וויירעל ווידעא: אומגעדולדיגער קאסטומער צעשמעטערט פענסטער אין א לאנדראמאט נאכן ווערן אויפגערעגט אויף א צובראכענע מאשין

וואס האט זיך אנגעהויבן ווי א געווענליכע טאג אין די 'מעדזשיק סאדס' לאנדראמאט אין רעקסבורג, איידעהאו, האט זיך געענדיגט מיט א צעשמעטערטע פענסטער און א פאליצייאישע אויספארשונג.

אויף א סעקיוריטי ווידעא פונעם אינצידענט, וואס איז פארגעקומען דעם 4'טן נאוועמבער, זעט מען ווי א מאן נעמט ארויס זיינע נאסע וועש פון א וואש-מאשין, אבער עס קוקט אויס ווי די וועש זענען געווען אינגאנצן באדעקט מיט ווייסע זייף-פולווער וואס האט זיך קיינמאל נישט אויסגעמישט. די פולווער גיסט זיך אויס אויפן פלאר בעת ער לייגט אריין די וועש אין א וועש-קאסטן.

דערנאך זעט מען ווי ער ווערט ארויס פון די כלים, ער הייבט אויף א בענקל און שמייסט עס אריין אין א גרויסע פענסטער. עס האט גענומען צוויי פרואוון ביז די גלאז האט ענדליך נאכגעגעבן און זיך צעשמעטערט. נאכדעם איז ער אנטלאפן פון די סצענע אין א גרויע קאר.

די רעקסבורג פאליציי דעפארטמענט פארשט יעצט אויס דעם אינצידענט אלס א בייזוויליגע שאדן צו פריוואטע פארמעגן, און זיי בעטן פונעם פובליק ארויסצוהעלפן אידענטיפיצירן דעם פארשוין. דער פארדעכטיגטער ווערט באשריבן אלס א ווייסער מאן, ארום 25 יאר אלט און בערך 5 פוס מיט 9 אינטשעס הויך. די קאר אין וואס ער איז אנטלאפן האט געהאט קאלאראדא לייסענס פלעיטס.

די קליפ איז געווארן זייער וויירעל אויף די סאציאלע נעצן. כאטש אסאך מענטשן פארדאמען זיין ווילדע אויפפירונג און דעם שאדן וואס ער האט אנגעמאכט, געבן אנדערע צו אז זיי פארשטיין זיין ווייטאג און פראסטראציע נאכן זיך ספראווען מיט אומפארלעסליכע מאשינען אין פובליק לאנדראמאטן.

פונדעסטוועגן, א צובראכענע פענסטער קאסט געלט פארן ביזנעס, און די פאליציי זאגט אז זיי ווילן פשוט טרעפן דעם מאן און הערן זיין זייט פון די מעשה. יעדער וואס דערקענט אים אדער די קאר ווערט געבעטן זיך צו פארבינדן מיט די רעקסבורג פאליציי.