און נאך חפצים וואס זענען פארדעכטיגט אלס געגנבעט.


מארינא איז ארעסטירט געווארן און אריינגעזעצט געווארן אינעם סאלאנא קאונטי טורמע אויף עטליכע הארבע קלאגעס פון גניבה און פארלעצן זיין פראבעישן. די וואקאוויל פאליציי דעפארטמענט האט געטיילט די קאמישע ווידעא קליפ אויף סאושל מידיא, וואס איז זינט דאן ברייט צושפרייט געווארן, איבערצייגנדיג אז אפילו די בעסטע אנטלויף-פלאן קען צעפאלן אויף פיר קליינע רעדלעך.