שאקירנדע ווידיאו: קאלאראדא פאליציאנט לאזט איבער זיין פאטראל טראק אויף די שינעס פאר א באן קראכט אריין דערין
שוידערליכע ווידעא: א פאסאזשירן באן קראכט אריין אין א פאליציי טראק אין קאלאראדא
נייע זיכערהייט קאמערע ווידעא וואס איז יעצט ארויסגעגעבן געווארן צייגט דעם שרעקעדיגן מאמענט ווען א 'אר-טי-די' (RTD) פאסאזשירן באן, מיט ארום 70 פאסאזשירן דערויף, האט אריינגעקראכט אין א ליידיגע טארנטאן פאליציי טראק וואס האט טיילווייז פארשטעלט די באן שינעס אין קאלאראדא.
דער אינצידענט האט פאסירט דעם 21'סטן אוגוסט 2026, נעבן קאלאראדא בולעווארד און איסט 100'טע עוועניו, בעת פאליציי אפיצירן האבן רעאגירט צו א טאפל-מארד שיסעריי אין די געגנט.
לויט א באריכט פון די לאקאלע טראנזיט פאליציי, איז דער ערשטער פאליציי קאר אנגעקומען אויפן סצענע ארום 6:19 אינדערפרי, נאכגעפאלגט קורצליך דערויף דורך א סארדזשענט וואס האט געטריבן א פאטראל טראק. די סארדזשענט איז ארויסגעשפרינגען פונעם טראק און אוועקגעגאנגען אויסצופארשן דעם פארברעכן סצענע, איבערלאזנדיג דעם אונטערשטן טייל פונעם טראק ארויסשטעקן איבער די באן שינעס.
ארום 6:20:47 אינדערפרי, האט אן אנקומענדע 'ען-ליין' (N Line) באן אריינגעשמעטערט אינעם אונטערשטן טייל פונעם ליידיגן פאליציי טראק אויף די זייט פונעם דרייווער, און די באן איז געקומען צו א פולשטענדיגן אפשטעל 11 סעקונדעס שפעטער. די ווידעא, וואס איז באקומען געווארן דורך א פובליק רעקארדס פארלאנג דעם 5'טן נאוועמבער 2026, גיט א פונקטליכע בילד פון די געשעענישן וואס האבן געפירט צום קראך.
דורכאויס די אויספארשונג האט די סארדזשענט געזאגט פאר די אויטאריטעטן אז זי האט געמיינט אז זי האט געפארקט דעם טראק גענוג ווייט פון די שינעס. אבער דער קאנדוקטאר פון די באן האט איבערגעגעבן אז ער האט באמערקט דעם טראק אויף די שינעס, ער האט געפיפט מיטן הארן און אקטיוויזירט די עמערדזשענסי ברעיקס בעפארן קראך, אבער די באן האט זיך נישט געקענט אפשטעלן אין צייט.
בחסדי השם איז קיינער פון די ארום 70 פאסאזשירן און מאנשאפט מיטגלידער אויף די באן נישט פארוואונדעט געווארן. דאך האט דער צוזאמענשטויס אנגעמאכט שאדנס פון איבער 150,000 דאלאר צו די באן און די אינפראסטרוקטור ביים באן-אריבערגאנג, אריינגערעכנט א זויל און א טויער.
די קאלאראדא סטעיט פאטראל האט באשלאסן אז די סארדזשענט איז שולדיג אינעם עקסידענט, אבער זיי האבן נישט ארויסגעגעבן קיין טיקעטס און נישט אריינגעגעבן קיין קרימינאלע קלאגעס. די טארנטאן פאליציי דעפארטמענט האט דערווייל געעפנט אן אינערליכע אויספארשונג, בעת באאמטע האבן נאך נישט באשלאסן צי די שטאט וועט דארפן באצאלן פאר די 'אר-טי-די' באן פירמע די ריזיגע קאסטן פון די פארריכטונגען. דער אינצידענט האט אויפגעברענגט פראגעס איבער די זיכערהייט פראצעדורן און ווי אזוי פאליציי קארס ווערן געפארקט נעבן אקטיווע באן שינעס, בפרט ווען אפיצירן רעאגירן צו עמערדזשענסיס.