בס"ד

שוידערליכע ווידעא פובליצירט פונעם מאמענט וואס א פריוואטע דזשעט קראכט אין פלארידע, אומברענגענדיג אלע 9 פאסאזשירן


א נייע דעשקעם ווידעא וואס איז אפגעכאפט געווארן אויף א נאסע גאס אין גרינאקערס, פלארידע, צייגט דעם שוידערליכן מאמענט ווי א 'ליערדזשעט 60' פליגער פאלט אראפ כמעט גראד פונעם הימל און קראכט אריין אין א ריזיגע פייער-באל, שיקנדיג שווארצע רויך איבער די גאנצע געגנט.


דער פליגער, וואס טראגט דעם רעגיסטראציע נומער N722BD, האט פארלאזט אסטין, טעקסאס, דעם 1'טן נאוועמבער 2026, אויפ'ן וועג קיין די באהאמאס מיט 9 מענטשן דערויף. אלע 9 פאסאזשירן זענען ליידער אומגעקומען אינעם קראך וואס האט פאסירט נעבן די 'מיליטערי טרעיל'.


פלייט טרעקינג דאטא צייגט א פלוצלינגדיגע און שארפע פאל פון מער ווי 30,000 פיס א מינוט. לויט די ערשטע אינפארמאציע זעט אויס אז דער פליגער איז געפאלן פון א הייך פון בערך 35,000 פיס אין קוים אביסל מער ווי איין מינוט.


בעפאר די קראך האבן די פילאטן באריכטעט איבער אייז און טורבולענץ, און אין א שפעטערדיגע 'מעידעי' רוף האבן זיי דערמאנט אן 'אווערספיד' צושטאנד. די NTSB פארשט אויס די אורזאך פארוואס דער פילאט האט פארלוירן קאנטראל, און זיי האבן נאכנישט געמאלדן קיין אפיציעלע אורזאך, אזוי אז עס בלייבט דערווייל א מיסטעריע וואס פונקטליך עס איז דארט געשען אין די הויכע ספערן.


דער פליגער האט געקראכט אין א רעזידענשעל געגנט, אבער עס איז נישט באריכטעט געווארן קיין שום פארוואונדעטע אויף דער ערד, וואס דאס איז א גרויסע נס נעמענדיג אין באטראכט ווי שטארק באוואוינט די געגנט איז. הונדערטער איינוואוינער זענען אבער געווארן דיספלעיסד נאכן קראך. אינוועסטיגעיטארס ארבעטן יעצט צוזאמצושטעלן די לעצטע מינוטן פונעם פליגער דורך די פלייט דאטא, ראדיא רעקארדירונגען, און די איבערבליבענישן פונעם קראך.