קאלאמביע: זיכערהייט קרעפטן פארניכטן איבער 170 מאשינען ביי א ריזיגע אפעראציע קעגן אומלעגאלע מינעריי אינעם אמאזאן


דער קאלאמבישער פרעזידענט, אבעלארדא דע לא עספריעלא, האט געמאלדן אז די לאקאלע זיכערהייט קרעפטן האבן סוקסעספול ארויסגעשטעלט פון באנוץ 176 שטיקער עקוויפמענט און מאשינערי, דורכאויס א דריי-טאגיגע אפעראציע וואס האט זיך געצילט קעגן אומלעגאלע מינעריי (מיינינג) אקטיוויטעטן אין די אמאזאן ראיאן.


די אפעראציע, וועלכע ווערט אנגערופן "אמאזאנאס ליברע 3 - טיקונא" (Amazonas Libre III – TICUNA), האט זיך קאנצענטרירט אויף שווערע מאשינערי וואס ווערט גענוצט דורך פארברעכער פאר אומאויטאריזירטע גראבונגען, וואס שטעלט אין א סכנה דעם רעגן-וואלד און די ארומיגע וואסער קוואלן.


לויט די מעלדונג פונעם פרעזידענט, רעכנט אריין די קאנפיסקירטע עקוויפמענט: 26 בראזיליאנער-סטייל גראבונג מאשינען, 34 אינדוסטריאלע מאטארן, 58 גאזאלין מאטארן, 52 וואסער פאמפען, און 26 וועלדינג מאשינען. דערצו האבן די אויטאריטעטן אנגעטראפן און קאנפיסקירט 700 גראם פון דעם גיפטיגן מעטאל 'מערקורי', ווי אויך צוויי שאטגאנס און צוויי סעלפאונס.


די רעזולטאטן פון די אפעראציע זענען א טייל פון א ברייטערע קאמפיין דורך די קאלאמבישע רעגירונג אפצוהאקן די פינאנציעלע און לאגיסטישע פונדאמענטן פון די קרימינאלע נעצן וואס פירן דורכן אומלעגאלע מינעריי אינעם אמאזאן.


פרעזידענט דע לא עספריעלא האט ארויסגעברענגט אז די ציל פון די אפעראציע איז צו פארמיידן אז די קרימינאלע גרופעס זאלן ווייטער אויסנוצן די נאטורליכע רעסורסן פונעם ראיאן און פארפעסטיגן די טייכן. די באנוץ פון 'מערקורי' ביי אומלעגאלע גאלד-גראבונגען איז באזונדער א גרויסע סכנה, וויבאלד עס קען פארסמען דאס וואסער און די ערד, וואס שטעלט אין א דירעקטע געפאר די לאקאלע איינוואוינער און די חיות וואס זענען אנגעוויזן אויף די ארטיגע וואסערן.


דער פרעזידענט האט קלארגעשטעלט אז די אויטאריטעטן וועלן פארזעצן מיט זייערע אפעראציעס און וועלן בשום אופן נישט ערלויבן פאר די פארברעכער גרופעס צו ווייטער אנהאלטן זייערע חורבנות אינעם אמאזאן עקא-סיסטעם. הגם די יעצטיגע באריכטן און ציפערן זענען בלויז פון די ערשטע דריי טעג, האבן באאמטע אנגעוויזן אז די קאמפיין איז נאך אין פולן שוואונג, און מען ערווארטעט נאך פילע פרישע אפעראציעס אין די נאנטע צוקונפט אפצושטעלן די אומלעגאלע אקטיוויטעטן אינעם ראיאן.