בס"ד

שטורעם אין פראנקרייך: פרא-פאלעסטינער פראטעסטירער פארברענען אמעריקאנער און מדינת ישראל פאן ביי א מאסן-פראטעסט אין ליאן

א ווידעא פון ליאן, פראנקרייך, פארשפרייט זיך זייער שנעל אויף די סאציאלע נעצן און ציט א שטורעם פון רעאקציעס. לויט א באריכט פון 'i24NEWS', זעט מען אינעם ווידעא ווי מאסקירטע פראטעסטירער קריכן ארויף אויף א דאך פון א טראם-סטאנציע ביי די 'זשאן-מאסע' סטאנציע, דעם 31'סטן אקטאבער 2026, וואו זיי טרעטן און פארברענען אמעריקאנער און מדינת ישראל פענער. א גרויסע המון עם וואס איז געשטאנען אונטן האט אפלאדירט און געשריגן העצערייען, אריינגערעכנט דעם לאזונג "מדינת ישראל איז א מערדער".


דער אינצידענט איז פארגעקומען דורכאויס א מאסן-פראטעסט איבער די הויכע פרייזן און 'קאסט אוו ליווינג', וואס איז ארגאניזירט געווארן דורך יוניאנס און סטודענטן גרופעס. לויט לאקאלע נייעס קוועלער האבן זיך באטייליגט ארום 19,000 מענטשן ביים פראטעסט אין ליאן.


דער מארש איז געווען א טייל פון א דריטע נאכאנאנדע וואך פון פראטעסטן איבער גאנץ פראנקרייך איבער די הויכע פרייזן, געהאלטן און שולע קאנדיציעס. לויט די אינערן מיניסטעריום האבן זיך ארום 320,000 מענטשן באטייליגט אין די פראטעסטן איבער'ן גאנצן לאנד.


כאטש לאקאלע מידיא האט באריכטעט אז דער פראטעסט אין ליאן איז געווען מערסטנס רואיג, האבן זיך אבער אנגעהויבן רייבונגען ארום די 'זשאן-מאסע' פלאזא, וואו מער ווי 1,000 זיכערהייט קרעפטן זענען געווען סטאנציאנירט, און די פאליציי האט געמוזט נוצן טרערן-גאז צו צעטרייבן דעם עולם.


עקסטרעם-לינקע און פרא-פאלעסטינער אקטיוויסטן האבן זיך אנגעשלאסן אינעם אפיציעלן פראטעסט, און עס שיינט אז דאס פארברענען די פענער איז דורכגעפירט געווארן דורך א קלענערע גרופע אינערהאלב דעם גרויסן עולם. קריטיקירער ווייזן אן אז די העצערייען און דאס פארברענען די פענער איז א ריינע פיינטליכע אקט וואס האט גארנישט צוגעטאן מיט די קאסט אוו ליווינג, בעת אנדערע פרובירן עס אראפצושפילן אלס א פאליטישע פראטעסט. דערווייל זענען נאך אסאך דעטאלן אומקלאר, אריינגערעכנט ווער פונקטליך עס איז געשטאנען אונטער דעם שריט, וויפיל מענטשן האבן זיך דערין באטייליגט, און צי די פאליציי וועט עפענען אן אפיציעלע אויספארשונג דערוועגן.