בס"ד

וואס פאסירט מיט די טויזנטער אומלעגאלע וואפנס וואס ווערן קאנפיסקירט דורך די פאליציי? די NYPD צייגט אין א נייעם ווידעאו וויאזוי זיי ווערן פארניכטעט

וואס פאסירט באמת מיט די טויזנטער אומלעגאלע ביקסן וואס די ניו יארק סיטי פאליציי (NYPD) נעמט אראפ פון די גאסן? די דעפארטמענט האט געענטפערט אויף דעם אין א נייעם פאוסט: זיי ווערן צעשמאלצן, כדי זיי זאלן קיינמאל מער נישט קענען פאראורזאכן קיין שאדן.

אין אן 89-סעקונדע ווידעאו קען מען זען ווי פאליציי אפיצירן לאדן אן די קאנפיסקירטע וואפנס אין באקסעס און טראקס, און דערנאך צעקוועטשן זיי הויפנס פון ביקסן און גיסן אויס די צעשמאלצענע מעטאל פון די פארניכטעטע וואפנס. פאר די וואס האבן זיך געוואונדערט צי די קאנפיסקירטע געווער קען זיך שטילערהייט צוריק אומקערן אויף די גאסן, קומט דער קליפ צו ווייזן אז זיי קומען צו א פולשטענדיגן ענדע.

די פראקטיק איז אבער נישט קיין נייע. אין אפריל 2025 האבן שטאטישע באאמטע עפנטליך פארניכטעט מער ווי 3,500 אומלעגאלע וואפנס אין איין איינציגע עווענט, און די פאליציי דעפארטמענט פירט זיך זינט דעמאלט צו פובליצירן די נומערן פון קאנפיסקירטע וואפנס צוזאמען מיט די פארניכטונג אקציעס.

דעם 29'סטן אקטאבער האט די פאליציי קאמישענער דזשעסיקא טיש געמאלדן אז די דעפארטמענט האט שוין קאנפיסקירט 4,500 אומלעגאלע ביקסן ביז איצט אין יאר 2026, אין א צייט וואס שיסערייען אין די שטאט זענען געפאלן צו א רעקארד נידריגע שטאפל. די NYPD זאגט אז דאס אראפנעמען די וואפנס פון די גאסן איז א הויפט אורזאך פאר דעם דראסטישן פאל אין פארברעכנס, כאטש אנדערע פאקטארן שפילן געווענליך אויך א ראלע אין די טוישונגען פון געוואלדטאטן.

דער פאוסט ברענגט אבער אויף עטליכע פראגעס וואס זענען געבליבן אומגעענטפערט, ווי צום ביישפיל ווי לאנג די פאליציי האלט די וואפנס בעפאר זיי ווערן פארניכטעט, און וואס פאסירט מיט די איבערגעבליבענע מעטאל נאכדעם.