"א נס אויפ'ן מיסיסיפי": קיין טויטפעלער נאכדעם וואס א טאנקיר שיף קראכט אריין אין א פאסאזשירן קרוז-שיף אין ניו ארלינס


די ערשטע באריכטן וואס זענען ארויסגעקומען פון ניו ארלינס זענען געווען גאר שרעקעדיג: אמווייניגסטנס 14 מענטשן זענען ארויסגעצויגן געווארן פונעם מיסיסיפי טייך נאכדעם וואס די "אטלאנטיק אספאלט" טאנקיר שיף האט אריינגעקראכט אין די געפארקטע "אמעריקאן העריטעדזש" קרוז-שיף, ארום 12:30 מיטאג צייט, דעם 13'טן נאוועמבער.


לויט די באריכטן האט די טאנקיר שיף פארלוירן קאנטראל אויף די סטערינג בעת'ן פארן ארויף דעם טייך, און האט אריינגעשמעטערט אין די געפארקטע שיף פונקט ווען פאסאזשירן האבן זיך געהאלטן ביים אראפכאפן. די קרוז-שיף האט זיך איבערגעדרייט און אריינגעווארפן מענטשן אין וואסער, און באריכטן געבן אן אז ארום 100 פאסאזשירן און מאנשאפט מיטגלידער זענען אריינגעפאלן אינעם טייך. אפערירער פון שלעפ-שיפלעך (טאגבאוטס), ארומיגע ארבייטער, פאליציי און אנדערע רעטונגס-קראפטן זענען גלייך צוגעלאפן צו העלפן.


ווי שפעטער אין טאג עס איז געווארן, איז דאס בילד געווארן פיל מער פאזיטיוו. באאמטע האבן איבערגעגעבן אז מען האט געטראפן יעדן איינעם פון די קנאפע 200 פאסאזשירן און מאנשאפט אויפן שיף, און עס זענען נישט געווען קיין שום טויטפעלער. צוויי-און-דרייסיג מענטשן זענען אפגעפירט געווארן אין לאקאלע שפיטעלער מיט לייכטע וואונדן, און ביז שבת זענען נאך אכט געבליבן אין שפיטאל, צוויי פון זיי אין אן ערנסטן צושטאנד. דער ארטיגער מעיאר האט עס אנגערופן א "נס אויפ'ן מיסיסיפי".


באאמטע זאגן אז עס קען נעמען עטליכע וואכן ביז מען וועט קענען ארויסשלעפן די קרוז-שיף פונעם וואסער. די קאוסט גארד און די NTSB ערווארטן צו דורכפירן אן אויספארשונג אויפ'ן אינצידענט, און די פונקטליכע אורזאך פארוואס די טאנקיר שיף האט פארלוירן קאנטראל איז דערווייל נאך אומבאקאנט.