בס"ד

סופרים קארט ערלויבט פאר די טראמפ אדמיניסטראציע צו באנייען בוי-ארבעט פון גרעניץ וואנט אין טעקסאס

דער סופרים קארט האט געגעבן די גרינע ליכט פאר די טראמפ אדמיניסטראציע צו פריש אנהייבן די בוי-ארבעט פון די גרעניץ צוימען און וועגן אינעם 'ביג בענד' ראיאן אין וועסט טעקסאס, א געגנט וואס רעכנט אריין דעם באקאנטן 'ביג בענד נעשאנאל פארק'.


אין אן 8-1 באשלוס וואס איז ארויסגעגעבן געווארן מאנטאג, האבן די ריכטער אפגעשטעלט אן אורטייל פון א לאקאלע פעדעראלע ריכטערין אין על פאסא, קעטלין קארדאון, וועלכע האט בלאקירט דעם פראדזשעקט דעם פארגאנגענעם אקטאבער 2. דער העכסטער געריכט האט קלארגעשטעלט אז די געזעץ ערלויבט ווארשיינליך נישט קיין געריכטליכע איבערזיכט אויף די קלאגעס, און אז די אינטערעסן פון די רעגירונג צו באשיצן די נאציאנאלע גרעניצן וועגט איבער די טענות פון די קעגנער איבער די שאדן פאר די נאטור און ענווייראמענט. די איינציגסטע ריכטערין וואס האט געשטימט קעגן דעם באשלוס איז געווען קעטאנדזשי בראון דזשעקסאן, וועלכע האט נישט אנגעגעבן קיין אורזאך פאר איר אפזאג.


דער אורטייל איז א גרויסער געווינס פאר'ן ווייסן הויז, אבער עס איז נאכנישט דאס ענדגילטיגע ווארט, וויבאלד דער באשלוס ערלויבט בלויז אז די בוי-ארבעט זאל קענען אנגיין דערווייל וואס דער קעיס גייט ווייטער אן אין די אפיעל קאורטס. אין צענטער פון די געפעכט איז די באשלוס פון היימלאנד זיכערהייט סעקרעטאר מארקוויין מאלין צו איגנארירן געוויסע ענווייראמענטאלע געזעצן לטובת דעם פראדזשעקט, א שריט וואס די יוסטיץ דעפארטמענט זאגט אז קאנגרעס האט קלאר אטאריזירט.


ענווייראמענטאלע גרופעס און אנדערע קעגנער שרייען אז די ארבעט שטעלט אין געפאר איינע פון די שענסטע און מערסט-אפגעזונדערטע נאטור-ערטער אין לאנד, און די 'סענטער פאר ביאלאגישע דייווערסיטי' האט אראפגעריסן דעם באשלוס אלס "שוידערליך". די פראגעס וואס בלייבן יעצט זענען ווי שנעל די בוי-ארבעט וועט זיך רוקן פאראויס, וויפיל פונעם ביג בענד ראיאן וועט ווערן געטוישט, און צי די געריכטן וועלן סיי ווען אויסהערן און אפוועגן די פולע טענות פון די קעגנער.