שוידערליכע ווידעא פובליצירט פונעם מאמענט ווען א ברוקלינער געביידע פאלט איין, איבערלאזנדיג 8 טויטע און 18 פארוואונדעטע


א נייע 'רינג' קעמערע ווידעא איז פובליצירט געווארן וואס כאפט אויף דעם שרעקליכן מאמענט ווען א דריי-שטאקיגע געביידע אין ברוקלין איז פלוצלינג איינגעפאלן, אומברענגענדיג אכט מענטשן און איבערלאזנדיג נאך 18 פארוואונדעט.


דער טראגישער אינצידענט האט פאסירט דעם 11'טן נאוועמבער 2026, ביי 1321 פלעטבוש עוועניו, ווען די ארום 96-יעריגע געביידע האט זיך אונטערגעגעבן און איז אריינגעפאלן אין א שכינות'דיגע קאנסטראקשן גרוב (עקסקעוועישאן סייט). אויפ'ן ווידעא קען מען הערן א הויכע קראך, נאכגעפאלגט מיט ברוכווארג וואס פליט ארום און א מאסיווע שטויב-וואלקן וואס הייבט זיך אויף אין די לופטן בעת די בילדינג פאלט צוזאם. סעקונדעס שפעטער הערט מען קאר אלארמס פייפן און מענטשן שרייען אין רעזולטאט פונעם חורבן.


צווישן די אכט קרבנות זענען געווען צוויי קינדער און צוויי קאנסטראקשן ארבעטער, בשעת צווישן די פארוואונדעטע ציילן זיך פיר פייערלעשער וועלכע האבן רעאגירט צום עמערדזשענסי רוף. דער שרעקליכער צוזאמפאל האט געפירט צו א מאסיווע רעטונגס אפעראציע, אריינציענדיג הונדערטער עמערדזשענסי ארבעטער וועלכע האבן געזוכט צווישן די געפארפולע הויפנס ברוכווארג צו טרעפן איבערלעבער.


די ניו יארק סיטי פייער דעפארטמענט האט ענדליך געשלאסן אירע זוך-און-רעטונג אפעראציעס נאכ'ן ארויסנעמען אלע באקאנטע קרבנות, און האט איבערגעגעבן דעם סייט פאר די דעפארטמענט אוו בילדינגס (DOB) און די פאליציי (NYPD) פאר א ווייטערדיגע אויספארשונג.


די אויטאריטעטן פארשן יעצט אויס די אומשטענדן ארום דעם צוזאמפאל, בפרט די גראבונגען און קאנסטראקשן ארבעט וואס איז פארגעקומען אויפ'ן שכינות'דיגן פראפערטי ביי 2625 בעדפארד עוועניו. שטאטישע רעקארדס ווייזן אז דער קאנסטראקשן סייט האט שוין פריער באקומען 'סטאפ-ווארק' ארדערס און ווייאלעישאנס פארבינדן מיט דעמאלישן ארבעט און אומגענוגנדע שוץ פאר די ארומיגע בילדינגס. אויספארשער קוקן יעצט איבער צי די גראבונגען, די פעלערהאפטיגע שטיצע פאר די סטרוקטור, אדער אנדערע קאנסטראקשן פאקטארן האבן בייגעשטייערט צום פלוצלינגדיגן צוזאמפאל.


מעיאר זאהראן מאמדאני האט געמאלדן אז מען וועט דורכפירן פרישע סעיפטי אינספעקשאנס ביי ארום 100 קאנסטראקשן סייטס וואס זענען פארבינדן מיט די קאמפאניס פונעם שכינות'דיגן פראדזשעקט. כאטש די פונקטליכע אורזאך פונעם צוזאמפאל איז נאך דערווייל אומבאקאנט, האט די טראגעדיע אויפגעברענגט ערנסטע פראגעס איבער קאנסטראקשן איבערזיכט, בילדינג סעיפטי, און די שוץ פון אלטע געביידעס אין די געדיכט-באוואוינטע ניו יארק סיטי געגנטער.