בס"ד

מאסיווע גלאבאלע 'מייקראסאפט' אונטערברעכונג אפעקטירט מיליאנען איבער דער וועלט; סיסטעמען הייבן אן צוריקקומען צו נארמאל


די טעכנאלאגיע ריז 'מייקראסאפט' ברענגט ענדליך צוריק אנליין אירע פאפולערע פראגראמען ווי 'אוטלאק', 'טיעמס' און אנדערע סערוויסעס, נאך א מאסיווע גלאבאלע אונטערברעכונג וואס האט זיך אנגעהויבן דאנערשטאג (נאוועמבער 12) ארום 1 אזייגער נאכמיטאג און האט זיך פארצויגן אריין אין פרייטאג.


די פראבלעמען האבן זיך פארשפרייט איבער 74 לענדער אין בלויז ארום איין שעה צייט, אפהאקנדיג די באנוץ פון 'אוטלאק', טיילן פון 'טיעמס' און 'קאופיילאט'. דאס האט איבערגעלאזט רעגירונג אגענטורן, שולעס און ביזנעסער אין א כאאס אן קיין עקסעס צו זייערע אימעילס.


אנהייב האבן די פרואוון צו פאררעכטן דעם פראבלעם נישט געארבעט ווי געפלאנט, און אין א געוויסע פונקט זענען סערווערס וואס זענען שוין צוריקגעשטעלט געווארן, ווידער געפאלן. פרייטאג אינדערפרי האט מייקראסאפט געמאלדן אז זיי זען א פארזעצטע פארבעסערונג, מיט ברייטערע רעזולטאטן אין נארט אמעריקע און איבער גרויסע טיילן פון אייראפע. אבער, טייל באנוצער קענען נאך אלס האבן צייטווייליגע פראבלעמען בעת די טראפיק ווערט צוביסלעך צוריקגעשטעלט.


וואס האט פאסירט?

לויט מייקראסאפט זענען א רייע פון זייערע סערווערס אומערווארטעט געווארן אומדערגרייכט, וואס האט געשאפן אן איבעריגע לאסט און קאנעקשאן פראבלעמען אויף די איבעריגע סיסטעמען. די פירמע גיט אן אז די לאסט איז נישט געקומען פון א פלוצלינגדיגע שפרונג אין טראפיק. זיי האבן אויך קלארגעשטעלט אז עס איז נישטא קיין שום צייכן פון א סייבער-אטאקע אדער אנדערע בייזוויליגע אקטיוויטעטן, כאטש די פונקטליכע אורזאך ווערט נאך אלס אויסגעפארשט.


די אונטערברעכונג האט שווער באטראפן ארגאניזאציעס וואס נוצן 'מייקראסאפט 365', א פראגראם וואס ווערט באנוצט דורך הונדערטער מיליאנען מענטשן טעגליך. אפילו געוויסע גאווערנמענט אפיסעס האבן געווארנט דעם פובליק צו ערווארטן פארשפעטיגטע ענטפערס אויף אימעילס. די גאנצע פאסירונג ברענגט ארויף אן אומבאקוועמע פראגע: וואס פאסירט ווען אזוי פיל מענטשן און ביזנעסער זענען אנגעוויזן אויף איין איינציגע פראוויידער און עס פאלט צוזאמען?