בס"ד

כאאס אין באנגלאדעש: געוואלדטאטן און ראיאטן ביי מאסיווע פראטעסטן פון קליידער פאבריק ארבעטער

שווערע געוואלדטאטן און צוזאמענשטויסן האבן אויסגעבראכן מיטוואך צווישן פאליציי און טויזנטער ארבעטער אין די קליידער אינדוסטריע איבער באנגלאדעש. די מאסיווע פראטעסטן, וואס פאדערן העכערע געהאלטן, האבן געצווינגען הונדערטער פאבריקן אפצושטעלן זייערע אפעראציעס און פארמאכן די טויערן.

די פאליציי האט גענוצט טרערן גאז און סטאן גרענעידס צעצוטרייבן די צעווילדעוועטע פראטעסטירער אין עטלעכע אינדוסטריעלע געגנטער נעבן די הויפטשטאט דאקא, אריינגערעכנט אין די שטעט נאראיאנגאנדזש, סאוואר און גאזיפור. די פראטעסטירער האבן בלאקירט הויפט הייוועיס און גאסן, וואס האט אנגעמאכט א שווערע טראפיק און געשטערט די טראנספארטאציע און פאבריק אפעראציעס איבער'ן ראיאן.

די ארבעטער פאדערן אז די מינימום וועידזש זאל געהעכערט ווערן פון 12,500 טאקא (אומגעפער 100 דאלאר) צו 30,000 טאקא (אומגעפער 245 דאלאר) א מאנאט. זיי טענה'ן אז מיט די שווערע אינפלאציע און די טייערע פרייזן אויף שפייז, הייזער און טראנספארטאציע, איז זייער יעצטיגע געהאלט פשוט נישט גענוג צו קענען איבערלעבן און שפייזן זייערע פאמיליעס.

די אומרוען, וואס האלטן שוין ביים פינפטן טאג, האבן אנגעמאכט א שרעקליכע חורבן פאר די באנגלאדעשע קליידער אינדוסטריע, וואס איז איינע פון די גרעסטע קליידער פראדוקציע צענטערן אין דער וועלט. הונדערטער פאבריקן זענען צייטווייליג פארמאכט געווארן, וואס ברענגט ארויף ערנסטע זארגן איבער שפעטיגונגען אין שיפמענטס צו גרויסע אינטערנאציאנאלע קליידער ריטייילערס.

אלס רעאקציע צו די פראטעסטן, האט די ניי-געגרינדעטע באנגלאדעשע 'וועידזש באורד' געמאלדן מיטוואך אז א נייע געהאלט סיסטעם וועט אריינגיין אין קראפט אין דעצעמבער, און די ארבעטער וועלן ערווארטעט באקומען זייער ערשטע געהאלט אונטער די נייע סיסטעם אין יאנואר. 

אבער, די באאמטע האבן נאכנישט באשלאסן פונקטליך מיט וויפיל די געהאלט וועט ארויפגיין, וואס לאזט איבער א גרויסע פראגע צייכן צי די מעלדונג וועט בכלל באפרידיגן די פראטעסטירער און אפשטעלן די ראיאטן.

די קליידער אינדוסטריע אין באנגלאדעש גיט פרנסה פאר ארום פיר מיליאן מענטשן און מאכט אויס מער ווי 80 פראצענט פון די לאנד'ס עקספארט איינקונפטן. די אנגייענדע כאאס ברענגט ארויף שווערע זארגן איבער פרישע געוואלדטאטן און אן עקאנאמישע קריזיס אויב מען וועט נישט קענען אנקומען צו אן אגרימענט בקרוב.