נתניהו ענטפערט שארף פאר אבאמא: "אידן זענען נישט קיין פרעמדע אקופירער אין זייער אייגענע לאנד"


מדינת ישראל פרעמיער מיניסטער בנימין נתניהו האט שארף צוריקגעשאסן קעגן די באשולדיגונגען אז מדינת ישראל איז געבויט אויף "געגנבעטע לאנד", אין אן אינטערוויו מיטן באקאנטן פאקס ניוז האוסט מארק לעווין.


אין קליפס פונעם אינטערוויו וואס זענען פארעפנטליכט געווארן, הערט מען ווי נתניהו זאגט אז אידן זענען די ארגינעלע אייגנטומער פונעם לאנד און נישט קיין קאלאניזירער. "מיר זענען נישט ווי די האלענדישע אין אינדאנעזיע," האט ער געזאגט, ארויסברענגענדיג אז אידן שטאמען פון יהודה, און זייער אנוועזנהייט אין ארץ ישראל איז א צוריקקער צו זייער היסטארישע היימלאנד, און נישט קיין קאלאניאלע פראיעקט. ער האט אויך צוגעגעבן אז מדינת ישראל פרובירט נישט קיינעם ארויסצוטרייבן.


די קאמענטארן קומען א טאג נאכדעם וואס נתניהו האט ארויסגעשטעלט א ווידעא רעספאנס צו געוועזענער אמעריקאנער פרעזידענט באראק אבאמא, וועלכער האט ביי אן אויפטריט אין נארדערן אירלאנד געזאגט אז ביי די גרינדונג פון מדינת ישראל האט מען צוגענומען לאנד פון אנדערע מענטשן.


אבאמא האט דארט געזאגט אז עס איז פארשטענדליך אז די פאלעסטינער ווילן צוריק זייער לאנד, און אז די זיבן מיליאן פאלעסטינער גייען אין ערגעץ נישט. אבאמא האט אבער יא אנערקענט אז אידן זענען געווארן גערודפ'ט פאר טויזנטער יארן, הויפטזעכטליך אין אייראפע, און האבן געזוכט אן אנטלאף-ארט.


נתניהו האט אנגערופן אבאמא'ס ווערטער "באדויערנד", און קלארגעשטעלט אז דאס אידישע פאלק זענען נישט קיין פרעמדע אקופירער אין די לאנד פון זייערע אבות. ער האט טענה'ט אז די עכטע שטער פאר שלום איז נישט מדינת ישראל, נאר ענדערש די פיינט פון מדינת ישראל און אמעריקע וועלכע זאגן זיך אפ פון אנערקענען א אידישע שטאט אין סיי וועלכע גרעניצן.


די פראגע איבער ווער עס איז דער ארגינעלער אייגנטומער פונעם לאנד איז איינע פון די מערסט סענסיטיווע און עמאציאנעלע טעמעס אינעם קאנפליקט. בשעת די פאלעסטינער און זייערע שטיצער טענה'ן אז זיי האבן טיפע ווארצלען אינעם לאנד און זענען פארטריבן געווארן ביי די גרינדונג פון די שטאט, ווייזן די מדינת ישראל שטיצער אן אויף די אידישע היסטארישע פארבינדונג צום לאנד וואס ציט זיך שוין צוריק טויזנטער יארן. מיט ביידע זייטן וואס נוצן היסטאריע אלס זייער באווייז, קוקט נישט אויס אז די לאנג-יעריגע דעבאטע וועט אזוי שנעל געשליכטעט ווערן דורך איין אינטערוויו אדער רעדע.