בס"ד

טראגעדיע אין טערקיי: טויט-צאל פון מאסיווע אויפרייס אין אייזן פאבריק שטיגט צו 17; זעקס פערזאנען ארעסטירט

די צאל אומגעקומענע פון דעם שרעקליכן אויפרייס וואס האט פאסירט מאנטאג אין די 'האבאש' (HABAŞ) אייזן און סטיל פאבריק אין די שטאט אליאגא, אין טערקיי'ס איזמיר פראווינץ, איז געשטיגן צו 17 ארבעטער. דער אויפרייס האט פאסירט ארום האלבן טאג דעם 9'טן נאוועמבער אינמיטן מעינטענענס ארבעט, וואס האט געפירט צו א גרויסע פייער און געמאכט אז טיילן פונעם ריזיגן אינדוסטריעלן געביידע זאלן איינפאלן.


דער טערקישער פרעזידענט רעסעפ טאיפ ערדואן האט לכתחילה געמאלדן איבער 16 טויטע און 13 פארוואונדעטע, אבער איין קריטיש פארוואונדעטער ארבעטער איז שפעטער געשטארבן אין שפיטאל. באאמטע געבן איבער אז 12 מענטשן זענען נאך אלץ פארוואונדעט, אריינגערעכנט איינער אין א קריטישן צושטאנד. די פייער איז עווענטועל פארלאשן געווארן דורך די פייערלעשער. אין די ערשטע שעות נאכן אויפרייס האבן פריע באריכטן גערעדט פון 10 טויטע, 15 פארוואונדעטע און עטליכע פעלנדיגע, אבער די ציפערן האבן זיך שנעל געטוישט ווי נאר די רעטונגס-ארבעטער זענען אנגעקומען אויפן סצענע און אנגעהויבן זוכן אין די חורבות.


די ארטיגע אויטאריטעטן האבן געעפנט א קרימינאלע אינוועסטיגעישאן, און זעקס מענטשן זענען שוין ארעסטירט געווארן בעת פראסעקיוטערס פארשן אויס מעגליכע נאכלעסיגקייט און דורכפאלן אין די זיכערהייט פראצעדורן. די פונקטליכע אורזאך פונעם אויפרייס איז נאכנישט אפיציעל באשטעטיגט געווארן. טייל פריע באריכטן און ווידעא קליפס צייגן אויף א סטרוקטוראלע איינפאל און א פייער אינעווייניג אין די פאבריק, אבער דעטאלן ווי למשל אז א קרעין איז אריינגעפאלן אין אן אויוון זענען דערווייל אומבאשטעטיגט ביז די אינוועסטיגעיטארס וועלן עס קלארשטעלן.


לאקאלע נייעס קוועלעס האבן אויך אנגעוויזן אז דאס איז נישט די ערשטע מאל וואס עס פאסירן עקסידענטן אין די זעלבע פאבריק. אין יאר 2018 איז פארגעקומען אן אויוון אויפרייס וואס האט פארוואונדעט פינף ארבעטער, און נאך אן אויפרייס אין סעפטעמבער 2025 האט איבערגעלאזט זיבן פארוואונדעטע. די גרויסע פראגעס וואס מען פרעגט יעצט זענען: וואס פונקטליך איז דא קאליע געגאנגען, צי מען האט איגנארירט פריערדיגע ווארענונגען, און ווער עס וועט געקלאגט ווערן און טראגן די פאראנטווארטליכקייט פאר די שרעקליכע טראגעדיע.