בס"ד

שפאנונג אין בראזיל: מאסיווע ראליס און אנגעצויגענע פאולס א וואך בעפאר די פרעזידענטליכע וואלן


איין וואך בעפאר די צווייטע רונדע פון די פרעזידענטליכע וואלן אין בראזיל וואס קומט פאר אקטאבער דעם 25'סטן, צייגט דער קאמפיין פון פלאוויא באלסאנארא א שטארקע קראפט אויף די גאסן.


ווידעאס וואס צירקולירן אויפן אינטערנעט צייגן ווי טויזנטער שטיצער זענען פארזאמלט געווארן ביי א ריזיגע ראלי, וואו א הויפט גאס איז געווארן אפגעשפארט פאר די מאסן. נאך די ראלי איז ער אפגעפארן קיין סאלוואדאר פאר אן אנדערע קאמפיין עווענט.


פלאוויא באלסאנארא, א סענאטאר און דער עלטסטער זון פון געוועזענעם פרעזידענט זשעיר באלסאנארא - וועלכער האט אים אינדארסירט - לויפט קעגן דעם איצטיגן לינקן פרעזידענט לואיז אינאסיא לולא דא סילווא. אין די ערשטע רונדע וואלן וואס איז פארגעקומען אקטאבער דעם 4'טן, איז באלסאנארא ארויסגעקומען דער געווינער מיט 47.03 פראצענט קעגן לולא'ס 45.16 פראצענט. דאס האט געבראכן אלע פאולס וואס האבן פאראויסגעזאגט א קלארע געווינס פאר לולא. ביידע לאגערן ארבעטן יעצט אריין גאר שווער ארויסצוברענגען די וויילער צו די שטים בודקעס אין וואס צייגט זיך אויס צו זיין א גאר אנגעצויגענע און פאלאריזירטע פארמעסט.


פרישע פאולס געבן פאר באלסאנארא א קליינע אויבערהאנט, אריינגערעכנט א פאול פון 'על זשאזירא' וואס צייגט אים מיט בערך צוויי פראצענט פאראויס, און אן אנדערע פאול פון 'דאטאפאלע' וואס לייגט אים אויך פאראויס, כאטש וואס עטלעכע אנקעטעס זענען נאך אלס אין די 'מארדזשין אוו עראר'. אנאליסטן ווייזן אן אז באלסאנארא האט נישט באקומען אזוי סאך שטיצע ווי ערווארטעט פון די ארויסגעפאלענע קאנסערוואטיווע קאנדידאטן, און פון די אנדערע זייט האט לולא געענטפערט מיט זיינע אייגענע ריזיגע ראליס וואס האבן צוגעצויגן מאסן זינט זיין דורכפאל אין די ערשטע רונדע.


אין א לעגאלע שריט דורכאויס דעם וויקענד, האט א געריכט אין באהיא פארבאטן דעם סיטי קאונסיל אין סאלוואדאר פון געבן פאר באלסאנארא א ספעציעלן 'בירגער טיטל' ביי זיין ראלי דארט, ביז נאך די וואלן פראצעס ענדיגט זיך.


וויבאלד די פאולס האבן אזוי שטארק אונטערגעשאצט באלסאנארא אין די ערשטע רונדע, קען קיינער נישט זאגן מיט זיכערקייט ווי פונקטליך די יעצטיגע נומערן זענען. די פראגע איז יעצט וועלכע זייט עס וועט קענען פארוואנדלען די ענערגיע פון די גאסן אין פאקטישע שטימען קומענדיגן אקטאבער 25.