היסטארישע דאנקבארקייט: גייסטישער פירער פון די דרוזן אין מדינת ישראל באדאנקט נתניהו פארן ראטעווען זיין פאלק פון א מאסן-שחיטה אין סיריע


דער העכסטער רעליגיעזער פירער פון די דרוזישע קהילה אין מדינת ישראל, שעיך מואפאק טאריף, איז ארויסגעקומען עפנטליך באדאנקען פריים מיניסטער בנימין נתניהו, אים געבנדיג דעם פולן קרעדיט פארן ראטעווען זיין פאלק פון א זיכערע שחיטה. די ווערטער קומען נאכדעם וואס נתניהו האט אנטפלעקט אז ער האט גערעדט דירעקט מיטן סירישן פרעזידענט, אכמעד אל-שארא, דורכאויס די בלוטיגע שלאכטן פאראיאר.


טאריף שילדערט די שוידערליכע געשעענישן פון יולי 2025 אין די 'סוועידא' ראיאן ביים דרוזן בארג, אלס די ערגסטע קאטאסטראפע אין די מאדערנע היסטאריע פון זייער קהילה. לויט אים, זענען טויזנטער אומגעקומען אדער פארוואונדעט געווארן, אריינגערעכנט פרויען, קליינע קינדער און אלטע מענטשן. "די וועלט האט געשוויגן פאר טעג," זאגט ער, וואס דאס האט אים געפירט זיך צו ווענדן פערזענליך צו נתניהו און אים בעטן צו נעמען שריט ווי אומשנעלסטן.


לויט זיין באריכט, איז עס געווען נתניהו'ס באפעל צו באמבארדירן דעם פארטיידיגונגס מיניסטעריום אין דמשק און צו אטאקירן טויזנטער קעמפער וואס זענען געווען אויפן וועג צום דרוזן בארג, וואס האט ענדליך אפגעשטעלט די בלוטבאד.


דער שעיך האט צוגעגליכן די בילדער פון סוועידא צו די שוידערליכע אקטאבער 7 אטאקעס, און זאגט אז די באשלוסן פון נתניהו וועלן בלייבן איינגעקריצט אין די דרוזישע היסטאריע אלס אן עקזיסטענציאלע אנטוויקלונג. ער האט אויך באדאנקט דעם פריים מיניסטער פארן אריינשיקן ציווילע און מעדיצינישע הילף צו די דערפער אינעם 'חרמון קרוין' ראיאן און אריבער די גרעניץ. ווי אויך האט ער ארויסגעברענגט נתניהו'ס שטרענגע רעאקציע נאך די שוידערליכע מאסאקער אויף קינדער אין מג'דל שמס אינמיטן די מלחמה, און דאס וואס ער האט פארזיכערט אז די דרוזן אין דרום לבנון זאלן קענען בלייבן אין זייערע דערפער אומבאשעדיגט.


טאריף האט באטיטלט דעם בונד צווישן די דרוזן און מדינת ישראל אלס א "שטארקע און סטאבילע אליאנץ וואס גייט אריבער גרעניצן און פאליטישע לאגערן."


כאטש די ווערטער זענען טאריף'ס פערזענליכע ווערסיע פון די געשעענישן, און די סוועידא געוואלדטאטן בלייבן א קאנטראווערסיאלע טעמע — ווען די סירישע רעגירונג האט דעמאלטס געטענה'ט אז זייערע טרופן זענען בלויז געקומען "איינשטעלן ארדענונג" — צייגט אבער די שטארקע לויב די טיפע לאיאליטעט פון די דרוזישע קהילה צו נתניהו. עס ברענגט אויך ארויף פרישע פראגעס איבער וואס פונקטליך עס האט זיך אפגעשפילט אונטער די קוליסן דורכאויס יענע בלוטיגע טעג.